Pg10

Jin kaurin mutumin da ta rungume ya fi kaurin ɗan talili Khalid yasa ta shiga shafa shi dan ta tabbatar Khalid ɗinne ko ba shi ba ne ,amma sai taji wannan fa da ta rungume ba Khalid ba ne dan haka cikin sauri ta janye tare da buɗe idanunta fes suka sauka akan mus'ab da tun da ta riƙesa yaji wani irin dum,saboda jin kalmar da ya fi riƙeta a wancan lokacin(baffanaa ya ce Ni matar wannan ɗan birnin ce ya ce kar na kula kowa in ba ɗan birnina ba dan haka duk wanda ya ce muku yana so na kuce masa Ni matar dan birni ce).

"Yeee bata kamani ba daddy ta kama, daddy tunda an kama ka kaine zaka nemo mu yanzu" cewar Khalid da ya fito daga maɓoyarsa ya hango aminatu riƙe da daddynsa, harara MUS'AB ya watsawa Khalid kafin cikin muryarsa me ɗan kauri da amo ya ce " me ya hanaka zuwa daukar karatu?".

Rufe fuskarsa yayi yana ɗan raɓe_raɓe na marasa gaskiya,aminatu kuwa tamkar an dasata a gurin ko motsawa ta kasa yi, tunda take babu wani mutum da ta taɓa jin shakkarsa sai wannan santalelen mutum dake gabanta, gaba ɗaya ya cika wajen da wani irin kwarjininsa ,duk hayaniyar aminatu sai gata tsaf a nutse a gabansa tana faman farfara idanunta da take jin suna ƙoƙarin rufewa.

"Ke kika hanasa zuwa karatu ko?" Muryar mus'ab ta katse mata yar ruɗewar da ta shiga, abinda ya zame mata al'ada tayi wato TURO bakinta amma bata iya cewa kome ba sai haɗiye zancanta da ta yi a can makoshinta,muryarsa ta kuma ratsawa ta cikin kunnuwanta, "ki wuce kuje tare daga yau tare zaku dinga ɗaukar karatu"daga haka yayi gaba cikin natsatstsen takunsa,binsa ta yi da kallo a ranta tana cewa da ace na taba ganin fuskar ɗan birnina da tabbas zan iya cewa wannan shine, Khalid ne ya kama hannunta yana cewa muje kin san daddyna bai yarda da ƙin zuwa islamiyya ba,idan bamuje ba zamu fuskanci kalar hukuncinsa"kamar kanwarsa haka yajata suka nufi wajen karatun.

Dama malam sani tuni an sanar dashi ya samu ƙarin daliba, dan haka cike da ƙwarin gwiwa ya shiga maimaita musu ƙarin dan suhaima tuni ya gama da ita ta wuce gida tunda ba waje ɗaya suke da Khalid ba,kasancewar yanzu ƙarin Khalid yake yi sai bai damu da wasan da aminatu take yi ba,bai juyo kanta ba har sai da ya gama da Khalid sannan ya ɗauko mata ƙarinta tun daga qulhuwallahu wato suratul iklas.

Malam sani ya maimaita wa aminatu ƙarin yafi sau dubu amma ita ba ta shi take yi ba, dan abu daya bata tsaya ta fuskanta ba bare ta iya,tsumagiyarsa ya ɗauka ya ɗan kai mata bugu yana cewa "maza biya min ko na zane ki a wajennan"cikin mamaki aminatu ta ke dubansa kafin ta buɗe baki ta ce "me zan biya maka kuma?"shima cikin mamakinta ya ce "karatun da nayi miki yanzu shi zaki biya dan na ga gaba ɗaya hankalinki baya kaina yana wajen wasanki"cikin ƙunƙuni aminatu ta ce "aradun Allah ban iya wannan karatun naka Ni ba haka Malam buba yake mana ba,ya za a yi na iya bayan ka haɗe murya ka tsuketa kamar zaka yi amai ni gaskiya ba zan iya ba idan kana so na iya sai kayi min irin na malam buba", tana gama fadin haka ta miƙe zata gudu aiko malam sani ya ce bai san wannan zance ba dan haka ya ɗauki tsumagiyarsa yabi aminatu da tayi hanyar gida da gudu.

A hankali cikin yanayinta na izza ta fito daga motar bayan malam jauro ya buɗe mata,kallon ƙasƙanci ta watsa masa kafin ta ƙarbe takardun da ya ɗauko zai bita dasu ta yi gaba ba tare da ta nemi rakiyarsa ba yau,tana tafe tana duba fayals ɗin dan akwai aiki me muhimmanci da zata yi da su a gida, takaddu ne na manyan kudaɗe, kun san dai mutuniyar taku bata wasa da duk a binda ya danganci shigowar kuɗi.babu zato su kayi wani mugun karo da aminatu da malam sani ya biyo da tsumagiya, gaba ɗaya takardun suka tarwatse wasu ma sun yage saboda yadda aminatu ta gabjeta da ƙarfi kamar ma harda hannu Aminu ta ƙara tana sane, "kan bura ubannan Ni zaki yiwa akuyanci irin naku na ƴan riga, wallahi yau dai ba zan ɗauki asarar nan ta bangaren mahaukaciya dabba kamarki ba dole sai kin biya asarar nan da kika yi min da farashi me girma".

Malam sani na ganin haka yayi sun sum ya koma da baya dan duk wanda yake mu amala da gidan yasan wacece zahida da irin rashin mutuncinta da yadda ta maida talaka tamkar kashi,aminatu kuwa bin takardun da ake kira sai ta biya da farashi me girma ta yi da kallo kafin ta ɗauke kanta daga kansu, ta maida gun zahida ,ta ce "wai takardun zan biya tab Allah ya kiyaye takardar da muke kaiwa me ƙosai ta bamu ƙosai shine yau ake nuna min tana da muhimmanci?" Cikin fushi da harzuƙa me haɗe da wani irin tsana me tsanani Dr zahida ta nufi aminatu dan yau bata jin akwai abinda zai dakatar da ita daga sabawa yarinyar nan kamanni,da gudu aminatu ta shige falon zahida ta mara mata baya tana zaginta ta uwa ta uba tamkar yar gidan maguzawa.

Dai dai mus'ab yana fitowa daga sashen Abby, ji yayi kawai an cukumeshi ta baya.

Da ƙarfi aminatu ta kuma ruƙunƙumesa tana cewa ɗan birni temakeni zata ƙwada min rodi kasheni zata yi" wata irin kara zahida ta saka saboda ganin yadda aminatu ta riƙe mijinta da take so take kishi kamar rai da rayuwa, a rayuwar zahida ko Nana bata so taga ta dafa kan mus'ab bare kuma wata banza kucaka yar ƙauye,take taji numfashi ta na sama da ƙasa yana fizga kamar za a zare shi.

Ihun ta yasa duka mutanen gidan fitowa kowa ya yi curko curko yana kallonta tana jan numfashi kamar zata mutu,Nana ce dubi mus ab da yake tsaye kamar an dasashi da aminatu da har yansu take rike dashi tana ta faman cusa fuskarta a mararshi da neman ɗauki matarsa zata kasheta.

A hankali ya fesar da iskar da ta cika bakinsa sannan ya fara kokarin raba aminatu da jikinsa, amma da zarar aminatu ta ɗago kanta taga zahida a wajen tan nuna ta da yatsa bakinta na rawa sai kuma maida kanta jikinsa tana kuma maƙalƙesa tamkar mayan ƙarfe.

Abby ne ka ɗai ya fuskanci abinda ke rikita zahida dan haka cikin nutsuwa ya kama hannunta tare da zaunar da ita ya bata ruwa tasha, sannan ya shiga tambayarta me ke faruwa?" Cikin wani irin gunjin kuka ta nuna aminatu da mus'ab da ya gaji da tsayuwar ya jingina jikin bango sai hakan ya kuma bawa aminatu damar kwanciya ajikinsa kamar ta samu gadon bononon innawuro."kalli fa Abby idan waccen matsiyaciyar yarinyar bata rabu da jikin daddyn Khalid ba to tabbas zan mutu amma ba zan mutu Ni kadai ba sai dai mu tafi tare da ita shegiya matsiyaciya me idanun Mayu",jin abinda ta ce yasa aminatu ta saki mus'ab wanda sai a lokacin ta fahimci abinda ta aikata, cike da tsoro ta kallesa ta ce" nifa ba ƴar iska ba ce matarka ta ke son kasheni Shi yasa na rike ka" ,daga haka ta yi gaba abinta, shi ɗin ma wucewarsa yayi dan ba zai iya ci gaba da sauraren shirmen zahida ba.

Kuka zahida ta Kuma fashewa dashi ganin sun maidata mahaukaciya, cikin kukan ta ce "wallahi Abby na tsani yarinyar nan ji nake kamar na kasheta bana son ganinta dan dai zama da ita ya zame min dole ne amma da tuni na kaɗata rigarsu"lallashinta Abby ya ci gaba da yi har dai ya samu ta daina kukan ta kuma yi haƙuri da dukan aminatu da tasha alwashin yi.

Aminatu kai tsaye kiching ta nufa wajen larai,"Inna larai bari na zo nayi miki tabin gihiri", ta fada tana buɗe tukunyar da taga larai ta sauke,larai ta ce "a'a boɗɗo se dai kizo ki koya,shi girkin nana ba sai an ɗanɗana ba da ɗanɗanonsa yazo, da wannan jan maganar da kike ma ai gwara kizo kiching ɗin ki dinga koyar girkin da zaki yiwa ɗan birnin naki tun dai kin san su gayu ba zai barsu su ci abincin ƙauye ba",to zan dinga koya cewar aminatu tana fakar idanun larai ta kamfaci gishirin da ta gani a roba ta zuba, larai na juyowa ta fake da juya mata miyar tana cewa "kai gaskiya larai miyar nan ta zuba daɗi yau su oh oh za a sha daɗi dan ga dukkan alamu bata wasa da ciki dan ga tanan a dunƙule kamar kayan wanki",

Dariya larai ta yi tana zuba miyar a cikin kuloli,aminatu ce ta tayata suka jera komai a kan dinnin daga nan ta taya ta suka gyara kiching din.larai ta ce to sai ki daure kije kiyi wanka tunda ɗazu baki yi ba" wai larai in ruwanki da wanka na ne na ce miki wannan dadar wankan sati biyu ta yi min jiya dan haka ba zan ƙara yi ba sai na yi dauɗa", riƙe baki larai tayi ba tare da ta iya cewa komai ba sai bin aminatu da kallo har ta bar kiching ɗin.

Ƙa idar gidan ce in dai mutum yana gidan sai ya fito anci abinci dashi, shi yasa babba da yaro zaka gansa a dinning room ko da mutum ba zai ci ba sai ya zauna a cewar Anne Shi yake kara sawa a fahimci juna idan wani yana da wata damuwa a lokacin za a gano shi a taimaka masa da abinda ya kamata,shi yasa duk iyayin zahida dole take aje jin kanta ta fito zaman cin abinci ,yanzu ma duk yadda take cikin damuwa sai da ta fito cin abincin, dake ita ba ta wasa wajen zubi.

Kowa ya hallara sai oga me gayya mai aiki ake jira.

A hankali yake saukowa daga upstairs ɗin jikinsa sanye da ash ɗin jallabiya me asalin kyau da tsada, sumar nan tasa a kwance a luf luf fuskarsa ta yi fayau kana kallonsa zaka san cewa ya samu nutsuwar zuciya saboda Allah ya kawo masa abinda yake hanasa nutsuwar har gida, Ba tare da yasha wata wahala ba.

Yana zama suhaima ta fara yin saven ɗinsu kamar yadda suka saba.

Aminatu na laɓe daga can corridon da zai maida kai ɗakinsu tana leƙensu, babu lomar wand take so tagani sai ta zahida, muguwa yau albarkacinki kowa sai ya ci gishiri".

Kamar haɗin baki a tare suka fara kai lomar abincin bakinsu,sai gashi daga wanda yake yin kakarin amai sai wanda yake furzarwa,zahida kuwa har da su amai ta je ta yi a sink din dinning room,mus'ab kuwa runtse idanunsa yayi bayan ya zuba abincin bakin nasa a tissue, gaba daya abincin suka zubawa idanu baran ma Nana da ita tayi girkin Kuma tasan lafiya ƙalau ta baro kiching ɗin, koma dai meye to sai dai in bayn barowarta kiching din ya faru,a tare suka shiga ƙwalawa larai kira, karma zahida ta taji labari da dama jiran ƙiris take yi,da gudu larai ta karaso jikinta na rawa saboda yadda tag zahida na watsa mata kallon rashin mutunci.

"Me ya kawo gishiri cikin abincinmu yau kuma?"Anne ta tambayi larai cikin tsarewar gira,bakin larai har rawa yake wajen rantsuwa da fadin cewa bata san ya a kayi ba dan babu kowa a kiching ɗin daga ita sai aminatu ne suka shirya abincin,salati Anne ta saka zahida ta ce" kanbala'i ashe tsuguno bata ƙare ba yau mun ɗebowa kanmu annoba ai da jin wannan batu ma kun san wace ce ke son kashe mu a gidan nan",

Kai tsaye zahida ta nufi dakin su aminatu tana kunfar baki kamar zata aro wani bakin,daga dukkan alamu dai yau me ƙwatar aminatu hannun zahida sai ya shirya.dan yadda ta ke a fusacen nan babu wanda ya isa ya iya dakatar da ita daga sumar da aminatu.