020
*MAI ƊAKI...!*
Fitattubiyar
©️ *Nana Haleema.*
*Book 1*
*Page 20*
Washe gari Ibrahim bai bi ta kan Fiddausi ba fita yayi tun safe kai tsaye gidan su ya nufa duk da suna da nisa amma a k’asa yaje sabida zuciyar sa gabadaya babu dad’i a haka ya kwana ya tashi komai ya tsaya masa baya Jin dad’in komai. Har baya so ayi masa magana sabida abinda yake ji a zuciyar sa baya son bud’e bakin sa. Da sallama ya shiga gidan su ya tarar da Hajiya a zaune a kan kujera a tsakar gida Jin maganar sa ya saka ta dago kai ta amsa tace, “A’a ibrahim kaine yau da safe?.” Murmushi yayi ya k’araso ya zauna a kan tabarmar da take kusa da Hajiyan yace, “Barka da safiya Hajiya.”
“Barka dai, ka tashi lafiya? ya wajan su Fiddausin?.”
“Lafiya lau.”
“Baka tafi wajan aikin ba?.”
“Bana Jin dad’i sai zuwa anjima.” Hajiya ta kalle shi tace, “naga ka fad’a kuwa fuskar ka ta nuna alamun rashin Jin dadi. Amma ka sanar da mai gidan naku baza ka samu damar zuwa ba?.”
Ibrahim yace, “zan fad’a masa.” Hajiya tace, “Ya kamata dai ka fad’a masa.” Ya kalli tsakar gidan ganin baiga giftawar kannen sa ba yace, “Ina Fadima da Sadik naji gidan shiru?.” Hajiya tace, “Fadima na aike ta gidan ka ta mayar da Amir ya koma gaban Babar sa tayi kara da yawa ai kar ya zama an cutar da ita, shi kuma Sadik ya tafi siyo min gawayi.”
Ibrahim yace, “Meyasa aka mayar da Amir din yanzu?.” Hajiya tace, “Haba kai kuwa kwanan sa nawa a nan din? Ai gwara a kai mata shi itama ko babu komai in baka nan zata dinga jin mostin sa a kusa da ita.” K’arar bude kofar band’aki ya saka ya kalli wajan yaga Mariya ta fito yace, “Ke kuwa zuwa da safe?.”
Ta ajjiye butar hannun ta tace, “Kaima kazo balle ni?.” Murmushi yayi kawai Hajiya tana ta bin sa da kallo ganin yayi shiru sai tace, “Ko zaka sha kunu? Dazu na dama.” Ya daga kai Hajiya ta kalli Mariya tace, “Taimaka ki kawo masa yana madafa a kwanon sha, sai dai yayi sanyi.” Mariya ta tashi ta d’auko ta kawo masa had’e d a kofi ya bud’e yana zuba yana sha.
“Salama alaikum” Fadima ta fad’a tana shigowa ita da Amir. A guje Amir yayo wajan Ibrahim yana fad’in, “Abba oyoyo” ya fad’a jikin sa shima ya rik’e shi yana murmushi yace, “Dan gidan Hajiya.” Mariya tace, “Ya kuka dawo da Amir din?.” Fadima ta zauna tace, “Mun je gidan muna ta bugawa ba’a bud’e ba sai Maman Zainab din nan makociyar ta tace ai ta fita yanzun nan aka d’auka ta a mota.”
Daidai lokacin Ibrahim ya kai kofin kunun bakin sa bai san lokacin da kofin ya kusa sub’ucewa ba kunun ya dan zuba a gaban rigar sa ya kalli Fadima kafin yayi magana Mariya tace, “Daman bata gıda da ka fito? Ta fad’a Tana kallon sa.
Dakyar ya daidaita nutsuwar sa yace, “jiya tace min zata je unguwa daman yau, na manta shaf sai yanzu.” Zuba masa ido Hajiya tayi Tana kallon sa kafin ta d’auke kai tace, “Anjima da daddare a kawo shi to.” Da sauri yace, “A’a Hajiya a kyale shi kawai, yana jin dad’in zama a nan d’in ya koma nan gaba.” Hajiya bata tanka ba dan ta hango matsala a zamantakewar auren d’an nata ko a yanayin sa ya gwada haka.
Fadima ya kalla yace, “Bani ruwa da tsumma a goge kunun nan da ya zube min.” Ta tashi ta kawo ya goge Amir na kusa dashi ya tashi tsaye ya saka hannu aljihu ya dauko dubu biyu ya ajjiye gaban Hajiya yace, “Hajiya a k’ara a siyi wani abun, na wuce wajan aiki.” Hajiya tace, “Kace baka jin dadi kuma.”
“Zan lallab’a naje kawai.”
“To Allah ya kiyaye, Allah yayi maka albarka ya k’ara arzuki” ya amsa da amin ya fita jiki a sanyaye.
Yana fita Mariya tace, “kin tabbatar da abinda nake fada miki ko Hajiya? Yarinyar nan ta jima tana fita bata fad’a masa ba, sau da dama zamu yi magana dashi nace zanje yace tana gıda babu inda zata je in naje naga bata nan, yau gashi a gaban ki kin tabbatar.” Hajiya ta kalli Amir da yake gefe sai ta fasa magana ta tashi ta shiga d’aki sai kuwa Amir ya mik’e yabi bayan ta.
Fadima tace, “Wallahi Aunty Mariya Yaya yana cikin damuwa sosai, matar nan tasa ta canja wallahi ni gabadaya yanzu haushi take bani.” Mariya ta tab’e Baki tace, “Yar iska ce wallahi, shi kuma baya son laifin ta. Amma zamu yi maganin ta nan kusa.” Kawar da maganar sukayi suka fara tattauna wani abun daban.
Da Zazzabi Ameena ta tashi ko gyaran saman kasawa tayi tana yiwa Zaytun wanka ta shirya ta ta kwanta ba tare da tasha magani ba. Tana kin tashin motar sa daga inda take kwance alamun ya fita ta rufe ido kawai abubuwa suna gilmawa a idanun ta.
_”Nifa bance baza ka yi min kishiya ba My choice in na fad’i hakan nasan k’arya nake yi, kawai bana so in hakan ya taso kar ka wulakanta ni ne. Yusuf da yake kallon ta yayi murmushi yace, “nida nake da kamar ki wacce mace zan sake aurowa? Wallahi Ameenatou kin fiye min mata dubu a duniyar nan, duk ranar da akace na wulakanta ki to ki d’auka bani da hankali, ke ko bani da hankalin mai aikin ki bazan iya wulakantawa ba. K’uda bana so naga ya hau jikin ki balle ki zubar da hawaye.”_
Tunawa da kalaman Yusuf na baya ya saka Ameenatu yin murmushi ta share hawayen da ya zubo mata a fuskar ta. A bayyane tace, “Ko da gaske bashi da hankalin?.” Sai kuma ta girgiza kai tace, “yana sane duk abinda yake yi.” K’ofar falon ta taji ana bugawa ta tashi dakyar ta fita ta bud’e, Zakiyya ta gani da Fiddausi a tsaye ta saki fara’a nan take fuskar ta ta canja zuwa farin ciki suma haka ta rungume Zakiyya da take a gaba tace, “Kamar Kun San ku nake jira kawai.” Sakin ta Zakiyya tayi ta rungume Fiddausi ta sake ta Fiddausi tace, “amma jikin ki da zafi fa Meena, Lafiya kike?.”
Ta sauke numfashi tace, “ku Bari kawai, da Zazzabi yau na tashi wallahi. Ku shigo mana” ya fad’a tana komawa baya suka shigo suka zauna itama ta zauna Zakiyya tace, “Ko dai an samarwa da Zaytun k’ani ne?” Ta fad’a tana kashe mata ido cikin shaqiyanci. Murmushi tayi tace, “Ni y’ar gidan ciki, jaririyar y’ata nayi yaya da ita?. Gasu Fiddausin nan ma sun k’i balle ni.”
Dariya sukayi a tare Meena tace, “Ina Rukky kuma?.” Zakiyya tace, “Daman Mun yi da ita zata same mu a nan.”
“To Ina kuka baro Fahad da Amir din?.”
Fiddausi tace, “Amir yana gidan Hajiyan Ibrahim, Fahad kuma ta barshi a gidan Maman su.” Amina tace, “Kuna abinda kuke so wallahi.”
Zakiyya tace, “Kema haka ai, amma kin rame fa Meena.” Ameena tace, “Haka ake cewa ni kuma bana gani wallahi” ta fad’a tana tashi ta d’auko ruwa da lemo a fridge ta ajjiye musu ya kuma cewa, “Me zamu girka ne?.”
Fiddausi tace, “Kaji zaki girka mana wallahi, daman an jima ba’a had’u ba.” Tayi dariya tace, “Fidyn Ibrahim wallahi baza ki canja ba.” Zakiyya da taje shan ruwa tace, “to mu koma falo k’asan mana sabida yafi mana sauk’in shiga kitchen din.”Ameena ta mik’e tace, “Bara na d’auko Zaytun.”
Da sauri Fiddausi ta riga ta yin hanyar d’akin tace, “Keda baki da Lafiya, zauna na dauko ta” ta fad’a Tana shiga dakin. Zaytun din ta d’auko ta tsaya tana k’arewa dakin kallo tana girgiza kai had’i da murmushi tace, “Nima na kusa shigowa wannan level din”. Tare suka sauka bayan ta fito suna zama a falon Rukayya na shigowa.
Tare suka zauna aka fara hira kafin Ameena ta dafe kai tana yatsine fuska alamun kanta na ciwo ta mik’e tace, “Bamu d’ora komai bafa.” Fiddausi tace, “yi zaman ki bara na dafa mana.” Amina ta koma ta zauna tace, “Da kin taimaka.” Kitchen din Fiddausi ta shiga ta barsu a zaune.
Nan da nan ta had’a musu girki lafiyaye yaji nama dan ganin arha ma kaji da nama ta had’a waje d’aya ta zubo musu gabadaya a tray suka zauna Suna ci duk da ba ci Ameena take yi ba. Bayan sun gama ne aka d’auke kwanon aka kai kitche suka dawo suka zauna aka cigaba da hira. Zakiyya tace, “Ameena sai muka samu labarin aure, wai da gaske ne Yusuf aure zai yi?.”Ameena tayi murmushi nan da nan hawaye ya cika idanun ta suka sakko ta share tace, “Eh da gaske ne Zakiyya, an tsayar da rana saura sati takwa. Baku ga sabon gini ake bama?.”
Rukayya tace, “Innalillahi wa’inna ilahiri raji’un, dama Yusuf zai iya yi miki kishiya?.”Kai take girgizawa kafin tace, “Gashi kina gani ma Rukky, kad’an daga aikin namiji kenan.” Zakiyya tace, “Amma meyasa baki fad’a mana ba?.”
“Ban San ta inda zan fara bane ba Kiyya shiyasa kawai nayi shiru.”
“Shirun shine yake cutar dake kike ramewa haka” Fiddausi ta fad’a tana kallon ta. Ta kalli Fiddausi tace, “Kin San wannan dole ne kawai ku taya ni da addu’a itace kawai mafita a wajena.” Kafin wata ta kuma magana aka bud’e k’ofar falon aka shigo duk suka kalli mai shigowar. Yusuf ne ya shigo cikin manyan kaya yayi kyau sosai yana amsa waya, ganin su sai ya ja burki ya tsaya ya sauke wayar daga kunnen sa yayi murmushi yace, “lallai yau akwai manyan b’aki a gidan nan.”
Zakiyya ta kalle shi tace,” Dole kace manyan bak’i mana zaka daukowa y’ar uwar mu kishiya, wallahi ni da naji labarin ma na d’auka mafarki nake yi, wai Yusuf din Ameena dana sani.” Murmushi ya sake yi yace, “Kina taya ta kishi kenan?.” Fiddausi ta amshe tace, “Kaima kasan ai dole ne wannan.” Fuska a sake ya sake cewa, “Ya za’ayi da abinda Allah ya tsara babu Wanda zai canja ai ko?.” Rukayya tace, “Haka ne, amma kasan akwai ciwo ko? Kuma da niyar hakan .”
Kawar da maganar yayi bayan yayi y’ar dariya daman yasan in suka had’u wata sai tayi masa ciwon baki akan lamarin yace, “Na jima ban ganku gabadayan ku haka ba. Gwara ma da kuka zo ku taya ni tambayar ta gabadaya tak’i bani amsa.” Kafin suyi magana ya sake cewa, “Batu ne akan kud’in da zan bata ko kaya kodai duk abinda take so tace ita wai bata so, ni kuma bazan amince da hakan ba amma ta dage akan wai ita bata so. Ku taya ta zab’a ko nawa tace tana so ko me tace tana so zan mata.”
Fiddausi ta gyara zama dan dadi take ji tana hira da mai kud’i tace, “Kasan duk abinda zaka bata bazai siyi kishin ka da take ji a zuciyar ta ba.” Kai ya d’aga yace, “Na san da wannan Fiddausi, amma in bata karb’a ba kamar ban mata adalci ba.” Rukky tace, “Haka ne. Kar ka damu zamu rarrashe ta amma sai a hankali gaskiya wallahi, dan ni Allah ya sani ma haushin ka nake ji a raina.”
‘Yar karamar dariya yayi yace, “Allah ko Rukayya? To ayi hakuri, tuba nake. In kina cewa haka sai ki saka yau a hana ni shigowa” ya fad’a yana kallon Ameena. Ameenatu dai kallon sa take yi kawai tana mamaki dan yanzu tsoro ma yake bata yadda yake canjawa da zarar yaga bak’i sai ya koma mata Yusuf din da ta sani a baya da zarar bak’i sun tafi kuma sai duka da tsawa da cin mutunci.
Ganin kallon da take masa ya saka shi kallon ta shima duk da haka bata d’auke ido ba ya tab’a wuyan ya yaji zafi yace, “Har yanzu zazzabin bai sauka ba?.” Nan ma bata daina kallon ba ba kuma tace komai ba yace, “Dan Allah ki kwantar da hankali damuwar nan taki na saka naji kamar nayi kuka wallahi.” Bata san lokacin da murmshin mamaki ya bayyana akan fuskar ta ba ta girgiza kai ta d’auke kai daga kallon sa, lallai Yusuf tsaf zai iya acting dan ya iya salo Kala-kala.
Barın wajan yayi ya hau sama Rukayya tayi ‘karamin tsaki tace, “Kulawar banza da wofi ana neman kawo maka wata.”
Zakiyya tace, “Namiji kenan, yanzu Tsakani da Allah waye zai ce Yusuf zai iya yiwa Ameena kishiya?. Ko da yake ita da sauk’i ma fa da yana kula da ita duk da aure zai k’ara, wallahi k’anwar Mama in kinga yadda mijin ta ya dinga wulak’anta ta akan zai yi aure sai Kun yi mamaki.” Takun sakkowar sa suka ji hakan ya saka suka yi shiru ya k’araso da leda a hannun sa ya ajjiye kusa da ita yace, “Ki basu a siyawa yara alewa” ya sake ajjiye mata magani yace, “Ki sha dan Allah in bai sauka ba sai ki kira ni na dawo mu je asibiti.” Kallon su yayi yace, “Mun gode 4stars; naji dad’in ziyarar nan sosai, dan Allah a bata baki kafin na dawo naga ta kuma canjawa. Ku gaida gida” ya fad’a yana fita yana ji suna cewa sun gode.
Yana fita Fiddausi ta d’auki abinda ya ajjiye ta bud’e taga rafar sabbin dari biyar ne guda uku alamun kowa d’aya ta d’auka tana kallon Ameena tace, “Wallahi in nice Ameena ko; ko guda uku zai k’aro bayana bazan damu ba Tunda dai zai bani abinda nake so kuma zai kula sani, ai kud’i zan yanka masa kawai ya bayar in yana so ma na ‘kara masa kwana bakwai ya biya in amarya tazo.”
Rukayya tace, “Ai ita ba ke bace ba Fidy” ta fad’atana kallon ta dan haushin ta take ji. Murmushi Fiddausi tayi tasan abinda yake ran Rukayya tacee, “Kishin banza da wofi, kee kud’i sune gaba da komai wallahi. Ni yanzu da ibrahim zai k’aro aure Ina ruwana? Mtsww!.”
Rukayya tace, “Daman Ina so nayi muku magana akan a yiwa Fiddausi fad’a, da dai bazan fad’a ba tunda sirrin gidan tane amma abin nata yana buk’atar ku shiga maganar, naje gidan ta na tarar da abu mara dad’i ita da mijin ta. Gaskiya ya kamata mu nusar da ita abinda take yi ba daidai bane miji ai ba abin wasa bane. Kud’in banza da wofi, ai miji yafi dukiya.”
Fiddausi tayi dariya tace, “A wajan ki b Hajiya Rukayya, ni a wajena gwara naira dubu goma akan Ibrahim wallahi. Nasan kina yin hakan ne dan kar ya sake ni ko? Nasan damuwa kika yi dani yasa kike fad’ar hakan, to ki kwantar da hankalin ki Rukayya abinda nake so kenan wallahi.” Rukayya ta kalle ta tace, “Amma Ibrahim bai cancanci haka daga wajan ki ba wallahi.” Fiddausi tace, “baza ki gane bane Rukayya, amma fa kina da damar sa in ya sake ni, ke ko a yanzu zaki aure shi ko a jikina a nan zaki tabbatar da abinda nake fad’a.”
Ameena tace, “kai! Wai Fiddausi da hankalin ki kuwa?.” Tayi dariya tace, “Rass nake wallahi Amina, kawai dai akwai target d’ina ne zaku ji shi nan gaba in da lokaci. Koda nan gaba za’a sake maimaitawa indai Ruky batayi aure ba taga zata iya auren Ibrahim ko a yanzu da nake matar sa ta shigo wallahi, banga abin kishi a wajan sa ba” ta fad’a tana dariya sosai suna tafawa da Kiyya.
Zakiyya tace, “Rukayya bafa dan wani abun tace haka ba, kawai taga ke kamar kin kasa gane Ibrahim jinin talakawa ne shiyasa, kin damu da lamarin sai magana kike a akai kamar shine na farko. Duk da damuwa da ita ne ya jawo Hakan, amma kar ki damu wannan ba matsala bace.”
Amina ta kalli Rukky tayi mata alama da kar ta sake magana tayi shiru kawai, ai kuwa shiru sukayi basu amsa ba sai suka canja hira zuwa ta rayuwar islamiyya aka cigaba da hira a kai Ana dariya, har la’asar suna gidan kan Ameena ta sake sosai dariya da ita kafin suyi mata sallama su fita gabad’ayan su.
_Book1 Saura kadan ya kare labari yana cikin book 2&3 akan naira 500 kawai babu yawa. Akwai ajin vip shima akan naira 1000 kacal. Direct to me ***._
#Comments
#Vote
#Share
#F5
#Book1
#NanaHaleema