23

    *KOMAI TSANANI* 

             *By*

         *KANSA'U* *BELLO* 

    

   *(OUM FATIMA)* 

🍂🍂🍂🍂🍂🍂🍂🍂

   *PAGE 023* 

 *BISMILLAHIRRAHAMANIRRAHEEM*

     "Zan yi mana Ya Ammar ka san ina ji da kai fa." Anisa ta faɗa tana masa murmushi.

   "Ok Maza ki kira wo ƙawar taki sai a ɗauke mu tare." Ammar ya faɗa yana hango yan da Nanah ke yiwa Yaya Khalid dake tsokanarta shagwaɓa.

   "Lah Ya Ammar ai ƴar gida ce itama grand child ɗin Mamu ce ƴar wajen Uncle Khamis wan da ya rasu, ƙanwar Ya Khalid ce."

   "Ok to maza ki kira ta tazo ayi mana tare." Ammar ya faɗa yana jin daɗin cewa tana da alaƙa dasu Anisa.

   "Ok bari na mata magana." Anisa ta faɗa tana nufar in da Nanah da Khalid suke tsaye yana ɗaukarsu hoto a wayarsa.

   "Ya Khalid kuzo muje can ayi mana hotuna da Ya Ammar." Anisa ta faɗa tana riƙe hannun Nanah. 

   "Ok muje to." Khalid ya faɗa yana kallon Anisa. Ba musu suka ƙarasa wan da tun tahowarsu gaba ɗaya hankali da natsuwar Ammar na kan Nanah ne har Nawal ta lura da hakan ta taɓo Mabaruka ta nuna mata.

   "Ke haba dai sai dai in wani abin yake kallo da ban, amma dai kin san jin kai irin na Yaya Ammar wan da manyan ƴanmata basu ishe sa kallo ba bare waccen ƙwaikar yarinyar da bata jima da fara ƙirgen dangi ba." Mabaruka ce mai wannan maganar tana ƙoƙarin ƙaryata abin da idanunta suka nuna mata. Sai dai ba'a je ko ina ba ta buɗe baki cike da mamaki tana kallon abin da ke faruwa lokacin da su Nanah suka ƙarasa in da Ammar ɗin ke tsaye.

   "Ina yini." Nanah ta furta a hankali tana duƙar da kanta ƙasa sabo da irin kallon da taga wan da Anisa ke kira da Ya Ammar ke yi mata. Murmushi Ammar ya saki ganin yan da ta duƙar da kai taƙi kallon sa, so yake ta kalle san don haka yace.

   "Lafiya lau Maryama (Nanah) ko nayi kuskure." Ai kuwa ɗagowar tayi suka haɗa ido wan da yayi amfani da damar ya sake mata tattausan murmushi yace.

   "Sunana Ammar Mudansir Mai ƙusa da fatan zaki ɗauke ni a matsayin aboki nima kamar yan da kika ɗauki wannan ƙawar taki." Rasa abin faɗa Nanah tayi don haka tayi shiru ba tare data furta komai ba bayan murmushi da tayi masa.

   "Kina da kyau sosai ." Ammar ya faɗa yana kallon fuskarta, kallon juna Anisa da Khalid suka yi kafin suka kuma kallon Ammar daya kasa ɗauke ido a kan Nanah wacce duk tabi ta takura kanta ta kasa sake wa don abu ne da bata saba dashi ba. Ganin hakan ne yasa Khalid yin gyaran murya wan da ya dawo da hankalin ɗin Ammar kansa.

   "Barka da rana Ya Ammar." Khalid ya faɗa yana murmushi don abin da ya gani a idon Ammar ɗin a kan ƙanwarsa ya fara saka sa yin tunanin da akwai wani abin a zuciyar Ammar ɗin a kan ƙanwarsa . Murmushi shima Ammar ɗin ya masa kafin ya bashi hannu suka yi musabiha.

   "Ok ku gyara ayi mana hoton su Abba suna tafe za'a yi na family gaba ɗaya." Ammar ya faɗa yana kallon Nanah.

   "Ok." Duk suka faɗa kafin suka shiga gyara wa. Anisa na ya ƙoƙarin tsaya wa kusa dashi ya ɓalla mata harara ya nuna mata Nanah da ido alamar ta matsa mata. Murmushi Anisa ta saki mamaki na kamata wan da yasa nan take ta ɗora ? A kan Ya Ammar ɗin nata. Da kanta ta tsayar da Nanah kusa dashi ita kuma ta tsaya kusa da Ya Khalid aka shiga kashe musu Camera wan da hotunan suka yi kyau ba kaɗan ba.

    "Kam babbar Bala da rawanin nan! Wace iriyar lukutar masifa ce nake ƙoƙarin gani da rana tsaka ni Mabaruka. Lallai dole ne in yi gaggawar maganin figaggiyar yarinyar can tun kafin ta zame min matsala a soyayyata!." Mabaruka ta faɗa tana jin wani ɗan ƙaramin hauka na ƙoƙarin kamata.

   "Lallai yarinyar can da alama ta samu shiga a wurin Yaya Ammar, abinda kika kasa samu tsawon lokaci." Cewar Nihal tana jima ƴar'uwarta babu daɗi.

   "Ai Wallahi bata isa ba, tayi kaɗan ta shiga tsakanina da Ya Ammar don zan iya nakasata a kan sa!." Mabaruka ta faɗa a fusace tana jin tamkar taje ta shaƙo wuyan Nanah tayi ta jibgarta.

   "Ai duk waccen munafukar Anisar ce take ɗaure mata ƙugu wallahi." Cewar Yusrah da hankalinta ke kan Mooh wan da suka fito tare da abokinsa daga ɓangaren Alhaji Baba.

 ******** A ɓangaren Muhammad kuwa tun da suka fito idanunsa suka sauka a kan Ammar wan da ya zage yana ta yiwa Nanah hira wacce sai dai tayi murmushi kawai don bata san mai zata faɗa masa ba bayan murmushin. Mamakin Ammar sosai ya kama shi, ya rasa lokacin daya koyi duka waɗannan halayen wan da bai san shi dasu ba . Wani mugun tsoki ya saki wan da har sai da sautin sa ya fito fili.

   "To tsaka Sarkin tsoki kai da waye kuma?." Mus'ab ya faɗa yana kallon Mooh wan da ya haɗe fuskar nan tasa mai cike da kwarjini. Banza ya masa bai kula sa ba, sabo da ransa a matuƙar ɓace yake da abin da Ammar ɗin keyi, yo in ban da ma rashin aikin yi da neman raini irin na Ammar, a kan me zai tsare waccen tsakuwar yarinyar ya saki baki kamar wani soko yana mata zance. Kai shifa yana tunanin akwai abinda ya samu Ammar ɗin don dai shi bai san shi da wannan halin ba, dama dai Haidar ne da sauran ba zai yi mamaki ba.

   Kasa wucewa suka yi lokacin da suka zo dai-dai in da suke sai da ya daka ta yace.

  "Kai baka da abin yine ka tsaya kake wannan shirmen a nan?!." Yayi maganar da alamar fushi a muryarsa wanda yake ƙoƙarin controlling nasa. Sosa ƙeya Ammar yayi yace.

  "Dama ina jiran su Abba su ƙaraso ne sai mu shiga ciki Ya Mooh." Kai kawai ya gir-giza ya juya zai wuce dai-dai lokacin Nanah ta buɗe baki tace masa.

   "Ina yini." Ta faɗa ba tare daya kalle sa ba don tsoron sa taji yana kamata ganin yan da ya haɗe rai tamkar zai kai duka. Dakata wa yayi daga tafiyar da yake ƙoƙarin yi wacce tsayuwarsa a gabanta yasa dole ta ɗago ta kalle sa. Abin da yake so kenan dama don haka ya riƙe idanunta da nasa idanun ya ruƙa aika mata da zazzafan kallo mai cike da gargaɗi kafin ya juya ya wuce abinsa.

   "Hammah kazo ayi mana hoto tare mana!." Anisa ta faɗa a shagwaɓe ganin yana ƙoƙarin wucewa bai kulata ba.

   "Ba yanzu ba Auta akwai abin da zan yi yanzu." Ya bata amsa ya juya ya wuce bayan ya amsa gaisuwar da Khalid yayi musu. Ɓata rai Anisa tayi a hankali ta furta.

   "Ina ga dai wani ne ya ɓata wa Hammanah rai yau gaskiya." Shima dai Ammar abin da yazo ransa kenan don Ya Mooh ɗin bai saba masa irin haka ba. A ɓangaren Yusrah kuwa bata samu ƙwarin gwiwar zuwa ko in da Mooh yake ba sai dai kawai ta bishi da mayen kallo mai ɗauke da tsan-tsar soyayyar da take masa kamar yanda sauran ƴanmatan dake wurin suka yi, sai ƙus-ƙus dake tashi a kan haɗuwar guy ɗin da burin da kowa taci a kansa. 

   Ba'a jima ba su Dady suka ƙaraso don haka aka kira kowa dake familyn aka yi musu hotuna tare da amaren kafin kowa ya tafi yaci gaba da shagalinsa.

***** Zaune suke a kyakykyawan Palon da yayi matuƙar tsaruwa da tsari mara hayaniya wan da ya dace da rayuwar nutsatstsen matashin ɗan boko wan da komai nasa yake da tsari da ma'ana, tsaki yake ta dokawa shi kaɗai ba tare da yayi magana ba, wan da yasa abokinsa ya tsare sa da ido kawai yana kallon ikon Allah. 

    Muhammad Ridwan Muhammad Ali mai ƙusa kenan, kyakykyawan matashi mai ji da kyawun fuska da cikar zati na halittar jiki, mai kwarjini da farin jinin al'umma a duk in da ya shiga baga Mazan Baga Matan ba, kowa son sa yake tare da son yin mu'amala dashi.

   Ɗan gata ne wan da Uwa da uba ke matuƙar sonsa, sannan ɗan gaban goshi ne a wurin Kakarsa Mamu wacce ta haifi Mahaifinsa. Haka ma Kakansa Alhaji Muhammad Ali mai ƙusa wan da yaci sunansa kenan, shima yana matuƙar so da ƙaunarsa. Shi ɗin mutumin kirki ne mai tausayin wan da bashi dashi, idan ka cire muskilanci da rashin fara'a wan da yake ɗabi'ar sa tun yana ƙaramin yaro to babu wani abu da za'a soke sa dashi.

  Yana matuƙar so da ƙaunar iyayensa da ƴan'uwansa, musanman ma Mahaifiyarsa da yake tsananin so da ƙauna, tun yana yaro Ammy ta fahimci yaro ne mai ƙulafucin Uwa wan da baya rabuwa da ita ko kaɗan. Duk inda tasa ƙafa yana biye da ita, tun tana goyonsa yake da ƙyuuya sam baya yarda da mutane, ko da yaushe yana hannun Ammy ita kaɗai sai kuma Dady idan yana free. Sai da ya fara wayo ne sannan ya fara yarda da Alhaji Baba da kuma Mamu da a wan can lokacin bata tare dasu, sai dai suna kai mata ziyara akai a kai.

   Lokacin da ya isa sakawa a makaranta da ƙyar aka samu ya saba yake yarda ya zauna shi kaɗai, amma da farko kuka yake yi sosai yace shi dai sai in da Ammy zasu zauna a Class ɗin. Anyi wayo da duk irin dabarar da za'a masa ya ƙi yarda, don haka Dady ya yanke shawarar ɗauko masu koya masa karatu a gida, sai da ya ƙara wayo sosai kafin aka mayar dashi makaranta. Kasancewar yana da sharp brain wacce take ɗauke duk abin da aka koya masa yasa yake da ƙoƙari sosai da mai da hankali. Shi yasa koda aka mayar dashi makaranta bai fara daga ajin farko ba kawai aka saka shi a ajin daya dace da shekarunsa a lokacin.

   Lokacin ɗaya kammala primary Dady yaso kai shi ƙasar waje yayi karatunsa a can amma sam ya ƙi amincewa yace shi ba zai tafi ya bar Ammy ba, dole Dady ya haƙura ya sama masa Makarantar da tafi ko wacce a garin Abuja ya saka shi. Hakan ce ta faru a lokacin daya kammala secondary Dady yayi masa maganar tafiya ƙasar waje don ci gaba da karatunsa a can, nan ma yace sam babu in da zai je shi a nan zai yi karatunsa. A wannan karon ma Dady bai takura masa ba ya sama musu makaranta mai kyau shida abokinsa Mus'ab wan da suka haɗu a Secondary School suke abota, sabo da nacin da Mus'ab ɗin ya riƙa masa har sai da ya fara kula sa. Wan da daga nan ne kuma tasu tazo ɗaya suke mu'amala sosai har iyayensu suka san da abokantakar tasu wacce rabi Mus'ab ne ke haƙuri da halin Muhammad na shariya sakamakon shi yana da surutu sosai da sake wa da jama'a saɓanin Muhammad ɗin. Gab da zasu kammala Secondary ne Allah yayi wa Abban su Mus'ab rasuwa wan da mutuwar ta dake sa ba kaɗan ba, a wannan karon Muhammad ne ya dage wurin kulawa da abokinsa har ya dawo hayyacinsa. Koda suka kammala karatu kuma shi yace Dady ya sama musu makaranta tare.

   Lokacin da suka kammala degree ɗin su aka tura su bautar ƙasa jahar Zamfara, kowa yayi mamaki da amincewar Muhammad kai tsaye ba tare da wata gardama ba. Babu yan da Dady bai yi dashi ba a kan ba sai yayi service ɗin ba amma ya dage a kan zai sauke nauyin sa ya hidimta ma ƙasar sa, Dady yaso yayi magana a dawo dashi nan cikin Abuja yayi Service ɗin amma yace a bar sa zai je in da aka tura sa ɗin. Ba don yana so ba ya amince ya bar su suka tafi tare da Mus'ab wan da aka tura can Kudu amma Dady ya sa aka mayar dasu wuri ɗaya suka tafi.

  Wannan shine silar zuwan su Zamfara in da aka tura su ƙauyen Cigama, wan da a can ne duk abin da ya faru a baya ya faru. Lokacin da suka dawo gida kuma babu ɓata lokaci Dady ya sama masu wata Makaranta mai kyau a London don ɗora master's ɗinsu, ya kuma ce dole sai yaje a wannan karon umarni ne. Bai yi musu ba a wannan karon suka wuce London tare da Mus'ab wan da a yanzu bai fi watanni uku su kammala su tattara su dawo ba, in da zai ci gaba da kula da Kasuwancinsa kamar yanda ya fara domin kuwa tun tuni ya fara ayyuka da manyan Company's dake harkar gine-gine kasancewar sa artists mai zanen gine-gine don abin da ya karanta kenan.

  Wannan kenan.

     "Malam ka ishi mutane da tsoki haka kawai, mai zai hana kaje ka zane wan da ya ɓata maka rai mana ka huce haushinka!." Mus'ab ya faɗa a ƙufule yana hararar Mooh. Harara Mooh ya doka masa yace.

   "Kai baka ga abin da Ammar keyi bane, ya wani saka ƴar ƙaramar yarinya a gaba yana zubar da girmansa. Wai yaushe ma Ammar ya fara wannan shirmen ne?!." Ya ƙare maganar a fusace tamkar Ammar ɗin ne a gaban sa zai hau sa da duka. Sakin baki kawai Mus'ab yayi yana bin sa da kallon mamaki, zuwa can ya furta.

   "Ikon Allah! To kai kuma miye matsalarka da abin da yake yi tun da ba kai ne ka zubar da girman ba?." Wani mugun kallo ya watsa wa Mus'ab wan da yasa dariya ta kama Mus'ab ɗin don bai taba ganin Mooh na irin wannan harararar ba.

   "To ni mai na maka da zaka harareni?, ka sani ko riƙo Ammar ɗin yake don Hausawa sun ce : idan kaga kare yana shin-shina takalmi to ɗauka zai yi."

   "Tashi ka bar ɗakin nan Mus'ab tun kafin in saɓa maka kammani, ya ina faɗa maka abin da ya dace kana kawo min wani shirmen banza. Duka ma yarinyar guda nawa take da har zai yi ƙoƙarin lalata mata tunani ne?, a waɗan nan shekarun nata karatu ne ya dace da ita ba wannan shirmen banzar ba.!." Ya faɗi maganar cikin serious tone wan da ya bawa Mus'ab mamaki sosai don bai san Mooh da shiga abin da bai shafe sa ba.

   "In tambaye ka Mooh?." Mus'ab ya faɗa yana tsare sa da kallo. Bai bashi amsa ba sai ido daya zuba masa alamar yana sauraron sa.

   "Miye alaƙarka da yarinyar nan da kayi ruwa da tsaki a al'amurinta irin haka?." Mus'ab ya faɗa yana tsare sa da ido don jin amsar da zai bashi. Kamar ba zai amsa masa ba sai kuma yace.

   Wai ka san wacece yarinyar can kuwa?." 

   "Sai ka faɗa min." Mus'ab ya faɗa.

   "Ita ce wannan yarinyar wacce wannan tsageran yaron yaso wulakanta wa a wan can ƙauyen da muka taɓa yin service a can!." Ya ƙare maganar yana jin ɗacin abin da ya faru na dawo masa. Shiru Mus'ab yayi zuwa can yace.

    "Kana nufin yarinyar da kasa aka ɗaure waɗan nan yaran a kanta, wacce muka baro ƙauyen da muke service a kanta ba tare da mun kammala ba?."

   "Ƙwarai kuwa." Mooh Ya bashi amsa yana ɗauke kai daga kallon da yake masa......

   Malam Mooh irin wannan haƙiƙacewar haka?.