BABI NA UKU
by @ayushermuhd
RIBAR ƘAFA
NA
Wattpad :-AyusherMohd
Arewabook:- Ayushermuhd
ŋą Ä̤ʏʊֆɦɛʀ ʍʊɦɖ🏌🏻♀️
Page 3
Wani Dr ne ya sake shigowa sai dai duk yanda yake mai tambayoyi yaran ya kasa gane me yake nufi. Kallanshi kawai yake yana kallan Baba dake tsaye ya dafa kai, dan har wani ciwon kai ya kamashi ganin abubuwa daga jiya zuwa yau sunata faruwa. Bayan Dr ya gama bincikensa nan ya basu takarda akan suje Aminu Kano ayi CT scan wanda anan ne za'a tabbatar da hakikanin meke damun memory ɗin shi. Alhaji Nuhu Ɗanbatta ne ya bishi da kallo zuciyarshi cike da tausayin yaran dan baifi sa'an Kabiru ba. Ya tabbatar iyayensa na nan na nemansa, dan duk girman nan idan ka nemi mutum ka rasa dole ka shiga tashin hankali. Murmushi kawai saurayin ke mai wanda ke sake karya mai zuciya. Cike da tausayi yace. "Muje gida kaci abinci sai mu wuce Kano ɗin ko?"
Da sauri Kabiru ya matso yace "Baba motarka fa sai an duba lafiyarta, sannan bamu da kuɗin biyan na motar haya. Kawai ka ajiye shi a titin nan ka zare mai ido kace ya kama gabanshi ko ka kaishi police station ɗin garin nan."
Takaici sam ya hana Alhaji Nuhu Ɗanbatta magana, ya rasa wani irin kwakwalwa Kabir keda ita. Ganin bazai kulashi ba yasa ya koma inda yaran yake ya ɗan bangaji kafadarsa yace "Muna zuwa gida zaka cire kayanka ka bani su, kai kuma kasa nawa ai ko banza ka dai biya mu aikin wahalar da muka yi maka."
Kai kawai ya ɗaga alamar to yana sake murmushi. Sun fara tafiya saurayin ya fara jin jiri wanda hakan yasa shi yin baya kamar zai faɗi. Da sauri Kabir yasa hannu biyu ya tareshi yace "Kalau kake?" Jin haka yasa Alhaji Nuhu Ɗanbatta matsowa kusa dashi hankali a tashe. Hannu yasa ya riƙe shi ya jashi gefe tare da nuna mai waje ya zauna akan mashin ɗin Kabir, jikinsa sam ba ƙarfi ya zauna sai dai har a lokacin sama sama yake fitar da numfashi. Sai yanzu ya gane meyasa Dr yace a barshi ya huta, in so samu ne a kawo motar da zasu je Kano da ita bakin asibitin sai a saka shi a cikin motar da wheelchair. To amma shi ya zai yi? Ba kuɗi a hannunsa bare mota, gashi wayarsa tun jiya ta mutu. Amma in sukaje gida bazai rasa mutanen unguwa wani da zai taimaka mai da bashi ba. Sun daɗe a zaune kafin komai ya daidaita. Alhaji Nuhu Danbatta ya kalli Kabir yace "Ka wuce dashi gida amma dan Allah kayi tuki a hankali kar kaje kanshi yai ciwo. Ni kuma zan san yanda zanyi na ƙaraso." Kan titi ya kalla wanda motoci tsila-tsila ne ke wucewa suma a guje yace. "In muka wuce ya zakai ka dawo?"
"Kai dai ka wuce nima yanzu zan ƙaraso, ka kuma tafi dashi a hankali kana ganin bashi da lafiya.” Ganin Baba bai bashi damar magana ba yasa ya hau suka tafi suka nufi kauyen FAGWALAWA dake karkashin hukumar Ɗanbatta. Suna tafe a mashin saurayin na kallan kauyuka galala kai kace a lokacin ya fara ganin kauye haka.
Alhaji Nuhu Ɗanbatta ya ɗan fara tafiya da ƙafa, yana tafe yana tunanin abinda ya kamata yai, addu'a kawai yakeyi akan Allah ya kawo mai mafita. Ko dai motarsa zai sa a kasuwa? Wayarsa ba chaji da yanzu ya samu ya sanar da mutanensa wani ya taimaka mai da rancan kuɗi. Kamar daga sama yaji ance "Baba baka tafi ba? Ina Kabirun?" Waigawa yai ga mamakinsa Dr ne, juyowa yai gaba ɗayansa, yace "Yanzu nake neman abin hawa, Kabir ya tafi gida da mara lafiyan, ni kuma inaso na leƙa inda akai hatsarin akwai abinda nakesan dubawa kafin na wuce." Kallansa yai ya kuma kalli agoggonsa yace "Bari na yiwa masinja na magana yana da mashin sai ya maida kai ni kaɗai ne yau anan in na fita kaika wani abu zai iya faruwa azo kuma babu likita." Godiya sosai Alhaji Nuhu Ɗanbatta yai dan in yace a'a to fa ba yanda zai yi ya koma gida balle harya samu damar wucewa Kano, gashi har sha ɗaya na safe tayi. Godiya ya sake yiwa Dr har yayi gaba ya waigo yace “Baba kai mutumin kirki ne kowa zaima wannan shaidar sai dai karka takura kanka akan abinda bakada halin yi. Yaran nan ka sa a nemi danginshi suje su nema mai magani domin daga ganinsa kasan bawai talaka bane bare kace ba yanda iyayensa zasuyi.” Kai ya jinjina sannan yace “Nagode sosai Allah ya saka muku da alkairi.” Yana tsaye Dr ya koma ko minti biyar da shiga baiyi ba sai ga wani masinjan ya fito. Nan ya ɗau Alhaji Nuhu Ɗanbatta suka wuce. Inda akai hatsarin suka fara zuwa sam babu alamun hatsari agun sai bishiyar da motarsa ta buga wanda ya sake tabbatar mai da hatsarin nan anan gun sukai. Ba yanda ya iya haka suka wuce yana nuna mai hanya sai dai sam hankalinsa ya kasa kwanciya, ko dai sace motar akai?
*****Can cikin baccinta take mafarki yanda ake binta da gudu tana shiga cikin daji, gudu take iya karfinta sam bata kula da ciwukan dake jikinta ba bare katan cikin da take ɗauke dashi. Hakki kawai take tana cigaba da gudu, cak ta tsaya tare da kallan katan ramin dake gaban ta. Shikenan rayuwarta tazo karshe, hanka ta ɗaga kai wanda hakan yasa ta saki ihu mai tsananin ƙara wanda yasa Kursum dake wanki a tsakar gida ta auna ciki a guje. Mahaifiyarta ta gani hannunta ɗaure akan wuyanta tana shake kanta da hanayenta biyu, numfashinta da kyar da kyar yake fita, gashi idanuwanta a tamke gam. Hannunta ta shiga kwacewa tana kwallawa Hasina kira dasu Adda Yagana sai dai ba wanda ya fito. Cigaba da ƙoƙarin zare hannunta take daga wuyanta amma sam tayi saki sai kuma kakarin numfashi takeyi alamar dakyar take jawo numfashinta. Ihu take tana sake kwala musu ƙira. Hasina ce ta shigo da gudu nan suka cigaba da ƙoƙarin kwace hannun Umma, kuka kawai Kursum keyi tana "Umma ki taimaka ki saki wuyanki." Kamar wacce ake ƙara mata karfi da kyar suka samu suka raba hannayenta daga wuyan ta. Da sauri Kursum ta shige jikinta ta rungumeta tana wani irin kuka mai ratsa zuciya. Hasina dake tsaye tausayin Kursum duk ya kamata, sai dai tana tsoron kar Yayarta ta kamata anan. Shafa bayan Kursum tai kafin ta bar ɗakin cike da tausayi. A hankali Umma ta buɗe ido ganin Kursum na kuka sosai yasa ta rikice tare da riƙe fuskarta tace "Kur--summ nayi fitsari ne? Kiyi hakuri bazan kara....." Yanda Kursum ta sake matse ta ne yasata yin shiru. Sai dai har lokacin ta kasa daina cewa "Kiyi hakuri!" Daga waje ta jiyo muryar Kabir yana cewa "Kursum kina ina?" Tana hawaye tace "Ya KB shigo dan Allah." Yanda tai maganar ne yasa ya shiga da suri dan Kursum batasan ko labulen ɗakin su ya ɗaga tunda tace yazo tofa tabbas yasan ba lafiya. Cikin hanzari ya yaye labulen ya shiga hankalinsa a tashe, ganin yanda ta ƙanƙame Umma ne yasa shi zuwa inda suke yace "Kursum Lafiya? Meke faruwa?" Ya jero tambayoyin nan hankalinsa a tashe. Kallansa tai idanuwanta na hawaye sosai bakinta na rawa tace "Umma ce ta sake abinda tai kwanakin baya, nikam tsoro nakeji. Ya KB da ba kowa a kusa mutuwa zatai....." Kuka ne yaci karfinta wanda sam yasa bata kula da zamewar da ɗan kwalin kanta yai ba, gashinta da aka mata kalaba ya zubo. Kamar a mafarki taji ance "Are you okay?" Murya ce mai sanyi wacce ke tattare da tausasawa daga cikinta. Jin muryar tai har cikin kanta. Idanuwanta ta ɗago tare da saukesu akan saurayin dake tsaye jikin labule. Fuska ce da bata santa ba, bata kuma san daga ina yake ba. Idanuwanta akansa batai auni ba taga Kabir da sauri yayi kan saurayin ya turashi waje da karfi yace "Banda baka da lafiya da yau kasha duka, taya zaka shigo ɗakin budurwa ba izini?" Saurayin ya koma waje yaja gefe ya tsaya shi kuma ya koma ciki. Kursum har lokacin tana riƙe da hannayen Umma wacce numfashinta ya daidaita har lokacin tana hawaye tace "Umma mafarki kikai? Mafarkin menene yake wahalar dake nikam?"
"Mafarki? A'a yunwa nakeji." Hannaunta ta kamo suka fito daga ɗakin. Lokacin Kabir na ƙoƙarin shiga. Baya sukai yace "Komai lafiya?" Ta kalli Umma tace "Yunwa takeji yanzu zan bata abinci." Idanshi na kanta yace "Makarantar yau bakije ba?" Ta ɗan saki murmushi tana maida ɗanwalin kanta tana cewa "Baka nan Baba bayanan in na fita dawa zan barta? sannan yanzu kalli abinda ya faru, in tsautsayi ya afka ba kowa me zai biyo baya?" Bai amsa ba sai komawa waje da yai itama ta fito. Sake tsayawa tai ganin saurayin ɗazu tsaye jikin bango, daga sama har kasa ta kalleshi zata gaidashi taji Umma tace "Kaima ka yadda takalmin ka ko? To Allah yasa kar Kursum tama faɗa." Sai a lokacin suka kalli kafarshi, sam Kabir ya manta warin takalminshi ɗaya tun a asibiti babu. Mamaki ne ya kama Kursum tana ɗagowa suka haɗa ido, da sauri ta kauda kai ta maida kan Umma tana cewa "Umma wani faɗa kuma?" Bata amsa taba ta tafi gunshi da sauri tace "Ya sunanka?" Idansa ya sauke kan Kabir sanna ya kalli Kursum cike da mamaki take binshi ganin kamar bai san sunanshi ba. Umma tai caraf harda tsallenta ta nunashi da yatsa tace "Hooo oah na sani sunan ka Yakubu ko ko ba kanin Kabiru ba ne?”
Kabiru ya matso da sauri yace “Umma me kike cewa? Kin manta Kabiru ya rasu? Kurum wai ba yunwa Umma…….”
Kasa ƙarasa magana sukai ganin saurayin nan ya sulale ya faɗi. Hankali a tashi sukai kanshi. Kabir yace Kursum ta shimfida tabarma ta ɗauko pillow. Da gudu tai abinda aka sakata nan ya kwantar dashi. Kursum kuma na mai fifita da mafici. Idanuwansa ya shiga buɗewa a hankali ya saukesu kan Kursum. Murmushi ya sakar mata sannan ya kalli Kabir bai ce komai ba sai idanunsa da yake ƙoƙarin maidawa ya kulle. Cikin karfi Kabir yace. “Yaran nan nauyi kamar buhun shinkafa.”
Daga cikin ɗaki kuwa Yagana ce ta kalli Raheena da Hasina tace “Kunsan Allah muje mu dawo da Inna nifa ba yanda za’ai wata kanwar miji da ban yadda da ita ba tazo ta koreni daga gidana.” Ajiyar zuciya Raheena tai tace “Nifa banga laifinta ba babu yanda za’ai ya dinga fifita kanwarsa akanta, yanzu da ta tafi hutu gidan Yaya Bashir ba gashi har kiba tayi ba.”
“Mu kuma haka zamuyi ta zama a gidan batanan? Ni da gidan mu sai na dinga jina kamar taimako na ake a gidan ma wallahi. Haka kawai an takure mu daki ɗaya su an basu ɗaki harda bandaki a ciki.” Hasina ta faɗa tana yatsina fuska. Tsaki Yagana taja mai tattare da sauti tace “Ni takaicina Baba ko damar magana baya bamu a gidan nan kamar ba yaransa ba.” Kallan junansu sukai sannan suka mike suka fito yau dole su sanar mai akan ya yiwa Yaya Bashir magana a dawo musu da Inna gida. ita Yagana dama bazawara ce su kuma matan biyu ƴan mata ne.
Yanda sukaga Kursum ta haɗa gawayi tana ƙoƙarin ɗau ra ruwan zafi ne yasa Yagana tunzura. A fusace ta ɗau kwanan sha ta tafi kindimo ruwa a cikin randa tai kanta zuciyarta na wani irin zafi. Tana zuwa ta kwarawa gawayin nan ruwa wanda har sai da ruwan ya taɓa jikin Kursum. A tsorace ta mike dan abu ne datajishi sama ta ka. Baya tai da sauri ruwan dake tukunyar ya jirkice shima ya zube. idanuwanta ta sauke kan wutar sannan ta ɗago ta kalleta tace “Adda Yagana me kikeyi haka?”
“Na ɗauka na sanar miki duk abinda zaki dafa a gidan nan ki sanar min sai na baki izini tukun zakiyi?” Kursum ta kalleta tace.
“Amma ko haka ne sai ki kashemin wuta?”
“An kashe uban me zakiyi? Jiya dana miki magana kika shige ɗaki kin ɗauka kinsha ne? Dan me zamu cigaba da zama da ke da uwarki cikin takura? Ita ba hankali ba ke kuma kamar aljana?” Zata cigaba da magana sukaji muryar Kabir yana cewa “Yanda kika kashe wutar nan Hasina da Raheena haka zaku zauna ku haɗata dan kaf cikin ku ba mai matsawa har sai an haɗa wutar nan.”
Sam basu kula dashi ba juyowa sukai bangarensa inda yake tsaye, Umma na makale a bayanshi jikinta sai kyarma yake, idanunsu ne ya sauka kan saurayin dake kwance wanda basusan wanene ba. Baba daya shigo kenan ya saki murmushi shi yasa duk shiriritar Kabiru yasan zai kula da Kursum yarintace kawai ke damunshi wanda yake da tabbacin nan gaba kaɗan zai daina. Gyaran muryar da Alhaji Nuhu Ɗanbatta yai ne yasa suka kalleshi. Wata irin shakuwa ce ta kwacewa Yagana tana yi tana zaro ido....
Ayusher Ce🏌🏻♀️