CHAPTER 21

*HARAMTACCIYAR GADA.*

_*{Haɗuwar rayuka da ƙaddara ta tattara wuri guda.*🔥💔}_

*NA*

*HAFSAT MUSTAPHA ('Yar Mutan Naija).*

*SADAUKARWA GA UWARƊAKI NA: HAJIYA ZAINAB AHMAD (Hajiya Mama). Amincin Allah da ni'imominsa su tabbata a gareki Uwata.*

*BOOK 1*

    

 *Page 21.*

Sai da su Yallabai suka shige ɗakin da aka kwantar da Saffy kafin Jidda ta waigo ta dire idanunta a kan kofa, sai sauke numfarfashi take, tana ji kamar zata shiɗe.

Cikin ƙarfin hali ta ja jiki zuwa kan doguwar bench da ke nan kusa da ita ta zauna sannan ta haɗe cinyoyinta ta kifa kanta a kai.

Saffy na ganin shigowar tawagar mutane ta yi saurin miƙewa zaune, idanunta ya sauka kan Yallabai. Ƙirjinta ya yi wani irin ɗokawa, nan take tsananin kwarjininsa yasa ta ji gaba ɗaya tana neman rasa natsuwarta.

Dakyar ta samu ta daidaita natsuwarta, kamar wacce aka tsikara da allura ta miƙe da sauri ta jawo hijabinta tana ƙoƙarin sanyawa, a lokaci ɗaya firirin hancinta na shaƙar daɗaɗar kamshin tsadaddun turarukansu masu sanyi daya baɗe ko ina.

A karo na biyu ta sake kai kallonta garesu.

"Sannunku da zuwa."

Ta furta sannan ta saddar da kai kasa sabida wani irin kwarjinin Yallabai da ke neman kashe mata ido.

Abokansa, Alhaji Nasir da sauran su ne suka amsa mata cikin fara'a suna tambayar jikinta, amma shi Yallabai uffan bai ce ba sai kura idon da ya yi kan ɗinkin da aka mata, nan take ya ji wani sabon tausayinta ya ɗarsu a ransa.

Su Alhaji Nasir suka zauna kan doguwar kujeran da Saffy ta tashi akai, shi kuma Yallabai sai daya kwashi mintina kusan biyar kafin ya jawo stool da Chef Ali ya ajje masa sannan ya zauna yana sauke ajiyar zuciya wannan karon kansa a kasa. Dakyar ya iya kai hannu ya zare farin glasses ɗinsa sannan ya sake ɗaga kai ya sauke jikakkun idanunsa a kanta.

"Baiwar Allah ki yafe ni, I'm sorry you went through all this because of me."

Abun mamaki ruwan hawaye ya balle kan fuskar Yallabai. Abun ya ba Alhaji Nasir da sauran abokansa mamaki matuƙa, domin duk wanda ya san Yallabai ya san ba kowane abu ne ke iya karya masa zuciya har ya zubar da hawaye ba.

Saffy ta buɗe baki za tayi magana amma ta kasa sabida kukan data ji yana neman taso mata, hakan yasa ta zaɓi yin shiru.

Ganin kamar babu hanki a tare dashi yasa ta nufi inda tissue paper yake, ta ɗanyi rolling sannan ta yanka ta nufe shi ta miƙa masa.

Ɗagowa ya yi yana kallonta.

Ta ce"Karɓi ka share hawayenka, ina so dani da kai mu ɗauka cewa abin da ya same ni muƙaddari ne daga Allah."

Sosai ta burge abokansa, shi kansa ya ji daɗin yarda da tayi da ƙaddara.

Dr. Anderson, likitan dake kula da lafiyanta ne ya yi gyaran murna bayan ya lura da yanayin da duk suka shiga don itama ƙwalla ne cike idanunta amma gudun kar su gane yasa take sa tissue tana sharewa da wayau.

Ya dubi Yallabai ya ce"Ranka ya daɗe kana so ka mayar mana da aiki baya fa, ji bi yadda kake sa patient ɗinmu zubar hawaye." 

Ya furta yana dariya, kowa ma dariyan ya yi har Saffy. Daga haka likita ya fita ya bar su.

Dr. Haseeb ya ce"Daddy da gaske fa so kake ka mayar mana da aiki baya." Ya faɗa a wasance.

Yallabai ya murmusa ya ce"Haseeb, ku yi hakuri kowannemu na da yadda yake ji a ransa ne."

Su Alhaji Nasir suka ce"Haka ne, Allah dai ya kiyaye gaba." Aka amsa da "Ameen."

Dr. Haseeb ya musu sallama don akwai wani aiki da ke gabansa kuma jiransa ake.

Saffy ta dube shi ta ce"Thank you so much sir."

Haseeb ya murmusa ya ce"You are welcome ma! Allah ya ƙara miki lafiya ya kuma kiyaye gaba."

Ta amsa da "Ameen." Daga haka yasa kai ya bar ɗakin gashi har zuwa wannan lokacin Saffy bata san cewa shi mijin Samha, uwarɗakinsu bane.

Ko da Dr. Haseeb ya fita, sam bai gane cewa Jidda ke zaune ba saboda hankalinsa baya wajenta, yana tunanin aikin da zai yi ne.

Dariyarsu da Jidda keta ji sosai ya ƙara daga hankalinta, sai ta ji kamar ta faɗa ɗakin domin ta ga abin da ke faruwa. Haka dai ta dunga tausar kanta don already ta riga ta kai wuya, ɗauriya kawai take, haka kawai take ji a jikinta Saffy na neman ƙwace mata secret husband ɗinta. 

Har Dr. Haseeb ya fito ya tafi bata sani ba saboda ta dukar da kai, zuciyarta na tafarfasa. Bata san cewa tana da zafin kishi ba sai yau.

Fitowar su Alhaji Nasir ne yasa tayi saurin ɗagowa a tsorace don bata tsammaci fitowarsu da wuri haka ba. Sun gama dubiyarsu sannan suka sallami abokinsu suka fito sabida zuwa su kama harkokin gabansu.

Idanun Alhaji Nasir direct a kan Jidda ya sauka, yanayinta ya tabbatar masa da lallai tana cikin damuwa. Duk kusancinsa da Yallabai bai san cewa ya yi auren sirri ba. Abin dai an yi shi ne a ɓoye kamar yadda Jiddan taso.

Har sauran sun yi gaba, shi ya ja da baya yana

"Baiwar Allah lafiya kike kuka kuwa?"

Ita sam bata ma fahimci cewar hawaye idanunta ke tsiyayar wa ba sai da ya yi magana a sannan ta ankara. Gabanta ya yi wani irin bugawa da ƙarfi, da sauri ta kai bayan hannu tana goge fuskarta, da disasshiyar murya ta ce"Ba komai, lafiya lau nake."

"Lafiya ce za tasa mutum zubar hawaye haka? Duk wanda ya ganki ya san kina cikin damuwa."

Ganin zai addabeta da tambayoyi yasa tayi maza ta ce"Ina tausayin halin da yar'uwata take ciki ne har ban san idanuna na tsiyayar da hawaye ba."

"kina nufin yarinyar da aka illata a fuska da ke kwance a wannan ɗakin?"

Da sauri ta daga masa kai "Eh, yar'uwata ce."

Kuka ya ci mugun ƙarfinta wanda ita kaɗai tasan ainihin abin da ke damunta bayan Allahn daya halicce ta, amma wani zai yi tunanin ko tsananin tausayin Saffy ne yasata wannan kukan.

Cike da tausayawa Alhaji Nasir ya rausayar da kai ya ce "Yi hakuri ki bar kukan nan, haka Allah ya ƙaddara mata, fatanmu a yanzu Allah ya bata lafiya."

"Ameen." Ta furta dakyar. 

Kuka ne tayi shi kasa-kasa amma sosai ya taɓa Alhaji Nasir, sauran abokan da suka fahimci kamar baya biye dasu suka waiwayo, nan suka gan shi tsaye kusa da Jidda har ma yana ƙoƙarin buɗe jakar kudinsa da zai kai banki ya yi deposit na kuɗin kasuwancinsa. Ya sa hannu ya ciro bandir ɗaya ya mika mata.

"Ga wannan ba yawa dubu ɗari biyu ce kwa ƙara a kuɗin magani, I'm sorry na baki cash instead of transfer." Ya furta yana ɗan murmushi.

Bin hannunsa da ke rike da bandir ɗin kudin Jidda ta yi da kallo bakinta sake. Ba wai bata saba riƙe kudin daya ci uwar wannan bane, ita dai kawai mamaki take na irin ɗaukakar da Saffy ta samu a lokaci ɗaya wajen Yallabai da mutanensa. 

Dole yasa tayi zargin akwai wani abu tsakaninsu amma koma menene ya faru ita ta ja ma kanta tunda ita taki bari ya bayyanawa kowa ita sabida tsananin gudun abin da zai biyo baya take.

Ganin tana ɓata masa lokaci ga abokansa na jira yasa ya dire bandir ɗin kudin a gefenta.

"Allah ya bata lafiya."

Ya faɗa sannan ya yi gaba ya sami sauran, suke tambayarsa ko ita wacece? Ya yi musu bayanin cewa ai yar'uwar Safiyya ce.

A can ɗaki bayan fitar su Alhaji Nasir, Yallabai ya bi Chef Ali da kallo na yadda yake addana ledoji na kayan dubiyan da su Alhaji Nasir suka kawo, carton na madarar gwangwani, carton na malt sai kuma kayan marmari. Ita kanta Saffy sai mamakin irin wannan ɗaukakar da ta samu take, ga can kuma waje an ba Jidda kuɗi duk sabida ita amma bata sani ba.

Idan ta tuna cewa wai Yallabai ne mutumin da suke tare a daren jiya har suka samu saɓani kafin mahaukaciyar matarsa ta bayyana ta illatata sai kawai ta murmusa.

Mutumin da take ta admiring, mutumin da take burin zama ma'aikaciya a gidan abincinsa har Muwadda ke mata yanga har tana gindaya mata wani sharaɗin banza, sai gashi wai shine a gabanta yana fuskantarta. 

Ta samu damar ganinsa a saukake, amma fa gaskiya ne ganinsa kam sai an shirya, tunda kafin ta samu wannan damar sai da aka kusa hallakata. 

Duk da dai ta wahala matuka, kuma ba haka aka so ba amma kuma sosai tayi farin cikin ganin wani abin ya yi sanadin ganinsa a kusa da ita. Kuma irin ɗaukakar da ya yi mata yasa har take jin a ranta laifin matarsa a wajenta ya ragu amma duk da haka sai tasa ta gane cewa ita ɗin 'yar iska ce ta bugawa a allon sha.

Sai ta tabbatar ta koya mata darasin da ko nan gaba akace tayi ma wata makamancin abin da tayi mata, za ta ji tsoron aikatawa.

Bayan Chef Ali ya gama addana komai, Yallabai ya murmusa ya ce"Weldone Aliyu! Aikinka na kyau, Allah ya saka muku da alheri." 

Chef Ali ya ce"Ka cancanci ayi maka fiye da wannan hidima Ranka ya daɗe."

Sai a yanzu Yallabai yake tuna Jidda, ya manta dazu da suka yi waya tace masa tana asibitin, duk da ya zo yaga sakon data turo masa kan illata Saffy amma bai ɗauki abin serious ba.

"Ina Alkhairi?"

Ya yi tambaya yana kallon Chef Ali kasancewar yasan haka yake kiranta. 

Chef Ali ya ɗan susa kai ya ce" Tana waje, ni na hanata shigowa ganin da tawagarka kazo and again ina tsoro kar wani abin ya sameta tunda ita aka so cutarwa amma mistakenly tsautsayi ya faɗa a kan ita wannan."

Ajiyar zuciya Yallabai ya sauke ya ce"Karka damu babu abin da zai sake faruwa in sha Allah, je ka bata izinin shigowa."

"Ok sir"

Bayan fitarsa Yallabai ya dubi confused Saffy da tayi shiru tana tunani don ta fahimci ita wacce ake kira da Alkhairin ne aka so cutarwa sai tsautsayi ya faɗa kanta.

Jidda na jin cewa Yallabai ya bata izinin shiga, da sauri ta miƙe riƙe da bandir na kuɗin da Alhaji Nasir ya bata. Amma kafin ta shiga ɗakin sai ta jefa kuɗin cikin jaka.

Da sauri ta shige har tana bangaje Chef Ali da ke tsaye bakin ƙofa, ya yi maza ya daka tsalle ya koma gefe.

Chef Ali ya girgiza kai yana "Allah sarki ita dai wannan haka kawai na ji ina tsananin tausayinta." 

Bai koma ciki ba ya zauna kan bencin da ta tashi sabida ya basu damar ganawa a tsanake. Chef Sam ya tafi karɓo lunch na rana koda Yallabai yazo bai same shi ba.

Daga bakin kofa Jidda ta tsaya tana kallonsu, ita dole so take ta karanci yanayin kowanne amma ta kasa gane komai.

Saffy na ganinta ta washe hakora don zuwan Yallabai yasa gaba ɗaya ta manta da wata Jidda. Shigowarta yasa ta tuna cewa tunda ta fita waya bata komo ciki ba.

"Meet my sister Yaya Jidda."

Saffy ta faɗa tana murmushi idanunta kan Jidda da ta maida kofa ta rufe a hankali.

Tun kan ta karaso wajensu ta ga Yallabai ya yi murmushi ya ce" Ni kuma meet my khair, ita ce wacce kika ji na bada izinin ta shigo."

Zumbur! Ta miƙe tsaye tana "Tohhh! Yaya Jidda fa? Dama ita ce alkhairin taka?"

"Kwarai kuwa! sai dai naga kamar baki da sanin kakkafar alakar da ke tsakaninmu tunda abin sirri ne kuma ita taso a ɓoye."

Saffy ta haɗiye abin da ya tokare maƙoshinta kan tace"Ko kai ne ta faɗa min kunyi auren sirri da shi amma naki yarda da zancen?"

Kafaɗunsa ya daga yace"Ban ma san kun tattauna da ita akan hakan ba, kuma ni dai ba zaki ji mutuwar sarki a bakina ba. Ba don abu haka ya faru da ke ba, bazan zauna anan ina fayyace miki komai ba."

Saffy na kokarin magana, Jidda tayi saurin daka mata tsawa" Safiyya ya isheki haka da musayar yawu da kike da mijina, i think i have tolerated enough. Tabbas shine mutumin da kika gani kwanaki a gidana har na faɗa miki cewa munyi auren sirri da shi amma kika ki yarda."

Gaba ɗaya jikin Saffy ya mutu, tsananin mamaki ma ya hanata magana.

"I want to address something clear."

Duk suka zuba mishi ido suna jiran abin da zai ce. Sai daya kwashi kusan 40secs sannan ya fara magana.

"Jidda zan sake faɗa a gaban yarinyar nan, ba nemanta nake ba don na ga kin ɗauki lamarin da zafi har da turo min text da ba sai na bayyana abin da kika turo ba."

Yaki faɗar abin da ta turo saboda baya so ya haddasa rikici a tsakaninsu.

Nan ya kwashe labarin haɗuwarsu da Safiyya, abin da ya faru tsakaninsu har zuwa kan illar da matarsa tayi mata, sai a sannan Jidda ta iya sauke wata sassanyar ajiyar zuciya.

Sai da Yallabai yasa Chef Ali ya shigo sannan yake gaya musu an ci su Haj. Nafeesa taran miliyan ɗaya da rabi, don haka idan an sallameta sai taje polis station tasa hannu sannan ta karba kuɗin tare da wani nata.

A ƙarshe ya ɗora da"Ni kuma zan bada 2m sabida a kaina tsautsayin nan ya sameta. Idan an haɗa duka ya kama milyan uku da rabi, nasan in sha Allah zasu isa kula da lafiyarta."

Tuni Saffy ta manta da halin da take ciki, Cike da farin ciki ta duka har kasa ta fashe da kuka tana godiya"Ranka ya daɗe Wannan ai kudin sana'a ka bani, nagode kwarai da wannan lukutin kyautar da kuma tsaya min da kayi ka ƙwato min hakkina, Really appreciate you sir."

Murmusawa kawai ya yi yana mamakin yadda ta nuna tsananin farin cikinta a kan kudin, kuma ambaton yin amfani da kudin tayi sana'a ya matukar birgeshi, ko da gani yarinyar za taso dogara da kanta.

"Yaya ki tayani godiya."

Jidda da tuni tayi mutuwar tsaye tayi saurin dawowa hayyacinta don ba karamin mamaki ne yake neman sumar da ita nan tsaye ba.

"An gode, Allah ya saka da alheri."Ta faɗa ba tare da ta dubi inda yake ba, a lokacin ta nemi wuri ta zauna don ji take kafafunta ba zai iya ci gaba da ɗaukarta ba.

Kamar daga sama ta ji ya ce"To, ke kuma wani kyautar zaki ma yar'uwar taki tunda a kanki aka cutar da ita?"

Yallabai ya fahimci babu wata dangantaka ta jini data haɗasu shiyasa Jidda ke nuna kishi. A ganinsa kawai yar'uwa ce da bariki ta haɗa su.

Jidda ta yi ƙoƙarin ɗanne zuciyarta jin wani abu na neman taso mata, ba tare da wani dogon tunani ba ta buɗe jakarta ta zaro bandir na kudin da Alhaji Nasir ya bayar, dama dai tana da niyyar bata haƙƙinta amma tunda ya kasance so ake itama ta fitar da wani abin ta bayar, kishin daya turnike zuciyarta yasa ta ji sam ba zata iya cire ko ficika ta kaɗa ma Safiyya ba.

Miƙewa tayi ta dire 200k ɗin a gefen Saffy ta ce"Tunda ƙaramin ƙarfi gareni, ga 200k nan kiyi maneji, Allah ya ƙara lafiya ya kuma kiyaye gaba."

Wato a maimakon ta nuna kuɗi ne daga Alhaji Nasir, sai kawai ta nuna taimakonta kenan. Saffy ta mata godiya sosai.

Suna nan sai ga Jami'ai biyu da aka turo domin duba jikin Saffy. Sai da zasu wuce ɗaya daga cikinsu ya ce"Idan aka sallameki kina iya zuwa ki karɓi haƙƙinki na kuɗin da aka haɗa miki tare da wani naki."

Godiya ta musu kamar ta goyasu tsabar farin ciki.

Babu jimawa Yallabai ya bar asibitin, duk da Jidda taso su sake ƙebancewa amma bai bata fuska ba.

Likita dai ya tabbatar da nan da kwana biyu za a iya bata sallama, amma sannu a hankali ciwon zai warke, sai dai fa akwai alamun zai bar mata taɓo, hakan ya ƙara daga hankalin Saffy da kuma jin a ranta dole ta ɗau fansa, haka nan ba zata taɓa barin Haj. Nafeesa ta tafi free ba.

******

Samha na biyan kuɗin taranta ta bar station a gurguje don ta je tayi magana da CP a waya domin yasa baki a sake mahaifiyarta. Ita sam bata ma zaci za a ƙarbi kuɗin tara a hannunsu, ita duk a tunaninta tsabar ƙarfin connection da take da shi zai sa komai yazo musu da sauki.

Sai gashi sauƙin da aka samu kawai shine sassautawa Mummy hukuncinta da akayi, wato ba a yanke mata hukuncin zuwa gidan gyara hali ba illa tarar da kawai aka cita. 

Sai dai kuma duk wannan namijin ƙoƙarin da Samha tayi akansu, sam Mummy taki shiga taitayinta, gani take kamar sun riga sun kubuta har take iya kallon tsakiyar idon DPO tana gaggaya masa magana son ranta, gashi yanzu ta bashi haushi yasa an mayar da ita cell. Ta bar Samha da wahalar neman mafita kuma dole dai CP ɗin zata sake kira kuma tasan sai ya bukaci a ƙara masa wani ihsanin kafin ya kuma tabuka wani abin.

Ga kuɗin da za a bashi ɗin ma duk a cikin aljihunta zai fita, ga ɗan sandan daya taimaka musu suka yi magana da CP a waya, shi ma sunyi alƙawarin biyansa bayan sunyi free, ta san kuma Mummy ba biya za tayi ba duk ita za tayi settling ɗinsa don Mummy akwai ta da kiyashin cire kuɗi.

Tana nan tsaye bakin titi tana neman ɗan sahu da zai kaita gida tunda an sallami direba daga aikinsa.

Daga bayanta ta ji ance"Malama ina zuwa? Kin manta ki biya ni haƙƙina?"

Tana juyowa tayi ido biyu da wannan ɗan sandan da suka yi amfani da wayarsa wajen kiran Cp.  Sai a lokacin ta tuna cewa ba a bashi haƙƙinsa ba.

"Dan girman Allah kayi hakuri na sha'afa ne, amma meye amfanin lambar waya dana baka? Sabida ka nemeni ne tunda bai dace muyi maganar haƙƙinka anan ba gudun shiga matsala."

Sai a lokacin ya tuna da cewar ta bashi lambar waya da zai sameta tun a daren jiya daya gama musu aiki.

Hakuri ya bata sannan ya juya da sauri ya koma cikin station.

Wucewarsa keda wuya, ta samu ɗan sahu dayake hankalinta a tsananin tashe yake, ko tsayawa tantance yanayin keken ba tayi ba ta afka ciki.

Sai da suka fara tafiya take gaya masa inda zata sauka, gidanta take so ta wuce direct, duk da taso zuwa gidansu ta kwashi kayanta amma sai taga rashin dacewar hakan, maganar fitowar Mummy ake a yanzu amma dole sai ta isa gida sannan ta nemi CP a waya.

Sun yi nisa sosai har ta fara jin daɗin iskar da ke bugarta, nan da nan bacci ya fara ƙoƙarin fizgarta, kawai sai ta ji an ɗan tabota ana"Hajiya mun iso inda zaki sauka."

A gigice ta buɗe ido amma kafin ta kai ga magana kawai ta ji an shaƙa mata abu a hanci, daga nan bata sake sanin inda kanta yake ba.

Matashin da ke zaune tare da ita a baya ya kwanto ta jikinsa yana faɗin "Alhamdulillah yau ta shiga hannu, kai kira mana Don KB."  Yake gayawa mai tukin adaidaitan.

Bai yi wata wata ba ya zaro wayarsa ya latso Don KB, hannunsa ɗaya na tuki ɗayan kuma riƙe da waya.

Yana dagawa ya ce" Oga kace alhamdulillah."

Murmushi Don KB ya yi ya ce" Menene ya faru?"

"Kai dai kace alhamdulillah."

"To alhamdulillah."

"Yauwa! Yau dai fafatuka ya ƙare don yau Allah ya bamu sa'a Samha ta shiga hannu."

"Kai haba don Allah da gaske kake?"

Don KB ya faɗa har da daka tsallen murna.

"Maganar da nake maka yanzu haka tana hannu, akwai wani jami'i da muka samu haɗin kansa ya bamu tabbacin za a sallami ita Samha a yau amma ban da mahaifiyarta. Shi ne tana fitowa station, muka ga bata samu abin hawa ba sai muka ja keke wajenta kuma cikin sa'a sai ta shiga kasan ba wayo gareta ba, bamu tsaya ɓata lokaci ba muka shaƙa mata hankerchief daka bamu."

"Wow! Good job, yanzu ku kaita wannan gidan, nima gani nan tafe zan sameku a can."

"Toh Ok."

Ya kashe wayarsa sannan ya ƙara gudun adaidaitan.

Bayan gama wayarsu, DON KB ya fashe da wani irin mugun dariya yana murza two colour beard ɗinsa, sai da ya yi dariya mai isarsa sannan ya gimtse fuska ya ce"Samha yau kin shiga hannu kuma wallahi sai kin biya bashi. Zan tabbatar da na ɗauki fansa a kan rayuwar 'yata da kika lalata."

_kayyasa! Ana wata ga wata, wanene kuma DON KB? Wacece 'yar tasa dake rayuwa a GIDAN MATA?Kuma wani fansa yake ikrarin zai ɗauka kan rayuwarta da aka lalata?_

_Jama'a Saffy ta ɗaukaka fa🤣 ku tayani lissafin nawa ta samu. Tsakanin ita da Haj. Nafeesa wa zai yi nasara?_

**Gobe free page zai ƙare in sha Allah.**