9

💓MATAR MANYA💓

OUM FATIMA

GAJEREN LABARI

PAGE 9

BISMILLAHIRRAHAMANURRAHIM

Na gama sheƙa amai kenan ina birgima a tsakar ɗaki naji sallamar Mama wacce tasa na ɗago kai don ganin ta inda zata shigo. "Subhanallah Salamatu jikin yayi tsanani ne har haka ?." Mama ta faɗa cikin damuwa tana kamani na tashi zaune da ƙyar ina sauke numfashi.

"Sannu Salma, Allah ya baki lafiya." Suhail ya faɗa tamkar zai saka kuka, tashi Mama tayi ta fita waje tana ƙoƙarin ɗaura ruwan zafi don ta taimaka min in yi wanka kafin mu wuce Asibitin. Fitowa yayi yana cewa "Mama akwai ruwan zafi a plaks ba sai kin ɗaura wani ba." Ya faɗa yana shiga kiching ya ɗauko babban tea plaks ɗin ya bawa Mama.

Ruwan ta haɗa ta kai toilet kafin ta koma ta kamo Salma dake ta lanƙwashewa ta kaita ta taimaka mata tayi wanka da ruwa mai zafi sosai kafin suka fito ta taimaka mata ta saka kaya ta ƙarasa shiryawa, zuwa lokacin Suhail yaje ya taro adai-daita sahu ya ɗaukesu zuwa Asibiti don a dubata a san meke damunta duk da Mama dai ta fahimci ciwon nata amma dai tayi shiru suka nufi Asibitin ko don jikinta da yayi laushi.

Suna zuwa Asibiti ba wani dogon jira aka amsheta aka yi mata duk wasu gwaje-gwajen da suka dace kafin result ya fito likita ya buƙaci ganin waɗanda suka kawo ta. "Masha Allah tana ɗauke da juna biyu yanzu za ayi mata scanning don sanin kwanakin cikin." Likita ya faɗa yana murmushi.

Murmushi Mama tayi tana faɗin "Masha Allah." Yayinda shi kuma Suhail wani mugun shock ya kamashi har bai san lokacin da yace "Ciki kuma Doctor? Juna biyu dai na haihuwa!?." A firgice ba.

"Kwarai kuwa zan iya mata scanning don ka tabbatar da hakan."

Shiru yayi ya kasa cewa komai yayinda Mama ta zuba masa ido tana nazarin sa. "Koda wata matsala ne Suhailu?." Mama ta faɗa tana kallon sa.

"A'a babu wata matsala kawai abin ne yazo min ba zata, farin ciki ne ya sani kaɗuwa abinda ban tsammata ba ne." Ido Mama ta zuba masa tana tantamar abinda ya faɗa ɗin. Yaƙen dole yaci gaba dayi don kar ta gano wani abun amma a cikin zuciyarsa tsananin tsoro, firgici da mamakin al'amarin yake yi. 'idan har Salma na ɗauke da ciki bayan wata mua'amalar aure bata taɓa haɗa suba to kenan cikin waye? Yaushe kuma hakan ta faru?, innalillahi wa inna ilaihirraju'un!." Wannan shine abinda ke yawo a zuciyarsa.

"Zamu iya zuwa don yin scanning ɗin." Doctor ya faɗa, Suhail da yayi nisa a tunani bai jiba har sai da ya mai-maita kafin yace "Ok ok ba matsala." Ita dai Mama ido take bin sa da shi zuciyarta na saƙa mata cewar duk yanda aka yi akwai abinda ke tafiya ba dai-dai ba amma zata binciki Salmar.

Ina kwance a ɗakin da aka saka min ƙarin ruwa suka shigo gaba ɗayansu har Doctor, Suhail na kalla wanda yayi matuƙar ƙoƙarin ɓoye yanayin da zuciyarsa take ciki amma kana kallonsa zaka san baya da cikakkiyar natsuwa. Sai kuma Mama data zuba min ido tana kallo na.

Ƙarin ruwan da dama ya kusa ƙarewa kuma shine na ƙarshe da za'a saka min aka cire Mama ta taimaka min na tashi, kama ni tayi muka tafi ɗakin scanning yayinda zuciyata ta shiga dokawa da ƙarfi ganin an sakani na kwanta a gadon Doctor ya matso da table ɗin da computer ke kai ya shiga saita wa. Rigata yasa na ɗage sama ya shafa min wani abu mai sanyi ya goge kafin ya shiga yawo da na'urar saman shafaffen cikina wanda gaba ɗaya muka ƙurawa na'urar ido, bamu ga komai ba sai wani baƙin ɗigo kwance a mahaifata wanda yasa naji zuciyata ta shiga dokawa da mugun ƙarfi.

Sai da ya gama tsaf ya rubuta komai kafin ya kalli Suhail yace "Cikin yana da sati shida har da kwana uku." Wani dim!!! Naji a kaina wanda yasa na ɗago da sauri na kalli Doctor nace "Ciki? Ni kuma!." Na furta a kiɗime.

"Ke ban son sha-shanci." Mama ta faɗa tana kallona kafin Doctor yace "Itama tayi mamaki ne kamar mai gidan." Takarda ya ɗauka yayi rubutu ya miƙowa Suhail yace "Ga waɗannan magun-gunan tayi amfani dasu, Allah ya bata lafiya."

"Ameen doctor mun gode." Ya faɗa a sanyaye yana amsar takardar.

Tunda na sadda kaina ban ɗago ba sai da Mama ta kamani tana faɗin "Muje ko." Cikin mutuwar jiki na rashin lafiya da kuma fargabar abinda zai faru na tashi muka fito, abin hawa ya taro mana muka nufin gida kowa da abinda yake saƙawa a cikin zuciyarsa.

Koda muka isa shimfiɗa Mama ta min a Palo na kwanta ta zauna ta tsare ni na sha duka magungunan da aka sayo, sallama Suhail ya mata akan zai je ya dawo tace masa babu komai don itama so take ya fita ta samu tayi magana da Salamatun.

Yana fita Mama tace tashi ki zauna muyi magana Salamatu." Ba alamar wasa tayi maganar don haka na tashi da ƙyar ina jingina da filon data saka min a bayana na sadda kai ƙasa naƙi kallonta don gani nake kamar zata gane gaskiyar abinda ke faruwa a idona.

"Akwai abinda ke faruwa ne kike ɓoyewa?." Mama ta tambaya ba alamar wasa. Shiru nayi naƙi kallonta naƙi kuma magana wanda hakan ne ya hasalata ta daka min wata muguwar tsawa tana ce "Salamatu dake nake magana, nace akwai abinda kike ɓoyewa ne? Me yasa kika firgita da jin cewar kina da ciki? Me yasa shima Mijinki ya nuna razana? Akwai abinda kika aikata ne!." Ta faɗa a tsawace.

Wasu irin hawaye ne suka shiga sintiri a saman fuskata da ƙyar na buɗe baki nace "Ba abinda nake ɓoyewa Mama." Na zaɓi na ɓoye mata gaskiya tunda har shi Suhail ɗin ya rufa min asiri bai faɗa mata komai ba mai zai sa ni in tonawa kaina da kaina.

"Ƙarya kike Salamatu baki da gaskiya, ki faɗa min in akwai abinda ba dai-dai ba tun wuri a ɗauki mataki kafin abin yayi munin da ba zai gyaru ba."

"Allah Mama ba komai kawai ban shirya haihuwar yanzu bane." Na mata ƙarya don ɗauke hankalinta daga waccen maganar. Ai kuwa fusata tayi ta wanka min mari ta shiga faɗa ta inda take shiga ba ta nan take fita ba.

"Don Ubanki baki shirya haihuwa yanzu ba sabo da bakya son sa ko? Wato dama akwai abinda kika shirya ko? Tun farko dama ni ban yarda da saukowarki lokaci ɗaya ba sabo da na san taurin kanki, baki shirya haihuwa ba sabo da ba zama kika zo yi ba to ai gashinan Allah ya nuna maki ikonsa kuma ko da wasa naji wata magana ta fito daga wurinki wallahi sai ranki yayi mummunan ɓaci!."

Ni dai tunda ta fara faɗan nake kuka da tunanin ranar da zata gane gaskiya wane irin hali zata shiga, faɗa tayi sosai don har Suhail ya dawo bata yi shiru ba. Haƙuri ya shiga bata tace "Ka bar ni da wannan mara hankalin Suhailu, in banda tsabar rashin hankali dama sai mutum ya shirya haihuwa Allah ke bashi ita." Kallonta yayi yana ayyana cewar haka na faɗa wa Mama kenan.

Shi dai haƙuri yaci gaba da badawa ya aje laidar kayan fruit daya shigo da su ya shige ciki, anan Mama ya yini sai yamma ya mayar da ita gida shima ita ta dage zata tafi kafin ya kaita. Tana zuwa gida ta samu Baba ya dawo daga tafiyar da yayi. "Har kin dawo? yaya kika baro mai jikin?." Baba ya tambaya da kulawa.

"Da sauƙi Malam ka san halin Salamatu idan bata jin daɗi dama ya aka ƙare bare yanzu da yake laulayin ciki mai wahala." Mama ta faɗa lokacin data jawo kujerar tayani gulma irin ta tsakar gida ta zauna, Baba Mari ta ɗago da sauri daga inda take iza wutar abincin dare na sayarwarta tace. "Salamatun har ciki ta samu daga yin aure ko wata biyu ba'a cika ba?."

Duka ido suka zuba mata suna kallon tsabar hassada a idonta na jin da tayi ance Salma ta samu rabo, Baba ne yace "Kaji wani shirme fa don Allah, to idan rabon a kusa yake mai zai hana." Taɓe baki tayi taci gaba da aikinta ba tare da ko Allah ya raba lafiya ta faɗa ba.

"Yaya jikin nata da sauƙi dai ko? Kuma ita kaɗai kika baro?." Baba ya tambayi Mama cike da farin cikin biyayyar da Salamatun tayi masa na kwantar da hankalinta har gashi an samu rabo.

"Eh ai da yake Mijinta na tare da ita, dama cewa nayi da zai yiwu sai a tura mata Zainab tunda laulayin nata mai zafi ne ba abinda take iya yi sai ta ɗan riƙa taya ta wasu ayyukan kafin ta ɗan samu ƙwarin jiki tun da kaga su Sagir ba zai yi suje ba sabo da Maza ne su." Mama ta faɗa tana kallon Baba Mari.

Ai kuwa cikin sauri har tana sakin ludayin da take juya abinci da shi tace "Wannan fa ɗaya babu inda ƴata zata je tayi bauta wallahi ta bar min tallar abincin da da shi nake rufawa kaina asiri ki ma sake tunani."

Shiru sukayi duk suka zuba mata ido saboda yanda ta haƙiƙance tana masifa, sai da tayi shiru sannan Baba yace "Nine Uban Zainab kuma nike iko dake da ita gaba ɗaya don haka gobe Zainab ta shirya zata je gidan ƴar'uwarta ta zauna har taji sauƙi, na gama magana." Masifa Baba Mari taci gaba dayi tana faɗin "Yo ikonka na banza da wofi har ni zaka nunawa iko, sai ka bari sai ka fara sauke nauye-nauyenmu da suke kanka sannan sai kayi ikon damu amma ba dai yanzu da nake cida kaina da ƴa'ƴana ba."

Ba wanda ya ƙara kulata har tayi ta gaji tayi shiru yace dai ya gama magana kuma dole ayi yanda yake so.

Suhail kuwa bayan ya aje Mama kasa komawa yayi gidan sabodakomai zai iya faruwa idan ya koma a wannan lokacin yanda zuciyarsa take masa wani irin zafi da raɗaɗi, mutum ne shi mai tsananin kame kansa daga abinda Allah ya haramta masa da gujewa duk wani abin da ba nasa ba, shi yasa yake da tsananin kishi akan abinda ya zama mallakinsa.

Duk sanda ya tuna cewar wani ne da ban ya riga shi shiga yayi shuka a gonarsa da yake tsananin so fiye da komai a zuciyarsa bayan Iyaye sai yaji zuciyarsa tamkar zata fashe. Gidansu Abokinsa Usman ya nufa duk da sun yi waya baya gida.

Makullin ɗakin Usman ɗin aka bashi ya shiga ya kwanta ya lumshe idonsa ya shiga tunanin mafita game da lamarin nan, a gaskiya yaji matuƙar tsoro da tashin hankali saboda bai taɓa sanin cewa abin na Salma har ya kai haka ba don shi shaida ne akan cewar tana matuƙar tsare mutunci da ƙimarta duk tsananin son duniyarta kuwa. To amma garin ya haka ta faru? Yaushe? Kuma a ina? Waɗannan sune tambayoyin da dole sai ta amsa masa su.

Bai koma gidan ba sai da dare yayi sosai don kusan goma da rabi 10:39pm shima sai da Usman ya matsa masa da tambayar ko lafiya mai ya same shi kafin ya masa sallama ya hau lifan ɗinsa ya tafi gidan zuciyarsa a ƙuntace.

******* Tunda suka fita shida Mama nake sauke ajiyar zuciya yayinda fargaba da tashin hankali da tunanin makomar cikin dake jina da yake amsa sunan mara Uba suka haɗu suka yiwa zuciyata nauyi wanda hakan ya haifar da ƙara rikicewar jikina zazzaɓi ya dawo min sabo ga rashin abincin kirki a cikina don ma kafin Mama ta tafi ta matsa min na sha fruit kuma cikin ikon Allah ban amayar dasu ba.

Zuciyata ta shiga raya min ba tan-tama wannan cikin na Alhaji Murtala dala ne domin abinda ya faru a tsakaninmu saura kwana huɗu bikina ya dawo min a raina. 'Yanzu miye abin yi? Kiran Alhaji zan yi na sanar dashi ko kuwa, a'a a'a bai kamata na kira shi na faɗa masa ba domin in nayi haka tamkar na daɓawa kaina wuƙa ne domin abinda nake ɓoyewar sai ya fito kowa ya sani. To amma idan Suhail fa ya kasa rufa min asiri? To ko dai zuwa zanyi a zubar da cikin kowa ma ya huta?, amma haɗarin dake tattare da zubar da ciki kuma fa?.'

Waɗannan magan-ganu da tarin tambayoyin ne suka yi ta yawo a zuciyata waɗanda na rasa amsoshinsu sai kawai na fashe da kukan rashin samun mafita zuciyata na yimin nauyi a ƙirjina ina jin ba zan iya dakon wannan abin ni kaɗai ba, gashi kuma ko Kairiyya ba zan iya sanar da ita ba duk kusancinmu da ita kuwa.

Kuka na ƙara fashewa da shi ina sabbatu cewa nake "Wannan wace iriyar lukutar masifa ce ta same ni ni Salamatu? Koma miye ya faru Baba ne da Suhail suka ja min, da an barni na auri wanda nake so da duk da ba'a zo wannan matakin ba. Amma saboda kafiyar Baba da azabar nacin Suhail ga abinda ya haifar, ni ban auri mai kuɗin ba gani ɗauke da cikinsa a gidan wani." Kuka naci gaba dayi wanda ya matuƙar galabaitar dani lokaci ɗaya na fita a hayyacina, gashi ni kaɗai a gida sai birgima nake ina kuka ina sabbatu a haka yazo ya same ni....

Oum Fatima

***