Free chapter · Read without an account

22

by Halima Zakariyya Haruna · KAYAR RUWA Book 1

(22)

Ubangijin da ke da iko da zuciyar kowanne bawa shi kaɗai yasan irin zafi da raɗaɗin da zuciyata ke yi a wannan lokacin. Haka na ci kukana na gode Allah kafin in miƙe da ƙyar in wanke fuskata a cikin sink ɗin kicin, kaina kuwa kamar zai tsage saboda azababben ciwo, ga jikina da ke karkarwa kamar me shirin kwancewa zazzaɓi. Abincin da na gama haɗawa na kwasa, sai da na haɗe har da nawa na juye a ciki don sam bana tunanin a yau dai wani abu shi abinci zai shiga cikina, ai ko yawun bakina jinsa na ke tamkar maɗaci.

Ina shiga ɗakin Iyam na aje mata abincinta, kallo ta bini da shi da mamakinta na ganina fess kamar ba wadda miji ke ƙara aure ba, kuma saboda an fi son ganinka a ƙuntatace har ce take to Allah sa ba mugun abu na ƙulla ba don ita bata taɓa ganin wacca za'a kishiya na harkokin gabanta ba rai fess a ranar biki.

Na fito ina ƙwala kiran su Rumana Iyam ta leƙo tana shaida min ai da su aka tafi jiya, ta faɗa tana ta ƙare min kallo gami da ƙara cika da mamakina, kicin na koma na aje abincin na su kana na koma ɗaki, ina shiga kuwa na tarar da wayata na ƙara da sauri naje na ɗauka sai dai ganin sunan da ke kan screen ɗin yasa ban ɗaga ba.

"zan yo hayar ƴan daba mu zo gobe".

Maganar ta Safiyya a jiya ta haska min cikin kai, don haka kawai na mayar da wayar na ajiye, na sani Safiyya me matuƙar damuwa da damuwa ta ce, tana kira ne don taji a wanne hali na ke, to sai dai raunin da ke tare da ni ba zai iya ɓoye halin da zuciyata ke ciki ba wanda ko da na faɗi akasin hakan don ɓoyewa za'a ƙaryata ni, kuma ina tsoronta da ta ƙara tambayar adireshin gidana don Safiyya na daga cikin mutanen da ke tabbatar da maganarsu idan sun faɗa, ko bata zo da ƴan daba ba to tabbas zuwanta sai ya haifar da rashin daɗi. Sai bayan kiran ma ya katse na ga ashe tun kusan da na fita ne ta ke kira miscalls goma haka ta bar mini, na shiga message ina duba saƙon da ta turo.

"Beb na kasa yin breakfast, zuciyata taƙi yarda da cewa Nazifi ne zai yi miki kishiya, don Allah ki ɗaga kirana ko ki turo min da address na gidanki, yanzu haka ina shirin baro legos nan da awa ɗaya da mintuna zan shigo kano jirgi zan biyo, kuma don girman Allah ki daina kuka na sanki sarai, am on my way to na zo nayi haukar da zata sa a fasa auren nan yau".

Girgiza kaina kawai nayi ina sauke numfashi a fili na furta Allah ya sanyaya miki. Ina kwance nayi nisa cikin tunani Ummani ta kira ni, Allah sarki uwa muryarta kawai ya shaida min cikin damuwa take, bayan mun gama gaisawa ta tambayeni babu dai wata matsala ko na ce mata ehh babu komai har ma na shaida mata masu tada hatsaniyar basa gidan jiya Yaya Babba ya zo duk ya kora su sai dai ban sani ba ko sai anjima za su zo amma dai yanzu daga ni sai Iyam ne sai baƙin ƙauye mutum uku da suka zo. Sai sannan naji natsuwa ta samu a muryarta tana aduan Allah yasa ma su tsaya a can gidan su yi bikinsu, haka tayi ta min hira duk dan ta ɗebe min kewa, katin wayarta ma ya ƙare kuma babu jimawa ta ƙara kira wai har ta bayar an siyo mata katin ɗari biyu, haka muka ci gaba da wayarmu na shagaltu a labarin rayuwarta da take bani, har sai da taji an fara yi mata warning kana ta ce to ko ta turo min Hindatu da Sa'adatu su tayani zama zuwa yamma sai su dawo na ce mata a'a kar su zo a sami matsala tunda duk suma zuciyarsu a wuya take. Nan ta shiga nanata min da cewa in ƙara haƙuri da kauda kai cikin maganganunta na kwantar da hankali da sa natsuwa da haka mu ka yi sallama.

Wajen sha biyu na rana gida ya fara cika da mutane, ashe biki sosai Iyam ta shirya matsayinta na uwar ango dan har sai da ta kai an wangale gate, waɗanda su ka fara zuwan duk ƴan  uwa ne irin na nesa sai jama'arta na tsohuwar unguwarsu, kan kace kobo gida ya ɗinke da hayaniyar jama'a kace auren fari ne ko kuma zata aurar da ƴar autarta ne. Da kanta ta zo har ɗakina karon farko tun zamanta a gidan tace na sauko na tayata karɓar baƙi kafin ƴaƴanta su zo, bayan fitarta na daɗa gyara jikina tukunna na fita, tunda na sakko ido yayo kaina ni kuwa na mayar da komai ba komai ba kamar yanda mahaifiyata ta ce da ni, don haka cikin fara'a da mutuntawa muka gaggaisa da mutanen da na samu a falo sannan na wuce ɗakin Iyam, can na sameta sunata hidima ita da muƙarrabanta, na ce mata gani me za'ai, tayi min nuni da kulolin abinci tace in ke zuzzubawa ga plate ina kaiwa baƙi. Kamar na juyawata na koma ɗaki ganin an raina min hankali amma haka na daure kawai na shiga buɗe kulolin ina zuzzuba abincin, alala ne da dambu aka yi sai lemon zoɓo da na jinja, idan na zuba kamar faranti biyar sai in ɗauka in je in raba kana na dawo, hidimar baƙin nata dai ta dawo hannuna gaba ɗaya kuma ko kaɗan ban bar wani shaida da za'a karanci ƙunci da kishin da ke danƙare a zuciyata ba balle aji daɗin yaɓa min magana amma a haka ma ban taira ba, don ina jin ƙusƙus ɗin wasu na cewa ko dai ba na son mijin dama ko kuma akwai abunda na ƙulla don haka banza dai ba zan ke wannan sabgogin ba.

Sai da lokacin sallar ƙarfe ɗaya kana na yakice na koma ɗaki, sallah nayi na kishingiɗa ina hutawa don na gaji kam. Lubabatu su ka shigo ɗakin ita da baƙi wanda ta rako, matan abokansa ne da suka yi tasowar yarinta kuma ban yi mamakin ganinsu ba dan dama da su ne mu ke ma'amala ta mutunci tun a tsohuwar unguwarmu, na tarbe su cikin mutunci nasa Lubabatu ta kawo musu abinci duk da ina fargabar kar Iyam ta hana, to da yake taga baƙin sun shafi ɗanta sai ga uban abinci kuwa an hayo da shi, mun yi hira da su sun nuna min kulawa kusan zan ce don su taushe ni ma shi ne maƙudin zuwan nasu ba kamar yanda nayi tunanin ƴan taya murna ba ne kamar yanda na san mazajensu za su taya shi.

Bayan tafiyarsu Iyam tace na zo mu ci gaba da aikin raba abinci ni da Lubabatu, lokacin ƙarfe biyu da rabi a sannan ne Lubabatu ke labarta min ba'a jima da ɗaura auren ba yanzu haka wasu har sun kamo hanyar dawowa, furucin nata yasa gabana faɗuwa da ƙara jin matsananincin kishin Nazifi. ina tsaka da rabon lemo sai ji nayi anwa hannuna muguwar damƙa, na kaikato kaina wajen ganin waye don har ga Allah zatona ma ko su Anty Aisha ne ƴan neman bala'i da hana kwanciyar hankali suka dawo, sai dai me! ware idon da zanyi sai ganin Safiyya na yi, ban san lokacin da na watsar da kayan hannuna ba na ɗago gaba ɗayana na rungumeta cikin murna da jin daɗi sai kuma kuka kamar dama jiransa na ke yi.

Bata ɗago kaina daga kafaɗarta ba ta kama hannuna zamu bar wajen bayan ta buga wani uban tsaki da ni kaina sai da ya shige ni. Sannan na ɗago ina cewa da ita,"bara na ƙarasa rabon nan sai mu je". Wata muguwar harara ta watsa min tana cewa,"ke dai wallahi anyi asararriya, to idan kin ƙarasa Allah ya tsine min, lusarar mace kawai".

Ina kallonta da murmushin ƙarfin hali na ce,"ba wani abu ba ne lokaci guda ne anyi an wuce wurin fa, bara saur...".

Tsawa ta sakar min,"ke dalla rufe min baki idan bassu da hannun ɗauka su mutu ko kuma wanda ya tarasu ya zo ya raba musu, dama ga su nan duk kalar yunwa, muje ni kina ɓata min lokaci".

Ni dai daɗi duk ya cikani nama rasa ya zan kwatanta murnar ganinta nace,"Safiyya ta ya kika zo gidan nan?".

Maimakon amsa tambayata sai ce tayi,"Ina ne ɗakinki?". tayi maganar a zafafe.

"Ɗakina na sama".

Tana riƙe da hannuna muka hau sama, muna shiga ɗaki ta isa ga wadrobe ta buɗe ta ɗauko mayafi ta cillo min,"saka mu je".

"Muje ina?"

"Gidan yankan kai". Ta faɗa tana wurga min harara da ke bayyana tsantsar jin haushina da take yi. Sai kuma ta kama faɗin,"Shashasha kawai mara aji, mijinki na ƙara aure amma saboda rashin sanin ciwon kai ke ce da rabon abinci wa ƴan bikin da ba gayyarki ba, ai wallahi ke dai banza ce ta ajin ƙarshe wacce ta rako mata duniya, to idan tunaninki wannan biyayyar aure ce kike magana ta gaskiya zubarwa da kai daraja ne da neman suna irin na jahilan mata. Su kansu waɗanda ki ka zage kina bawa abinci kallon typical mahaukaciya su ke miki".

Hannuna na ɗora bisa kafaɗarta na ce,"numfasa don Allah, ni wannan abun ba ya damuna don haka kar ki bari kema ya dame ki".

Ta tunkuɗe hannuna,"to ita Jummai cangal ɗin nan ta dawo ta tare naganta a compound tana faman ba da istruction".

Kallonta na ke yi sosai da yanda ƙwayar idonta ta kaɗa tayi jajir, na sauke numfashi na ce,"na faɗa miki ki daina kiranta da wannan sunan ko dan darajar auren ɗanta da na ke".

Ta fusata ta ce,"Ki sa a yanka ni Jummai cangal ba zan fasa faɗa ba".

Tayi maganar tana ɗaga kiran da ya shigo wayarta, tayi sallama tare da cewa,"na je Ummani". Tayi shiru na ɗan wani lokaci kafin ta sake cewa,"insha Allahu Ummani ba za'a sami wata matsala ba, naji faɗanki kuma ba zan saɓa daga nasihar da kika min ba, amin ya Allah".

Ta sauke wayar na ce,"Gidanmu kika je?".

Ta ce,"Ehh da nake ta kiranki kika ƙi ɗauka saboda ga annoba na kiranki sai na nemi waccan fat friend taki ta tura min lambar Ummani, ke ni tsautsayi ne ma ya kai ni gidan don ba a haka na zo garin nan ba. kinga kayan jikin nan nawa sai da naje can na sauya su, da na bacci na zo da hijab ɗin me aiki don ina tashi na kira Baba na ce a yankar min tiket, jiya fa ban iya barci ba Sa'ida ina ji ma jinina ya hau sai na koma zan yi bp. Ummani ce tayi min faɗa da nasiha banda haka da shigowata gidan nan tuni anyi asibiti da kaf zuri'ar Nazifi da wanda ya zo taya su murna, ke kaɗai za ki rage kema ɗin kuma ba haka zan barki ba sai na raunanaki".

Ina murmushi na ce,"Uhmm ke dai ki koyi haƙuri kam, wannan zafin zuciyar taki yay yawa, duk akan wata kishiya ki ɗaga hankali. Ko da yake ni naji daɗi ma sanadinta ga shi Allah ya kawo min ke bayan rabuwar shekaru da yawa".

"Mtssswww Kinga ba doguwar magana na zo muyi ba saka mayafinki mu je".

"Wai sai ce kike in saka mayafi muje, ina zamu? Kuma ai kin san ban tambaya ba".

"To me miji ai na faɗa masa tifa tayi awon gaba da kishiyar uwata zamu wuce asibiti da ke tare dubiya, in kuma yarda ne ba kiyi ba duba kiga". Ta faɗa tana nuna min message, da gaske kam take yi dama ba wani shiri su ke da shi ba don haka duk amsoshin da ya dawo mata da su a gajarce ne kamar yanda itama ta tura masa saƙon kamar tana basa umarni.

Na ce,"To ai bana fita da mayafi kin fi kowa sani, miƙo min hijab".

"Ƙunshe ki da ake da hijab ya zama past Beb, so yafa mayafi mu tafi, a tarihin Amaryar Nazifi da na duba babu saka hijabi idan zata fita a al'amuranta kuma auren Nazifi ba zai sauya ra'ayinta ba, infact ba macen da Namiji zai juya ba ce yanda ya so and tana da mutunci sai dai akwai ji da kai. Duk nayi wannan binciken akanta ne bayan gama wayarmu da ke jiya, mun ma yi waya da ita na karanta mata bani da hankali ko na misƙala zarra har feɗe mutum ina iya yi, kuma gasa fatar na ke nasa ayi masa romon kayarsa ya ci, don haka ta kiyaye taɓa wacca zata shiga gidanta don gatan ta cikin gidan ya fita da kaf abunda ta ke taƙama da shi, sannan ta shirya kurɓan baƙin cikin gidan aurenta domin wanda zata aura annamimi ne".

Mayafin ta dankama min aka muka fita ina kallonta baki sake, ita ta rufe ƙofar tana riƙe da hannuna muka sauka, gabanin zamu fita a falo Iyam ta shiga dakatar da mu da saurin murya. ni na juyo amma Safiyya tsayawa kawai tayi shima kuma dan na tsaya ɗin ne na ruƙota. Iyam ta iso garemu tana faɗin,"ki kaita ina? Ke kuma algunguma gidan uwar wa za ki je".

Buɗar bakin Safiyya zata yi magana nayi saurin saka hannu na rufe bakinta dan na san magana zata yaɓa daidai da tambayar da Iyam tayi. Nayi ƙasa da kaina ina cewa,"zamu je dubiya ne Iyam amma babu jimawa zamu dawo".

"To ba za ki je ba dawo".

Safiyya ta juya ta fuskanceta tace,"Algungumin mijin da take Aure ya bata izinin fita bai kuma ba ta umarnin idan wani ya hanata tafiya ta hanu ba".

Raina ya ɓaci na ce,"wai mene haka Safiyya".

Ta ce,"ba ta haife ni ba haka kuma ba auren ɗanta na ke ba".

Kafin na ƙara wata maganar ta figeni mun yi waje, tunda muka fito bata tanka min ba har muka hau napep tace masa jan bulo second gate, ƙofar S Fari Beauty Saloon ya ajemu, mu ka shiga ciki, wajen ya mtuƙar haɗuwa don sune lamba ɗaya na wajen masu gyaran jikin mata, babban wuri ne na gani na faɗa don suna da reshika wuri wuri a faɗin nigeria, farashinsu kaɗai zai shaida maka ba wajen zuwan ƙanan mata ba ne, sai dai fa duk rashin kuɗinki aka miki gyara sau ɗaya a wurin ba za ki ƙara sha'awar zuwa wani wajen ba gwara kike tarin kuɗi ko da ashirin ashirin ne, wurin na su ba ɓoyayye ba ne kana sauka second gate zaka hasko shagon nasu na kallo Hayfa Furnitures.

Da hannu Safiyya ta tankaɗani gaban me wankin kan tace,"don Allah wanke min kan shashashar nan ya fita kiyi masa desng me kyau irin wanda zai gigita miji".

Me wankewar na dariya ta ce to an gama ranki ya daɗe, ni kaina sai da na yaba da gyaran da akawa kaina ashe gashina haka yake da kyau ban sani ba, bayan an gama gyaran gashin aka yarfa min jan lalle da baƙi, hannayena da ƙafata suka fito shar da su. duk wannan abun da ake fuskar Safiyya a ɗaure don har muka je wani shago a rijiyar zaki ta siya danƙareren less da yaji uban aiki a jikinsa irin wanda ake siyarwa a ɗinke da kuma shadda. Da mamakina naga mun wuce asibiti sai da muka je take gaya min za'a min gwajin haihuwa ne, ai ba ƙaramin daɗi naji ba don dama tuni na ke so naje asibiti a duba ni to amma ban san me zan ce wa Nazifi ba idan zanje ga shi sam bana son masa ƙarya.

Barowarmu asibitin gidan wata Antinta muka wuce, nan ta zaunar da mu da yake sun jima ba su haɗu ba, kuma ni kaina sai naji daɗin zuwan sosai don gaba ɗaya ma sai na mance da batun wani biki a gidana balle kishiyar da za'a min. A wannan zaman ne muka yi hirar yaushe gamo da Safiyya har take shaida min ta fara aiki a babban asibiti, na tayata murna sosai na kuma ji ina ma ni ce a matsayin da take, sai dai ni na riga nayi watsi da damata na tarwatsa mafarkin Abbaana. ina mata maganar aure ta harzuƙa tana cewa ita da aure ai sai yanda taga rayuwa ta ƙarewa Nazifi, ta yanda ta san Allah zai ci uban nata mijin tun anan duniya kafin aje ga lahira, Anti ta shiga mata faɗan cewa ba duka aka taru aka zama ɗaya ba, amma ƴar nan furrr taƙi tace ai tunda Nazifi ya zama ɗan bantan uba to kowa ma zai zama. Ni dai hmm kawai na ke cewa don na rasa abun faɗa kam, sai gabanin magriba kana muka yi haramar tafiya shima sai da na yi mata da gaske da ta ga na miƙe zanyi tafiyata.  Sanda muka koma gida ƴan taron biki duk an watse sai iya gayyarsu, mutan Abuja ma da su ka je ɗaurin aure an dawo don su muka sama a falon, kuma Safiyya bata bani damar tsayawa ba ta figen muka yi sama duk da ina ce mata bari naje ɗakinsa na duba ko ya dawo na masa sannu da zuwa.

Bayan munyi sallar magriba ta buɗe mana ledar gasashshiyar kazar da ta siya a hanya da gurasa da tsire, haka ta tilasta min ci da yawa, ba Safiyya ta tafi ba sai bayan sallar isha'i direban gidan Antinta ya zo ya ɗauketa, ta tafi tana ta roƙona da Allah akan kar na taka ƙafata zuwa ɗakin Nazifi a daren yau sai in har shi ya kawo kansa gare ni. Na so na yi yanda ta ce amma saina kasa natsuwa kwata kwata, haka na sakko jiki a sanyaye cikin raina ina tuna shi fa yanzu ba nawa ba ne ni kaɗai mijin mata biyu ne.

Ko da na shiga ɗakin nasa na same shi kan gado ya miƙe ƙafafu kunnensa maƙale da waya fuskarsa sai washewa take da wani irin murmushi me faɗin gaske, murmushin da ya bayyanar da dukkan hakoransa waje yana ayyana ainihin farin cikin da ruhi da gangar jikinsa su ke ciki. Zama nayi kan kujera daidai da saukar ƙwayar idona akan manya manyan kulolin abinci na gani na faɗa sama da guda biyar, sai kuma farantan da ke shaida har anci abinci tunda ga saura nan da aka bari har da su roman ganda manya manya, ba sai an faɗa ba wannan kam daga gidansu Amaryarsa ya taho da shi. Nayi saurin ɗauke idona a wajen na mayar kansa ina ji zuciyata na tafarfasa, ya ji sallamata haka kuma ya san da shigowar tawa amma tun duba ɗaya da yay min a wulaƙance sai ya watsar, nayi shiru sai a sannan ne na fahimci da wanda yake wayar, Amaryarsa ce tunda gashi nan har yana faɗa mata ba ita kaɗai ce a matse da wayewar gari ba shi kansa ya matsu, hakan yasa na kasa jurewa na miƙe na fita a sanyaye ina mai takaicin rashin zuciya irin tawa, da na bi maganar Safiyya da ban tarar da wannan wulaƙanci da cin fuskar ba, dama ai ba wata tsiyar naje yay min ba bangajiya zan masa na kuma tayasa murna, daren nan kam duk iya satar bacci bai yi nasara a kaina ba, haka nayi ta faman juyi da saƙe saƙe cikin raina har aka yi asuba, kuma sai bayan sallar bacci me nauyi ya kwashe ni.

Bani na farka ba sai ƙarfe goma da rabi, ina tashi nayi wanka na shirya cikin shiga me kyau, sai dai ko mai ban shafa a fuskata ba. Fita nayi na je ɗakin Iyam na gaisheta, ƴaƴan nata duk sun wuce sai Yaya kawai da sauran baƙinta na ƙauye don ko Ummaa ban gani ba, shi kuwa dama ban ma nufi hanyar ɗakinsa ba don gwara na kama kaina kafin ya kuma yaga ni. Yauma kamar jiya ni na gyara falon da yay mugun kaca kaca ka rantse bai taɓa ganin tsintsiya ba, a kaɗan ɗin lokaci wuri yay fes fes, na shiga kitchen dan ɗora abun kari shima nan na taradda shi an kaca kaca da shi an ɓata uban kwanuka, Allah ya gani sam ban iya ƙazanta ba balle na ɗauke kai na ce zan barwa waɗanda suka ɓata su gyara, balle na san ba gyarawar za su yi ba. Na tattara su duka na wanke su, sai bayan na gama na ɗora jallof na cous cous yanda zai isa har dare ban ɗora wani abincin ba, dan ba lallai idan na hau sama ba na sakko yau za su kawo amaryarsu bana son abunda zai ja min ɓacin rai.

Kammala aikina yay daidai da zuwan Safiyya kamar yanda tayi min alƙawari jiya cewar zata dawo yauma ta ɗebe min kewa. Tana ta hararata saboda na sakko nayi aiki muka hau sama, murnar ganinta a yau kam sai yafi min na jiya, saboda tafe take da takardar sakamakon gwajin da aka yi min jiya, wanda ya tabbatar da cewa lafiya ƙalau na ke bani da wata matsala, haihuwa lokacinta ne kawai bai zo ba.

Wannan albishir yasa naji kamar anyi min bushara da aljannah, sai lokacin hankalina ya kwanta don ko sanda Nazifi ya faɗa min cewar lafiya na ke ban yarda ba. Ai kuwa take na kira Ummani na shaida mata itama tayi murna tayi murna tare da adua to Allah ya kawo nan kusa.

Safiyya ce ta zaunar da ni gaban madubi tayi min kwalliya irin ta zamanin nan da ake yi, kasancewar ban taɓa shafa irin su foundation ɗin ba sai nayi wani kyau na masifa hancina ya ƙara tsayi, kayan da ta siya jiya ta damƙa min tace nawa ne, ba rasa suttura nayi ba haka ba rasa suttura masu tsada nayi ba amma sai naji kyautar ta zamar min ta musamman kuma tafi min dukkan sutturun da na ke da, nayi murna sosai, shaddar na saka wadda ta min masifar kyau, tayi min ɗauri na ture kaga tsiya, ni dai duk sai na rasa ma bakin magana don dawowa nayi tamkar bani ba, ashe ban sani ba haka na ke da masifar kyau, dama an ce in kana da kyau ka ƙara da wanka, ai kam adu'a iya adu'a nata zambaɗawa Safiyya tare da fatan ɗorewar amintarmu. Ta kira min Ummansu mu ka gaisa wacca itama ta ɗauki lokaci tana ce min,"Sa'ida kina jina".

Na ce,"Ehh Umma".

Ta ce,"Yauwa to ki buɗe kunne da kyau kiji ni, zama da kishiya ya banbanta da zamanki ke ɗaya da mijinki, duk yanda ki ka kai da danne kishinki wataran sai ranki ya sosu kin bayyana shi, haka sai kin matuƙar kauda kai daga kan rawar kansa, abin da zan ƙara maimaita miki shine ki riƙe adua, kyautatawa, girmamawa, ladabi da biyayya tsakaninki da mijinki da mahaifiyarsa. tsafta da caɓa ado gami da iya narka soyayya kar ki bar wata tayi miki zarra, idan kika riƙe waɗannan abubuwan ba boka babu Malam Sa'ida za ki kama miji a tafin hannu ki bar wata ta sakakken baki. Ina kuma shawartarki da yin tsafatataccen kishi bisa sunna ba tare da kin bi hanyar saɓawa mahallicinki ba, zaman kishi zaman gasa ne don kowaccenku so take tayi abin da zata fifita a wajen miji, don haka ki zauna ki karanta hanyar tattaro hankalin mijinku gare ki a ko da yaushe. Tsakaninki da kishiya gaisawa banda zaƙewar shiga lamuranta ko bata fuskar shiga naki lamuran, da zarar kin bada fuskar hakan rainin wayo zai samu mafaka, Ki kama mutuncinki da darajarki ta yadda cacar baki ko faɗa ba zai haɗaku ba don ba ajin mace da kimarta ba ne yin faɗa da kishiya, faɗa da kishiya shine babban abun kunya ga mace ki kuma janyo miji ya ke miki kallon mara wayewa. iya abin da zan ce miki kenan Allah ba ku zaman lafiya kema kuma ya azurtaki da haihuwa me albarka, ki kwantar da hankalinki komai lokaci ne, kar ki saka damuwa tunda har bincike ya tabbatar da baki da matsalar komai kina da lafiyar da zaki ɗau ciki har ki haife".

Na ce,"in sha Allah Umma za ku sameni mai aiki da nasiharku ba zan bada kunya ba, Na gode Allah ƙara muku lafiya da tsawancin kwana".

Na faɗa ina share hawayena.

Ta ce,"amin yasa na ɗauki jikina wataran. Idan kunyi waya da Mamar taki kyace ina gaisheta".

Muna zaune da Safiyya tana bani labarin irin wahalar da ta sha a karatu ban san ya akai ba kuka ya ƙwace min ba tare da na shirya masa ba, ina faɗa mata ni yanzu ban san ya zan ƙare ba a cikin gidan nan idan har Amaryar ta zo tunda har yana min gorin banda aikin yi kuma ilimina ba na kawo azo aji a gani ba. ga shi yau ina jin na gama karaya akan zan haihu duk da ƙarfafa zuciyata da na ke yi da ƙwarin gwiwar da kowa ke bani, amma ji na ke kaman na tsinke da lamarin don sai na ke ganin binciken likitocin ba haka ba ne. Ta dafa kafaɗata ta shiga kwantar min da hankali akan na daina damuwa sam, shi duk abin da ya faɗa min ya faɗa ne kawai don son ransa da kuma cin zarafi, haihuwa kuma zan haihu lokaci ne.

Turo ƙofar ɗakin yasa muka kai dubanmu ga wajen, Nazifi ya shigo cikin kwalliyarsa da alama fita zai yi, kuma da shigowan nasa kamar dama Safiyya a shirye take sai gani nayi ta ɗauki waya ta kara a kunne tana wayar ƙarya da juya baya karma ta nuna ta san ya shigo, shi kuma ya ƙame kamar an danna masa pause idonsa ko ƙifce babu akaina yana kallona tamkar bai taɓa sanina ba ko kamar yaga sabuwar halitta.

Murya a hankali na ce da shi,"ina kwana".

Maimakon amsa gaisuwar sai ce yay,"baƙuwa muka yi?". Ya faɗa da sigar zolaya saboda adon da yaga na ci.

Na kalle shi naga still kallona ya ke ya kasa sauke idonsa, ba sai ya fito fili ya faɗa ba amma har cikin ransa na yi masa kyau ta yanda ko bai faɗa ba fuskarsa ta faɗa.

"Kin yi kyau sosai, ashe kin iya kwalliya haka".

Hmm kawai na ce ina ce masa,"akwai wani abun ne?".

buɗar bakinsa zai yi magana sai ta maƙale, idonsa ya koma kan Safiyya yana kallonta da matuƙar mamaki kamar yanda nima mamakin ya cika ni ina dubanta laɓɓa a sake, na kasa gane wayar gaske take yi ko dai ta ƙaryan ce.

"Maimuna kema kin girgiza ashe, ni fa sai da na zo na ganewa idona sannan na tabbatar. Ke banda ma dai jaraba irin ta ɗa namiji banga abun da ya gani ya liƙewa wannan abar ba, ina ga farin bleaching ne ya ruɗe shi abinki da ɗan ƙauye da babu wayewa, ko kuma kuɗinta kin san butulu akwai son abin duniya. amma wallahi ba wai don Sa'ida tawa ba ce na rantse da Allah tafi Amaryar komai, indai fagen tsarin kyan halitta ne da cikar surar da namiji zai so to Sa'ida ta mata fintinkau. Sai dai kawai na gaya mata ta dage da adu'a Allah kawai zai saka mata tsakaninta da Nazifi, ke ni na taɓa ganin mutum mara halacci ma irinsa, baiwar Allahn nan ta aureka tun baka da anini kana yawon tura baro haka ta zauna da kai cikin tsanani amma da ya ke dai namiji ƙanin ajali ne kinga ai da yay kuɗi ya juya mata baya har yana ƙaro aure kuma yana faɗa mata haihuwa yake so na ce bar baƙin munafuki ƙarya yake yi algungumi, banda ma zanen ƙaddara ai wallahi Sa'ida ba ajin aurensa ba ce, matar manya ce ba ta ƙanan ƙauyawa da su ka fito gari kwanan ba shima ya sani, sai dai son zuciya irin nasa na butulalle...".

______________________________________

Want the next chapter?

ui.create_a_free_arewapen_account_to_save_progress_unlock_paid_chapters_fol