REINA

22

by @seemahwrites

22....Wasa-wasa lokaci ya tafi. 
Lokacin da Yaseer yake ganin zaman gida yayi masa yawa, ya tafi. 
Lokacin da Hajiya Fauziyya ta ɗauka na Jinyar Reina, ya Tafi.
Lokacin da Alhaji Tahir ya ɗauka na jirar amincewar Alaji Abdou a kan sabuwar kasuwanci inji shi da faɗa, shima ya tafi.

Kusan za'a ce abubuwa da yawa ne suka faru a Rana guda amma lokaci mabanbanta.
.....

Kai kawo yake a cikin office ɗin shi, yana kallon agogon dake manne a bango, da wanda ke ɗaure a tsintsiyar hannun shi, da ma wanda ke fuskar wayar shi.

Tun daga lokacin da ya yanke shawara da zuciyar shi, da ilimin shi, da kuma experience da yake da shi na shekara da shekaru a kan harƙar samu da kuma sarrafa kuɗi, Hankalin shi ya samu wuri ya kwanta kaman tsumma a randa. domin yana da tabbacin sai yayi dariya ma Alaji Abdou, kuma zai goranta mishi rashin amfani da damar da yazo har cikin tafin hannun shi kuma ya bar shi ya suɓuce.

Saidai fa a yau ɗin da lokaci ya ƙarato, a maimakon ya samu kan shi da murna sai kuma fargaba tazo ta shanye shi. Bayi son zana ko ɗigo na shakku a kan zuciyar shi amma yana tsoron harsashen alaji Abdou ya zamo gaskiya.

Cikin saabo da hanzari, dogon hannun agogo ya tsallaka kan lamba ta sha biyu yayin da shi kuma guntun hannu a kasalance yayi nuni da lamba ta goma daga nesa.

Lokacin da suka bashi ya cika!.

Numfashin Alhaji Tahir ya ɗauke cakk na sauran sakwannin da suka ratsa har sai da saƙon Email ɗin da yake jira ya shigo lokaci ɗaya tare da wani saƙon, wanda ya bayyana sunan ɗaya daga cikin bankunan da yake amfani da shi a fakaice kafin ya koma sama ya ɓuya, zuwa lokacin da buƙatar mai saƙon zai tilasta shi ya janyo shi don ya duba.

Sai komai ya tsaya mishi, kunnuwan shi suka daina jin wani abu bayan bugun zuciyar shi, Idanun shi suka daina ganin komai bayan wayan da ke hannun shi, yayin da yatsar shi ya danna kan saƙon email ɗin ya buɗe ta sannan ya shiga karanta abinda aka rubuto. 

Bai gama yarda da abinda ya gani ba har saida ya janyo saƙon ɗazu da yayi masa ƙwalele ya shiga ciki, idanun shi suka yi arba da maƙudan kuɗaɗen da suka shigo account ɗin shi.

Dala miliyan ɗari da hamsin.

Jiri yaji kaman yana shirin ɗiban shi, ya ɗan dafa jikin teburin gaban shi amman bai zauna ba. Sake karanta yawan kuɗin yake yi, yana jin wani diri a cikin kan shi. Ba don bayi da kamar hakan ba, amma ko a shekara Ribar duk wani reshe na TK Kingdom idan aka haɗa ba zasu ɗare hakan ba. Kuma ba nashi shi kaɗai bane harda sauran masu hannun jari. Amma yau a cikin wata uku kacal ya samu ribar Dala miliyan ɗari ba tare da zufar shi ba, wanda idan aka juya shi zuwa naira toh biliyan ne da ɗoriya mai yawa ya samu a ɓagas!. Sai kawai ya shiga nanata hasbunallahu wa ni'imal wakeel a kan harshen shi don ya samu nutsuwa ta dawo mishi.

Ruwa ya sha kana ya samu wuri ya zauna ya dannan kiran lambar Fauziyya.

Har ya shiga bugu ɗaya sai kuma yayi saurin yankewa kafin ta kai ga ɗauka, ya maida kiran ma Alaji Abdou, domin so yake yi ya nuna mishi ɓacin ran shi da ya hana shi shiga da dala miliyan 200 kaman yanda yayi niyya, ƙarshe da ya gaji da jiran shi ne kawai ya shiga da dala miliyan 50 a sirrance. Gashi ta hayayyafa har da jikoki.

Saidai ya kira har sau biyu ba'a ɗauka ba. Saida na ukun ma ya kusan tsinkewa kafin Alaji Abdou ya ɗauka tare da yin sallama muryar shi a sanyaye.

"Wa'alaikumus salam. Abdou daman mai na faɗa maka?... Pro"

"Malika Ta Rasu Tahir. Yanzu zamu kaita makwancin ta" ya faɗa muryar shi na karyewa. "Idan na dawo zamuyi maganar koma menene, ko zuwa gobe ma, ko anjima da safe, ina zaka iya jira?" 

Abinda bai taɓa fata ba shine ganin abinda zai rikita Alhaji Abdou, duk tashin hankali da bala'in ka saidai kayi ka bar shi, amma yau gashi ya gani.

"Ina hanya nan da awa ɗaya in sha Allah" shine abinda yace amma bayi da tabbacin Alaji Abdou ɗin ya ji saboda katse kiran da yayi a lokacin.

A gaggauce ya kira Hajiya Fauziyya ya sanar da ita ta shirya zasu wuce Nijar yanzu.

....

Ajiye wayar tayi tare da duban Reina da ta ƙwace glass bowl ɗin hannun Maama wanda ke ɗauke da butter da kuma sugar a ciki tana ta faman juyawa.

Yarinyar da idan miƙo kaza aka ce mata sai ta kawo maka uzuri guda hamsin kuma idan ba da jan ido ba bazata miƙo ba. 

Reina bata aikuwa bata aikatuwa, saidai idan buƙatar tata ce, toh fa nan kam bata da nauyin jiki.

Domin yanzun ma makaranta ta ki zuwa firr wai ƙafafun ta na ciwo kuma uban ta ya biye mata. Ƙafar da har India suka je, suka shafe tsawon lokaci a can, aka yi mata aiki sosai saboda kada idan ya gama warkewa ya bar tabo da yawa.

An ƙarashe third term lokacin tana tsaka mai wuya amma haka aka cinye sabon first term da second term har wani third term ɗin ya sake zagowa ana shirin exams bai fi na sati biyu taje school ba a cikin shekara guda. Islamiyya kan ma ba'a magana daman bata shiga da wuri ba gashi ya hana a taɓa ta don haka babu abinda ta iya bayan fatiha da ƙulaƙuzai, shima Ita ta kai zuciya nesa ta koya mata.

Shine fa mai ciwon ƙafa taji ana zancen za'a yi waffles ta baje a kan kitchen Island tana buga buttern nan da sugar kaman Allah ne ya aiko ta, sai Maama ta koma kallon ta kawai tana shiru.

"Ki sauƙa ki wanke hannun ki zamu yi tafiya da Daddy" Fauziyya tace don bata son doguwar magana saboda saƙon mutuwar da ta samu.

Da murna ta dangwara ma Maama bowl din sannan ta taka kujera ta sauƙa don ta san duk inda za'a je da Daddy toh fa jin daɗi ne.

"Aina'u dan Allah bita ki haɗa musu kayan su kala ɗaya ko biyu"

"Toh Aunty" Aina'un ta amsa.

Har ta juya zata tafi ta kira ta "ba masu ado sosai ba, ɗan na canzawa kawai" 

Nan ma da toh ta amsa sannan ta tasa ƙeyar Reina zuwa ɗakin kwanan su ita da Maama, ta ɗauko ƴar madaidaiciyar traveling bag ta shiga zaɓar kayan.

Karan tsaye Reina tayi mata, ita sai wanda take so za'a saka daga cikin jerin gowns ɗin ta kuma.

Share ta kawai Aina'u tayi ta ci gaba da aikin ta. Sai kawai ta saka mata rikici tana jawo gogaggun kayan dake ninke tana fatali da su a tsakar ɗakin.

"Hajiya ƙarama dan Allah ki bari!" Tace cikin ƙosawa kaman zata yi kuka sannan ta fara maida kayan bayan ta barta ta zaɓi wanda take so ɗin an haɗa a kan wanda ya kamata. 

Handkerchief ne ya faɗo, Aina'u ta ɗauka zata mayar Reina tayi saurin faucewa daga hannun ta. Ta tuna da mai ita, kuma tun wancan Ranar Aunty take ajiye da shi a kan idan sun sake zuwa za'a maida mishi kayan shi.

Cikin jakar kayan sun ta cusa, da nufin idan sun fita sai tace ma Daddyn ta su je gidansu su mayar mishi.

....

Da wayan Saudat yake magana da abokin shi wanda suka yi paper tare sannan shima yaci Jamb da waec wanda sakamakon su sun daɗe da fitowa har an fara sake sakamakon neco ma.

Kuma tare suka je suka yi physical screening a Atbu tunda zancen University of Ibadan ya gagara.

Kamal ya buga ya buga amma abun yafi ƙarfin shi, don haka da yaga babu sarki sai Allah shine ya shafa ma kan shi ruwan sanyi ya bar komai a hannun rabbana, gwanda ma Yaseer ɗin ya zauna a kusa a gaban idanun su yayi karatun zai fi musu kwanciyar hankali.

Ta ɗaya layin aka ce da shi.
"Yanzu na gani kaima ka duba." 

"Na taya ka murna Muhammad, zan duba nima yanzu in kira ka"

Da wannan suka gama kiran ya ajiye ma Umman wayan ta sannan ya fito ya same ta a kitchen ya sanar da ita zai je cafe ɗin da aka buɗe mishi e-mail a duba ko an turo mishi da admission letter.

Ɗari biyar ta bashi, ya canza takalmi daga silifas ɗin ƙafar shi zuwa wani kana ya fice.

Ya ɗauki kaman mintuna 40 kafin ya dawo riƙe da takardu guda biyu a hannun shi, ƙolla cike a idanun shi.

"Umma gashi sun turo min, sun amshe ni a matsayin ɗalibin su umma kuma sun bani course ɗin da nake so" 

Da murna ta miƙe ta tunkaro shi, yana tsaye a wurin ya gagara motsawa don haka ta amshi takardar da ɗan guntun turancin ta dai ta duba. 

"Masha Allah, alhamdulillah!" Addu'a tayi mishi sosai tana saka mishi albarka sannan tace yaje ya gwada ma su danejo da gidan Liman, don ko yaushe tambayar su kenan a kan makarantar tashi.

"Toh ki riƙe min wannan umma sai inje in gwada musu ɗayan"

Ya bata ɗaya takardan dake hannun shi.

"Wannan kuma na menene?" Ta tambaya tana dubawa ko shima zata gane.

"Bayanin registration ne a jiki da kuma kuɗin da za'a biya"

"Kuma har nawa?" Ta buƙata.

Dubawa yayi daga kuɗin makaranta, hostel da sauran su.

Sai ya kalle ta. "Umma da yawa fa"

Karɓan takardan kawai tayi tana ƙirga yawan zeros ɗin dake jikin total.

"Miliyan ɗaya nake gani haka ko nawa?" Tace cikin tsananin kaɗuwa.

Ya karɓe takardan don sake tabbatarwa kana ya saki murmushi "Haba miliyan? Dubu ɗari ne da sha takwas amma banda kuɗin su hostel da wasu abubuwan"

Jinjina kai tayi, In sha Allah ba zai gagara ba tunda sun daɗe suna tarawa. Amma zancen wani hostel kam sai Kamal ya dawo sun sake shawara.

.....

Ciki Aka wuce da su Hajiya Fauziyya shi kuma Alhaji Tahir ya tsaya a waje wurin karɓan gaisuwa tare da Alaji Abdou ɗin wanda ya gama yin sukuku har magana tana niman gagaran shi a yanzu. 

A yanzun da yaje ya saka Malika a rami da hannun shi mutane suka taya shi ya rufe. Ya tabbatar da cewa ya rasa ta kenan har abada, kuma shi da Aicha sunyi rashin da zai canza ƙaddarar su baki ɗaya.

Kukan ta shine abinda ya fara riskar su da shigan su parlorn. Tana yi tana kiran mummy. 
maƙale take a jikin ƙanwar mahaifiyar ta wanda itama kukan take yi balle a samu ta rarrasheta, Gashi anyi a raba su abu ya gagara. 

"Amma me yasa za'a faɗi mutuwa ma yarinya ƙarama haka?"

Fauziyya ta koka cikin rashin jin daɗi tana ƙoƙarin jawo Aicha jikin ta.
Ganin ita ce yasa ta yarda tazo ta kwanta luff a jikin ta.

"A gaban idanun ta Allah ya ɗauki ran ta. Allah ya jiƙan ki lalla Malika, ashe wannan kwanciya ba na tashi bane" cewar ƙanwar mahaifin su tana fashewa da kuka. 

Sai itama Aicha ta sake fashewa da kuka tare da ɗagowa. "Aunty dan Allah ki kaini wurin mummy na. Please bata mutu ba, she just fell asleep, idan naje wurin ta zata tashi" 

Har yanzu Aicha tayi yarinta ma sanin mutuwa amma sun riga da sun fahimtar da ita, babu ƙyaryar kuma da zata yi ya rufe mata hakan saidai kawai ta kwantar mata da hankali. 

Kitson da ya sauƙo kan fuskarta ta mayar baya ta fara share mata hawaye da hannun ta, wani kukan yafi gaban tissue. "Ki yi haƙuri Darling kin ji? Zamu je wurin mummy amma sai kin daina kuka" 
Laƙanin da tayi amfani da shi sai ya tuna mata da Malika, a ko ina a gaban kowa takan kira ta da hakan, amma gashi yau mai yanke ƙauna ta raba ta da gudan jinin ta.

Ɗan ƙaramin farin hannu suka ga ya miƙo handkerchief navy blue mai manyan check ɗin light green zai shiga goge mata hawayen tayi saurin kawar da fuskar ta tare da matsawa daga Jikin Reina.

"Stop crying Please my friend" Reina tace itama idanun ta na kawo ruwa. Ita a lissafin ta Aicha ƙawar ta ne, tunda daddyn ta yana yawan zuwa wurin nata daddyn a Nigeria, sannan mummyn su ma suna zuwa gidan juna, don haka Aicha is her friend. Sai ta ƙara matsawa kusa da ita da handkie ɗin, Aicha ma tayi saurin sake jan baya. 

Ita kuma a nata lissafin har yanzu ɗan uwa namiji take so, bata son mace, kuma idan tayi ƙawance da Reina shikkenan Aunty ba zata kawo mata brother ba don haka take share su ita da Maama ma. 

"Ki bar kuka kinji? Please" zuwa yanzu S ɗin ta ya fara fitowa amma irin mai cika bakin nan domin sai ta fisge shi ta ƙarfi. don haka miyan bakin ta ya tsartu a kan fuskar Aicha, sai ta ƙwace handkie ɗin hannunta ta goge fuskar ta da shi sannan ta dunƙule shi a hannunta ta kwantar da kanta saman cinyar Hajiya Fauziyya tana ajiyar zuciya. Reina kuma ta rasa yanda zata yi ta karɓa handkien Yaseer daga hannunta tunda itama ba nata bane.

~~~~~~~~