34

    *KOMAI TSANANI* 

             *By*

         *KANSA'U* *BELLO* 

    

   *(OUM FATIMA)* 

🍂🍂🍂🍂🍂🍂🍂🍂

   *PAGE 034* 

 *BISMILLAHIRRAHAMANIRRAHEEM*

  *Washe gari....*

Washe gari Ya Ammar ya tashi zuciyarsa fes domin ya gama gamsuwa da abinda ya tsara zai yi, don haka tun da wuri ya shirya ko breakfast bai nema ba ya nufi ɓangaren Alhaji Baba ya same sa da maganar hukuncin daya yanke game da nema masa auren Nanah in yaso sai taci gaba da karatun a ɗakinta bayan auren. Koda ya samu Alhaji Baba da maganar bai Musa ba don haka ya ɗaga waya ya kira Alhaji Mudansir, Alhaji Ridwan da kuma Mamu. Yaso ace Ya Khalid ma yana ƙasar ayi maganar dashi amma kasancewar baya ƙasar yasa zaman bai yiwu dashi ba.

    Ba'a jima ba gaba ɗayan su suka amsa kiran Alhaji Baba in da ya bayyana musu buƙatar da Ammar yazo da ita, Mamu ya kalla wacce tayi duƙar da kanta tana jin-jina maganar da Alhaji Baba ya faɗa. 

   "Ni na amincewa Ammar yaci gaba da neman auren yarinyar nan, saboda haka zan wakilta Mudansir da Ridwan su shirya suje can Kano wurin Alhaji Balarabe su nema masa auren ta." Alhaji Baba ya faɗa yana kallon Mamu. Rasa abin faɗa Mamu tayi don ita dai har ga Allah maganar auren Ammar da Nanah bai kwanta mata a rai ba, ba don tana ƙin Ammar ba sai don guje mata irin makircin Inno da kuma izzar Hajiya Basariyya don ta don ta san wace ce ita.

    "Baki ce komai ba Maryama." Alhaji Baba ya kuma faɗa yana kallon Mamu, ajiyar zuciya Mamu ta sauke kafin tace.

   "To ni mai zan ce Alhaji ai duk hukuncin daka yanke bani da ja a kai sai dai in yi fatan alkairi... Sai dai roƙo ɗaya da nake dashi shine ya kamata a sanar da Mahaifiyar yarinyar da ɗan'uwanta halin da ake ciki." Mamu ta faɗa tana tunanin yanda Khalid zai karɓi maganar auren Nanah a yanzu musanman yanda yaci buri a kan karatun ta, a gefe ɗaya kuma mai babban suna wan da yake jin tamkar shine ya haife ta yake da iko da ita fiye da kowa. To amma ba zata iya yiwa Alhaji Baba musu ba don haka ta bar wa Allah komai tabi Nanah da addu'a da fatan alkairi.

   Sun tsayar da magana kan cewar idan Khalid ya dawo za'a sake zama dashi in yaso sai a tsayar da magana a saka rana sai su shirya suje suga Mahaifiyar tasu a sanar da ita batun auren baki ɗaya.

 

******* A ɓangaren Mamah kuwa ita ma da kuɗirin data kwana a ranta ta tashi don haka bata tsaya sanya ba ta tari Alhaji Mudansir da maganar yaje ya nema wa Ammar ɗin auren Suhaima ƴar ƙawarta. Da mamaki Alhaji Mudansir ya kalli Mamah jin abinda tazo dashi yace.

    "Shi Ammar ne yace aje a nema masa auren Suhaiman?." Ya mata tambayar yana tsare ta da ido sabo da sarai ya san halin ta. Shiru ta ɗan yi kafin ta dake tace.

   "Nice naga ya dace a nema masa auren ayi a wuce wurin tun da Suhaiman yarinyar kirki ce bata da wata matsala, kuma sun riga sun dai-daita kan su." Ta ƙare maganar cike da fatan kar yaja maganar da nisa. Gyara zama Alhaji Mudansir yayi ya dube ta da kyau yace.

   "Ita kuma yarinyar daya je ya roƙi Alhaji Baba ya nema masa aurenta fa?... Ko dai biyu yake son ya aura ne?." Ya ƙare maganar da sigar tambaya. Wata mummunar faɗuwar gaba ce ta ziyarci Mamah lokaci ɗaya zufa ta fara tsats-tsafo mata tsabar ɓacin rai, wato Ammar bai ji duk irin jan kunnen data yi masa ba a kan waccen tsinanniyar yarinyar da a kanta ya nuna mata bata isa ba. Wato zagaye wa yayi ya samu Alhaji Baba a kan ya nema masa auren ta. To kuwa in dai ita ce tayi cikinsa ta haife sa ba zai taɓa auren yarinyar can ba har abada.

   "Lafiyar ki kuwa?." Alhaji Mudansir ya tambaya ganin yanda take haɗa gumi.

   "Shi Ammar ɗin da kansa yace a nema masa auren waccen yarinyar?." Ta mayar masa da tambaya maimakon amsa.

   "Kina da matsala da hakan ne?." Shima Alhaji Mudansir ya mayar mata da tambaya.

   "Ƙwarai kuwa don ban amince masa ba, kuma matuƙar nice na haife sa to ba zai auri waccen yarinyar ba Suhaima zai aura." Mamah ta faɗa kanta tsaye. Cikin ɓacin rai Alhaji Mudansir yace.

   "Ai kuwa baki isa Mahaifina ya yanke hukunci ki hana ba domin dake da Ammar ɗin dani duk ya isa damu." Fuuu!! Ta miƙe ta fice ba tare data tanka komai ba, kai tsaye kuma ɓangaren Inno ta nufa.

***** A ɓangaren Ya Ammar kuwa koda yaje wurin aiki hankalinsa bai kwanta ba sai da ya kira Alhaji Baba ya tambaye sa a kan yanda ake ciki, Alhaji Baba ya sanar masa ya kwantar da hankalinsa babu wan da zai hana sa auren wacce yake so, da Ya Khalid ya dawo zasu haɗu aje a nema masa aurenta. Farin ciki tamkar zai kar sa haka yayi ta masa godiya.

   Yana katse kiran ya mayar da akalar kiran nasa ga Nanah don ya raba farin cikin da yake ciki tare da ita. Tana zaune saman dinning tana breakfast ita kaɗai tana amsa wayar Anisa dake sanar mata ta shirya da wuri zasu je gidan su Aunty Noorah budurwar Hammah Mooh wacce ta roƙi suje ɗin kiran Ya Ammar ɗin ya shigo.

   "Sorry Sis zan amsa kiran Ya Ammar, i will call you later." Nanah ta faɗa wa Anisa, tana kammala faɗa ta katse kiran Nata don ta san tsokana ce zata biyo baya.

    "Ina cikin farin ciki masoyiya." Ya Ammar ya furta yana jin ta ɗaga wayar.

   "Masha Allah, naji daɗi da kasancewar hakan Ya Ammar." Nanah ta furta a hankali

   "Kin san me?." Ya tambaye ta cike da ɗoki. Shagwaɓe murya tayi ƙasa-ƙasa tace.

   "Sai ka faɗa min mana."

    "Alhaji Baba, Abba, Dady da Mamu duk sun amince za'a je a nema min auren ki a wurin Abban Kano idan an kammala bikin Hammah Mooh!." Ya ƙare maganar cikin tsananin farin ciki. Haka kawai faɗuwar gaba ta ziyarci Nanah da jin maganar aure kai tsaye. Kasa shiru tayi sai da tace.

   "Aure kuma Ya Ammar?... Ni ɗin?." Ta faɗi maganar a kunnen Hammah Mooh da shigowarsa kenan zai gaishe da Mamu ya tsinci kalaman data furta wanda suka buga zuciyarsa da matuƙar ƙarfi.

   A ɓangaren Ya Ammar kuwa sanyi jikinsa yayi jin yanda ta furta maganar, don haka cikin sanyin jiki yace.

   "Ƙwarai aure zamu yi masoyiya."

   "Ya Ammar ai ban isa aure ba yanzu, ka manta cewa yanzu ma zan fara karatu." Nanah ta faɗa da iya gaskiyarta.

   "Ban manta ba masoyiya zaki yi duk irin karatun da kike so a ɗakin ki, amma dole ayi gaggawar ɗaura mana aure tun kan a samu nasarar raba ni dake abun da ba zan iya jurewa ba." Jin tayi shiru bata ce komai ba yasa shi cewa.

   "Wai ko dai bakya sona ne?." Yayi mata tambayar gabansa na faɗuwa da fargaban amsar da zata bashi. Ajiyar zuciya ta sauke a hankali tace.

   "Ba haka bane Ya Ammar ina sonka sosai mana, ni kai kaɗai na taɓa so ma a matsayin masoyi saboda kai ne mutumin daka nuna min tsan-tsar soyayya a duniya bayan Mama da Ya Khalid ɗina. Kai ne ka koya min yanda zan soka Ya Ammar, amma ka sani ban shirya yin aure a yanzu ba sabo da ina da muradin da nake son cimma wa." Ta furta maganar cikin sanyin murya, don har ga Allah bata da lissafin aure a yanzu. Babban burin da take dashi shine tayi karatu ta inganta rayuwarta ta zama irin Nanar da tayi wa Mmanta alƙawari, so take ta samu cikakkiyar dama da ƴancin da zata koma ƙauyen Cigama ta tsaya tsayin daka ta kuɓutar da Mahaifiyarta da ƙanenta daga ƙaddararriyar rayuwar da suke ciki wacce idan ta tuno yanda ta rayu a baya abin yake taɓa ta. Bata yi aune ba lokacin data faɗa soyayyar Ya Ammar, sai dai duk da cewa tana son sa ba zata bari soyayyar ta hana ta cimma muradinta ba.

   Wani irin runtse ido Mooh yayi yana jin tamkar an ɗauki wani ƙaton dutse an danne masa ƙirjinsa dashi, wai ma yaushe ne aka yi zama aka yanke hukuncin aurar masa da amanar sa ba tare da sani ko amincewarsa ba. 

    A ɓangaren Ammar kuwa wani musulmin daɗi yaji jin kalaman ta a kansa na soyayya, sai da jikinsa yayi sanyi da kalaman ta na gujewa aurensa a yanzu. Don haka ya shiga jaddada mata soyayyarsa a gare ta da irin kulawar da zai bata, kamar an ce ta ɗago idanunta suka sauka a fuskar Hammah Mooh wacce tayi jajir da ɓacin rai. Tsoro taji ya kamata ganin yanayin fuskarsa don haka cikin daburcewa tace.

   "Barka da safiya Hammah." Ta faɗa a hankali tana satar kallonsa. Bai amsa ba sai kallo daya tsare fuskarta dashi tasa fuskar babu alamar sassauci, bata san lokacin data datse kiran da Ammar ba cikin hanzari ta miƙe ta bar dining ɗin zuwa ɗakinta. Sai da ta ɓace ma ganinsa sannan ya runtse ido da ƙarfi ya dunƙule hannayensa ya kaiwa iska naushi, ɗakin Mamu ya nufa don jin ba'asin abin da ke faruwa.

    Saman abin sallah ya same ta ta gama sallar walha tana lazumi, bakin gado ya zauna ya dafe kansa daya masa nauyi sosai. Sai da Mamu ta kammala addu'o'inta sannan ta juyo ta fuskance sa, ta lura cewa akwai abin da ke damun Muhammad ɗin don duk da kasancewarsa dama ba mai sakin fuska ba amma yanzu abin yafi nada, duk lokacin data tambaye shi abinda ke damunsa sai ya bata uzurin aiki.

   "Mai babban suna." Mamu ta kira sunansa da kulawa. A nutse ya ɗago risunannun idanunsa waɗanda suka sauya launi ya zuba mata su yana amsa wa.

   "Wani abu na damunka ne?." Tayi masa tambayar da kulawa sosai sabo da akwai shaƙuwa a tsakaninsu, tamkar ba zai ce komai ba sai kuma ya buɗe baki a nutse yace.

   "Yaushe aka yanke hukuncin aurar da ita ba tare da sanina ba?... Yaushe ta isa auren wai da za'a yanke wannan hukuncin?..." Ya ƙare maganar yana kallon fuskarta. Har ga Allah ita Mamu bata gane wa yake nufi ba don haka tace.

   "Wai a kan wa kake magana ne?." Ji yayi kamar ya fasa kuka don gani yake tamkar Mamu tana sani tayi masa tambayar. 

 

   "Nanahh!!!." Ya furta sunan da wani irin sauti. Shiru Mamu tayi tana nazarinsa don ta jima da ɗora masa alamar tambaya a kan takwarar ta, shi kuma ganin tayi shiru tana kallonsa yasa ransa fara ɓaci don haka ya miƙe a fusace zai fice a ɗakin, da sauri ta riƙo hannunsa ta zaunar da shi.

   "Yi hƙuri ka zauna in maka bayani." Zaman yayi ran nan a ɓace abin har yana bawa Mamu mamaki, bayani tayi masa a kan halin da ake ciki da kuma matakin da Alhaji Baba ya ɗauka.

   "Wannan ba hujja bace da zai sa a lalata ma yarinya gobenta, kin san tana da burin yin karatun nan kuma nayi alƙawarin kulawa da ita da tsaya mata a kan komai. Don haka zata yi karatu sosai kamar yanda take buƙata, maganar aure a ajiye ta a gefe." Yana kammala faɗa ya miƙe ya fice ya bar Mamu da baki a buɗe da mamakin ikon da yake nuna wa a kan Nanah.

   Nanah kuwa tana shiga ɗaki kiran Ya Khalid ya shigo wayarta, wasu ƙwallar kewarsa ne suka ciko mata ido. Hannu ta saka ta goge idon sannan ta amsa wayar.

   "Ya Khalid???." Ta kira sunansa a shagwaɓe.

   "Lilyn Ya Khalid, me ya faru ne?." Yayi mata tambayar jin muryarta da alamar damuwa.

   "Babu komai kawai nayi kewar ka ne."

   "Kin tabbata babu abin da yake damunki?." Yayi mata tambayar da tsananin kulawar da yake mata.

   "Eh Ya Khalid yaushe zaka dawo?." Tayi masa tambayar don kawar da wacce yayi mata.

  "Cikin Next week in sha Allah, kin san zan dawo bikin Hammah Mooh." Ya bata amsa, sai da gabanta ya faɗi jin ya ambaci sunansa da maganar aurensa. Hira suka yi sosai cike da soyayya da shaƙuwar dake tsakaninsu kafin suka ajiyar wayar cike da kewar juna.

    A ɓangaren Ya Ammar kuwa yana ta magana yaji shiru, sai kuma yaji kiran ya katse. Bai kawo komai ba yayi tunanin ko wani uzurin ne ya kama ta, don haka ya barshi a kan in ya dawo zai zo ya same ta suyi maganar.

 *Hammah Mooh....*

     Yana fita daga ɓangaren Mamu in da driver da Pa ɗinsa ke jiransa ya nufa aka buɗe masa ya shiga motsr suka wuce, kai tsaye katafaren Company *M.M Master* *Mind Design and Build* suka nufa......