Episode 2

*TAURIN KAI*

*ZAHRA ROYAL STAR*

*ROYAL STAR WRITER'S ASSO.......*

PAGE 2

*HANNAH POV*

"Amma ammi dan Allah dan Annabi ya dace Aunty Haja na irin wannan abun da aure akanta?"

Wani kallo Ammi ta juyo tana jefama Hannah shi na tsabar jin haushinta dama cike take da ita ta shigo gidan.

"To wai ke ina ruwanki ne Hannah?, kefa wallahi kin fiye shiga abunda bai shafe ki ba haba"

"Yanzu fisbilillahi Aunty Sa'a kema haka zaki ce?"

Taɓe baki Aunty Sa'a tayi tana gyara zamanta akan kujera ƴar zugunne da take zaune akanta a tsakar gidan nasu.

"Rabu da ita Sa'a wallahi Hannah idan baki fita daga ido ba saina mummunan ɓata miki rai. Ace ayo ki ke kaɗai cikin gidan nan kin fita daban, wai ko dai canza min ke akai a asibiti ne ban sani bane?"

Turo baki Hannah tayi tana kallon Ammi zatai magana Aunty Haja ta shigo cikin gidan.

"Yawwa Ammi kiyi ma wannan ƴar taki gargaɗi na rantse ba ruwanta dani. Bazai yiwu ba ace yarinya ta zo tana ɓata min bajat ba. Shima wannan ƙaton banzar Umar ya zo yana neman ɓata min rai"

"Fatan dai ya baki takardar sakin ki?"

Aunty Sa'a ta faɗa da sauri.

Zama kusa da ita Aunty Haja tayi akan wani turmi tana yaye gyalen data yafa a jikinta ta ce.

"Inafa ɗan wahala, nayi-nayi amma yadda kasan sake zugasa ma nake naƙin sakin nawa"

"Mtsww wallahi sai kin tashi tsaye, ni yanzu ba gashi ba dana na ce zan makasa a kato dole ya biyo ni da tawa takardar ba"

"Uhm ni duk ƙarshenta ba rabuwar daɗi....

"Haba Aunty Haja, anya kuna towa da duk macen data nemi saki a wajan mijinta Ubangiji yana fushi da ita, sana shi sakin kansa idan aka yisa al'arshil Allah girgiza yake fa"

Hannah ta katse Aunty Haja tana faɗin hakan.

Ammi ce ta saki tagumi tana bin Hannah da kallo kawai zuwa can ta kasa haƙuri ta ce.

"Hannah ki kiyaye ni wallahi. Wai ni kam ya ake so nayi da wannan jarababbar ƴar ne?. Ke shikenan duk abunda mutum yayi sai kin kawo wani wa'azi naki?"

"Kuma wallahi Ammi da ace zata waye da sai duk tafi mu samun naira da hutu, amma da yake bagidajiya ce taƙi fahimtar hakan"

"Komi za'a ce min ace min amma bazan taɓa ɗaukar irin wannan rayuwar taku ba wallahi"

"Ai kin mutu a tsiya cen ki kuwa, da wannan saurayin naki Ya Ustaz kuke ce masa ko mi, ba abunda ya aje, shima da kyar yake samu ya ciyar da kansa da ƙannansa. Nifa wallahi kunya ma kike bani, tun wuri Ammi ya kamata ki ɗau matakin rabasu wallahi, kashe mata rayuwa zaiyi kawai"

Wani kalar tashin hankali ne ya ziyarci Hannah dake tsaye har lokacin, dan tasan Ammi dama bata iya abun kanta Yayyan nan nata suna faɗin abu to kuwa sai ta yisa.

Wata hararara Hannah ta ɓallama Maryam data fito daga ɗakin da suke kwana ta nunata tana cewa.

"Aunty Fannah ba ruwanki a ciki, bana son irin haka gaskiya"

"Ai ke kinji matsalarki, ana hango miki makomarki amma kina botsarewa, kika sake kika auri wannan Ya Ustaz ɗin wallahi kinga yadda Ammi ta koma kamar tsohuwar data kusa shekara ɗari ko tamanin haka zaki koma kema"

Fannah ta ƙare maganar tana nuna Ammi dake zaune akan tabarma tana dubansu.

"Kefa Fannah baki da kunya yanzu ni ce na tsufa kamar wacce ta shekara ɗari?. Ai talaucin Ubanku ne ya maida ni hakan nan, shi yasa bazan taɓa bari ku auri irin ubanku ba wallahi. Ita kuma Hannah ɗin ai shi Ustaz ɗin zai zo har ƙofar gidan nan ne ya same ni, da kaina zan fita na gaya masa ya fita harkar ƴata ba sa'ar yinsa bace"

Bubbuga ƙafa Hannah ta fara yi tana son sakin kuka tana cewa.

"Ni dai wallahi Ammi ina sonshi a hakan, a barni dashi, ai ni zan zauna dashi ba wani ba ko?"

Tsintsinyar dake kusa da Ammi ta ɗauka tana jefama Hannah tsintsinyar, sai akan jikinta Ammi cike da fushi ta ce.

"Dalla sakarai kawai, yo dama waye zai zauna miki dashi ɗin ai ke ce, amma bazan bari kiyi mutuwar tsaye ba, kinji na gaya miki. Ni ɓace min da gani ma ko yanzu na tashi na ƙara ɓata miki rai yanzun nan"

Hannah na ƙunƙuni harda wasu guntun hawaye akan fuskarta ta juya tana nufar ɗakinsu tana jin wani irin baƙin cikin kasancewar gidansu irin haka, kuma duk mutuwar Babansu ce yasa Ammi ta koma hakan, da kuma laifin danginsa da nata, da babu ruwansu dasu, tunda ɗan uwansu ya mutu kowa ya daina shiga harkarsu, musababin ƙara taɓarɓarewar gidan nasu kenan, dama kuma gashi can dama haka ƴan gidan nasu suke da son duniya da kuma kyale-kyalen cikinta, mutuwar Mahaifin nasu saita ƙara bauɗe masu tunani. A cikinsu su shidda ita ce auta ƙarshen haihu, daga ita ne Ammi bata sake haihuwa ba har Babansu ya kwanta dama, kuma babu namiji ko ɗaya cikin ƴaƴan nata, duk mata ne.

"Mtsww tana tafiya simi-simi"

"Wai wama ya canza tunaninta ne haka?, ai da a sanina itama idan muka rotsata tana ɗaukar shawara, amma yanzu ta koma Malamar ƙarfi da yaji"

Faɗin Aunty Sa'a.

"Hmm yo waye fa yake hure mata kunnen idan banda Ustaz ɗin nan Malamin Islamiyar da take zuwa duk shine fa. Kuma wallahi Ammi da gaske idan baki raba su ba sai ya tarwatsa mata rayuwa. Yo ni da ace ni keda kyau irin na Hannah hmm wohoho da ansha kallo, wato zan rinƙa ɗaukar hankalin mutane ne na bala'i ma, gata da duk tafi mu kyan jiki dana sura"

Aunty Fannah ta faɗa tana miƙewa ta nufi wata tukunya dake bakin murhu.

"Ai ki barni da ita zata ga matakin da zan ɗauka ne daga ita har shegen Ustaz ɗin nata"

"Wai Ammi dama an cinye tuwon nan?"

Fannah ta faɗa tana dawo da dubanta inda Ammi take zaune.

"Eh wallahi tun cikin dare ma"

"Gaskiya yinwa nake ji fa"

"Ahh shiryawa zakiyi ki fita mana ki samo abincin da zaki ci. Ko kuma idan kinyi sa'a azo miki ƙunshi kin samu nacin abincin, danma baki son yin ƙunshin, kinga kuwa ai kin rinƙa yini da yiwa, ace ayo mutum ya iya sana'ar da zata kawo masa kuɗi koda yaushe amma baya son yi"

"Amma Ammi yanzu fa naga kin shigo da kuɗi a hannunki, ina zaki kai su to?, gaskiya ki fito dasu kawai yau muci daɗi muma"

Wata hararara Ammi ta zafga ma Fannah tana nunata da yatsa ta ce.

"Ashe baki da hankali ban sani ba?, kuɗin dana shigo dasu nake maku tarin kayan ɗaki dana kitchen shine kike sakama ido wato?. To bazan fito dasu ɗin ba. Kuna dai gani dangin uban nan naku idan auren naku ya tashi babu uwar da zasu iya maku, yanzun ma kamar babu su a rayuwarku inaga kuma wata hidima ta taso taku, kuna ganin zasu taimaka ne?. Kowacce ai nasan bata rasa kuɗi a ƙugunta, dan haka ta fitar da ciyar da kanta yawwa"

Aunty Sa'a ce ta girgirza kai tana fiddo da Naira dubu biyu ta kwalama Hannah kira.

Fitowa Hannah tayi tana amsawa da.

"Gani Aunty Sa'a"

"Yawwa jeki nan bayanmu ki sayo garin masara kizo ki ɗora mana abinci, ki sayo duk abunda ya dace, ko dambu ne ki murza mana"

"A dubu biyun Aunty Sa'a?"

"To karda Allah yasa ta isa, inama laifi?, ai nayi ƙoƙari ma, ita kaɗai ce dani na ƙundige na bayar"

"Kinga Hannah amshi kije koma yata kama ki sayo azo ayi haka nan aci"

Cewar Ammi.

Aunty Haja ta tashi tana matsowa kusa da Ammi ta ce.

"Ammi bani kaso na"

"Kamar ya na baki kason ki kuma?"

"Ammi wadda Alhaji ya baki man. Dan ni gaskiya na gaji da cin Masarar nan, kawai ki bani wani daga ciki naba Hannah ta sayo min ko ƴar indomi ce na dafa na ci gaskiya"

"A'a ai ban gane ba, na ɗauka ai kin amso naki kason ko?"

"Ban amso ba Ammi, baccin na gaya miki Umar ne ya zo wajan duk ya ɓata min bajat ba"

"Mtsww ke kika kyale sa ai"

Faɗin Aunty Sa'a cike da jin haushin Umar ɗin. Dan tasan dama da akwai kuɗi a hannun Haja ɗin da yau basa su ci wata masara ba, tana da kyauta, dan ma duk ta fisu sakin kuɗi a gidan, amma dama ka sake kuɗi ya biyo ta hannun Ammi ko za'ai mi bata bada su, ita da kuɗi kamar mi, dan idan zata rabu dasu gani take kamar za'a rabata da ranta ne.

"Gashi nan"

Ammi ta faɗa tana damƙama mata dubu uku a hannu.

Ai sai Haja tabi kuɗin da ido kawai tana mamaki, sanin halin Ammi da kuɗi, sai ta shinye mamakinta kawai, tana amsar kuɗin, tasan ma a hakan da ita ce, kuma ta dalilinta ne aka samo kuɗin, amma baccin hakan tasan bata isa ta bata kamar hakan bama.

Miƙama Hannah tayi kuɗin gaba ɗaya ta ce.

"Ki haɗa da wadda Aunty Sa'a ta bayar, ki sayo shinkafa rabin tiya da wake kwata, sai ɗan cefane, kizo ki ɗora mana dafaduka"

Murmushi kaɗan ta saki tana amsawa da to, dan itama taji daɗi yau dai ba cin tuwo ko garin kwaki ko ƙanzo........