8

Sadik Abubakar

Lafazi Writers

Wattpad @sadikgg

*SAHURA 08*

To bayan sati daya ke nan da komawa hutun zangon karatu na farko, Faruk ya yi shiri ya ɗauki Sahura, kai tsaye ya nufi makarantar da Hafsat take zuwa, wato '*NUSAIBA ACADEMY*'. Office ɗin Principal ya nufa kai tsaye, da yake da ma shike zuwa biya wa Hafsat kudin makaranta a duk lokacin da buƙatar biyan kuɗin ta taso.

Bayan sun gaisa da Principal din, Faruk ya ce, "Ranka ya daɗe sabuwar ɗaliba ce na kawo maka."

Principal ya kalli Sahura ya ce, "Ya sunan ki?"

"Suna na Sahura." Ta faɗa tare da sunkuyar da kai cike da kunya.

Faruk ne ya karbe zancen da cewa, "Ta yi primary school a garinsu kafin wani iftila'i ya rutsa da ƙauyensu, wanda ya yi sanadiyar mutuwar iyayenta. 'Yar kanwar mahaifina ce."

"Allah Sarki, Allahu Akbar! Allah Ya yi musu rahama Allah Ya shafe kura-kuransu. Ashe marainiya ce?" Principal ya faɗa yana mai nuna tausayi ga Sahura.

"Ranka ya daɗe to yanzu wane aji ne zai fi dacewa da ita?" Faruk ya tambaya.

"Za ta kai shekara nawa yanzu?" Principal ya faɗa tare da duban ta.

"Ina tunanin za ta kai shekaru goma sha biyar." Faruk ya ba shi amsa.

"Ok, za a yi mata gwaji mu ga yanayin kwazonta. If she's good, we'll place her into SS 1."    

Faruk ya ce, "To ba matsala Ranka ya daɗe."

Principal ya faɗa masa duk abubuwan da ake bukata gabadaya har da kudin uniform, ya biya suka yi sallama suka nufo gida.

*_MONDAY_*

Safiyar ranar litinin din farko bayan kai Sahura makaranta, ƙarfe 7:15am Sahura ta gama shiri, ta saka uniform din makarantar, ya hau jikinta sosai gwanin sha'awa, tamkar da ma can ɗaliba ce a makarantar. Misalin ƙarfe 7:30am, sun gama breakfast. Umma sai hararar Sahura take. Ita kuwa ko a jikinta domin idan da sabo kam to ita ai ta saba, don harara ma karamin abu.

To sai dai da alama Sahura ta dan fara samun sauki tun bayan zuwan Baba Abu, domin yanzu haka ma Umma ke yin girki, amma 'yan kananun aikace-aikacen gida wannan takan yi su duk da cewa Umma ta yi zuciya, ta daina saka ta, amma ita kuwa takan yi abin da ta ga ya dace, tunda da ma ta saba.

Faruk ne da kansa ya tusa su a gaba, tiryan-tiryan har zuwa makarantar, Hafsat ta wuce ajinsu, yayin da Faruk da Sahura suka nufi ofis din Principal a karo na biyu domin a ba wa Sahura aji. Sallama ya yi, suka shiga, Faruk ya zauna kan kujera, ita kuwa Sahura durkusawa ta yi a kan gwiwowinta, ta gai da Principal din. Shi ma Faruk mika masa hannu ya yi suka yi musabaha.

Nan Principal ya yi wa Sahura wasu 'yan tambayoyi tare da ba ta wani dan gajeren rubutu ya ce ta karanta masa, ba da bata lokaci ba ta karɓa, ta gyara zama ta fara karantawa daki-daki har ƙarshe. Faruk da ke zaune yana saurare, mamaki ne ya kama shi, yadda ya ji yarinyar sai zuba karatu take kamar saukar ruwan sama.

*_(Nima Sadik mamakin ne ya kamani hade da jin kaunar Sahura ta ziyarci Qalbina 💖😘)_*

Tana gamawa ta miƙawa Principal takardar cikin nutsuwa da ladabi, shi ma din mamaki ne ya tamaimaye shi, an ce masa primary school kawai ta yi, kuma ma ta daɗe da gamawa, sannan uwa uba ma makarantar ƙauye ce, amma kuma ga shi tana karatu tamkar wacce take SS 1 ko SS 2? Kai ko da ma a SS 3 ɗin ba kowacce yarinya ba ce za ta iya karatu fluently kamar ta. Babu shakka tana da ƙoƙari sosai, tubarakAllah Ma Sha Allah! 

Nan take Principal ya ɗauko admission register ya rubuta sunan Sahura, sannan ya rubuta sunan a jikin wata 'yar takarda, ya kira masinjan sa ya ce ya kai ta SS 1A. Sannan ya juyo ga Faruk ya ce, "Yarinyar tana da ƙoƙari, zai fi kyau kawai ta fara daga senior secondary school, ba sai ta yi junior ba. Ka dai ji yadda ta karanta wannan passage ɗin, ba kowacce ɗaliba ba ce a SS 1 zata iya yin yadda ta yi yanzu."

Faruk yace, "To shike nan babu matsala ranka ya daɗe, duk yadda ka ce haka za a yi." Ya yi masa godiya tare da yi masa sallama ya baro Sahura a makaranta.

Misalin ƙarfe 10:40am na safe timekeeper ya kaɗa ƙararrawa, alamar lokacin tara ya yi, dukkan ɗalibai sun fito domin yin break da wasanni.

Hafsat na fitowa ta fara dube-duben ajujuwa ko za ta ga Sahura. Ga tsammaninta JSS 1 za a kai Sahura, don haka ɓangaren JSS din ta nufa, ta kewaye ajujuwan kaf! Ba ta ga Sahura ba. Sai ta dawo ajinsu domin ta ɗauki kuɗin break ɗinta, tana zuwa daf da SS 1A sai ta hangi Sahura zaune a kan desk tana kwafar rubutu. Kanta ne ya yi wani irin kullewa yayin da wani bakin kishi hade da bakin ciki suka turnuƙe mata zuciya, idonta ya rufe har tuntuɓe ta yi garin shiga ajin. Kai tsaye ta nufi daidai inda Sahura take zaune, tsayawa ta yi cak! A kanta, ta kasa magana. Sahurar ce ta yi mata magana da cewa, "Ashe kin san ajin da aka kawo ni?"

Murmushin yaƙe kawai ta yi tare da cewa, "A'a kawai dai na fito ne na duba ki sai na gan ki a nan, yaya Faruk ne ya ce a saka ki a wannan ajin ko?"

Sahura kai kawai ta girgiza mata alamar a'a, ta ci gaba da rubutunta.

"To ke ce kika zaɓi wannan ajin?" Hafsat ta sake tambayar ta, yayin da Sahura ta ɗan dakata da kwafar rubutun ta ce, "A'a ba ni ba ce na zaɓa, Principal ɗin ne ya ce a kawo ni nan."

Kai Hafsat ta girgiza haɗe da taɓe baki sannan ta ce, "Ai shike nan."

Nan ta zauna ta jira "yar uwar tata, har ta gama rubutun suka fito tare zuwa wajen da ake break da kuma wasanni. Hafsat ta haɗu da ƙawayenta, ta gabatar da Sahura a wajensu, sun yi farinciki sosai, sun karɓi Sahura hannu bibiyu da sakin fuska.

Su biyar ne ƙawayen hafsar har ita kanta, wato; Nusaiba ana ce mata Nucy, da Fatima ita kuma Teemah ake kiran ta, da Surayya, Soory shi ne nickname ɗinta, da kuma Khadija ana ce mata Deejarh sai kuma ita Hafsar nata nickname ɗin shi ne Hafcy. Sunan kungiyars *FIVE STARS GROUP *. An san su sosai a makarantar saboda tsananin tsokanarsu da neman rigima, idan suka sako yarinya a gaba sai ta ji ta tsani makarantar gabaɗaya.

Kowacce daga cikinsu ubanta wani ne, ya isa magana, shi yasa suke abin da suka gadama. Idan ka gansu kusan shekarunsu ɗaya, kansu ɗaya, yanayin surar jikinsu ɗaya, marasa kiba ne, tsigalallu ne sai tsiwar tsiya.😂

Ba wasu masu ƙoƙari ba ne sosai wajen karatu, amma abin da zai ba ka sha'awa dangane da waɗannan yara shi ne, ba sa kula maza, hakan tasa ma duk saurayin da ya kwana ya tashi a makarantar yana shakkar tinkarar kowacce daga cikin su da maganar soyayya. Haka nan kuma basa aikata wannan muguwar ɗabi'ar ta kangararrun 'yammatan ƙarshen zamani wato *_LESBIAN_*. Su dai ka bar su da rashin kunya da tsokana, wannan kam halin su ne.

Nan suka yi break tare da Sahura, ta saki jikinta tamkar ta saba da su, babu wani raɓe-raɓe, ta zama kamar da ma can tare suka fara makarantar. Sahura yarinya ce marar duhun kai, tana da sakin fuska da saurin sabo. Banbanci ɗaya da ke tsakaninta da su shi ne, ita dai ba ta da tsiwa, hayaniya ko kuma rashin kunya. Sannan ba ta cika shiga sabgar shashanci ba.

Misalin ƙarfe 1:30pm na rana, timekeeper ya kaɗa ƙararrawar ƙarshe wacce ta ba su damar komawa gidajen iyayensu. Sahura da Hafsat tare suka dawo gida, yunwar makaranta ta kamo su, Hafsat da kyar take takawa saboda rashin juriyar yunwa.