GIDAN DUHU

Sample · Chapter one

GIDAN DUHU         NA RUKAYYA IBRAHIM LAWALTaɓa Ka Lashe  Kotun cike take maƙil da jama'a alƙali ya rufe kundin shari'ar da ake kan yi bayan kammala ta.  Wasu daga cikin jama'ar da ke kotun suka fara miƙewa suna fita sakamakon kammala shari'ar da suke sauraro, yayin da wasu suka zauna don ba wa idanuwansu abinci.  Furoskito ya miƙe riƙe da wani farin Fayil (File) a hannunsa ya ce "A yau Ashirin da biyar ga watan Junairun shekarar dubu biyu da sha biyar (2015), wannan kotu mai albarka za ta saurari ƙarar kwamishinan 'yan sanda da Hajiya A'isha. Inda ake zargin Hajiya A'isha da laifin kisan mijinta Alhaji Haris bayan sace shi tun a ranar 2 ga watan Janairun wannan shekar zuwa ranar 5 ga watan." Yana gama faɗa ya rufe Fayil ɗin tare da rissinawa cikin girmamawa ya miƙa wa alƙali.  Ɗakin shari'ar ya yi tsit ba ka jin motsin komai, kamar ba wasu halittu da ke rayuwa a cikinsa. Sai da Alƙali ya nazarci fayil ɗin sosai kana ya ɗago ya kalli Hajiya A'isha ya ce "Kin ji abin da mai gabatar da ƙara ya faɗa kuma kin fahimta?"  Ta gyaɗa kai "I, na ji ya mai shari'a."  "Kin amince kin aikata waɗannan laifukan?" Ya faɗa yana kafe ta da na mujiyarsa. Ta girgiza kai tamkar ƙadangaruwa cikin muryar razana ta ce "Ban amince ba ya mai shari'a."  Alƙalin ya yi shiru yana nazartar kalaman hajiya A'isha da yanayinta, sannan ya mayar da dubansa sashin lauyoyin masu ƙara ya ce "To kun ji abin da ta ce, ko kuna da hujjojin da za ku tabbatar wa kotu da cewa ita ta yi kisan?"  "I, ya mai shari'a, muna kan bincike." Suka amsa.  Ya gyada kai "Lauyoyi idan kun shirya sai ku gabatar da kanku."  Wani ƙyamurmurin mutum fari ya miƙe a gaban kotun yana sanye da baƙaƙen kaya irin na turawa da farar riga a ciki ya shaƙe wuya da Naktayil (Necktie) kansa sanye da hula irin ta lauyoyi.  "Ya mai shari'a sunana Barista Al'amin Alhassan ni ne lauyan masu gabatar da ƙara." Yana gama faɗa ya zauna cike da izza.  Alƙali ya kuma duƙufa ga takardun da ke gabansa ya yi wasu 'yan rubuce-rubuce sannan ya sake ɗagowa.  Wani farin matashi ne kyakkyawa ya miƙe shi ma yana sanye da baƙaƙen kaya irin shigar da ke jikin wanda ya zauna ba jimawa. Kodayake a cikin kotun kusan mutum shida ne ke sanye da irin wannan shiga tamkar Hankaki.   Gyara tsayuwarsa ya yi sannan ya ce "Sunana Barista Usman Salis kuma ni ne lauyan wacce ake tuhuma." Sannan ya koma mazauninsa.  Wannan karon alƙali ya jima yana rubutu kafin ya ɗago yana gyara zaman gilashin shi tamkar waziri aku sannan ya ce   "Bayan sauraron ƙarar dake gaban kotu daga bakin mai gabatar da shari'a. A madadin kwamishinan ...

Continue reading free chapter