Chapter 7&8

🙆‍♂️🙆‍♂️ *NA SHIGA BAN ƊAUKA BA* 🙆‍♂️🙆‍♂️

               _(Bata fidda barawo)_ 

 *Writing By Hamma Abdul (Dan Salma)* 

 *MARUBUCIN.....🖊️

 _YAREEMA_ 

 _INUWAR KAKA_ 

 _BIYU BABU_ 

 _AZUMIN LADO_ 

   

📚JARUMAI WRITTERS ASSOCIATION TAKEN MU ALKALAMI YAFI TAKOBI📚

_____________7&8

Ɗakin bincike na hukumar EFCC ya kasance wani karamin ɗaki ne wanda aka gina shi da kauraran bango marasa taga. Babu abin da ke cikin ɗakin sai wani karamin tebur na karfe da kujeru guda biyu. Sanyin na'urar sanyaya ɗaki (AC) da aka ƙure  karshen karfinta yana ratsa kashin duk wanda ke ciki, wanda hakan wata hanya ce ta musamman da jami'an tsaro ke amfani da ita wajen karya lagon waɗanda ake zargi.

Kamal yana zaune a kan ɗaya daga cikin kujerun karfen, hannayensa duka biyu a ɗaure da ankwa a jikin teburin. Jikinsa yana wani irin karkarwa ba don sanyin lakin kaɗai ba, a'a, don tsananin firgici da tashin hankalin da ya tsinci kansa a ciki. Kwat din da ke jikinsa ya jike da gumi da kuma ruwan saman da ya doke shi lokacin da ake tura shi cikin motar jami'an tsaro.

Tsawon awanni huɗu kenan da kawo shi wannan ɗakin, amma babu wanda ya shigo ya ce masa uffan. Tunaninsa ya gama rikicewa. Ta yaya rayuwata ta juye daga mai lissafin kudi na babban kamfani zuwa kasurgumin barawo a cikin sa'a ɗaya? Ya tambayi kansa, hawaye masu zafi suna gangarowa daga idanuwansa suna diga a kan teburin karfen.

Kofar ɗakin ta buɗe da wani irin sauti mai kara Kyak!

Wani mutum mai matsakaicin shekaru, sanye da bakin kwat da farar riga, ya shigo ɗakin. Wannan shi ne Jami'i Kabir, ɗaya daga cikin manyan masu bincike na hukumar. Fuskarsa a murtuke take, babu alamar tausayi a kwayar idonsa. Yana rike da wani katon fayil mai kauri wanda ya watsar a kan teburin da karfin tsiya Bam! wanda ya sa Kamal zabura a firgice.

Jami'i Kabir ya ja kujerar da ke fuskantar Kamal ya zauna, ya zuba masa ido na wasu dakiku kafin ya fara magana.

"Kamaluddeen Abubakar," Kabir ya faɗa, muryarsa tana da wani irin amo na barazana. "Matashi mai hazaka. First Class a jami'a. Ka fito daga gidan talakawa, amma ka yi amfani da iliminka wajen tsara yadda za ka sace Naira Biliyan Biyu da Miliyan Ɗari Biyar (N2.5 Billion) na kuɗaɗen kwangilar gwamnati. Lallai ka cika dan iska."

Kamal ya zaro ido, numfashinsa ya kusa ɗaukewa. "Biliyan biyu?! Wallahi karya ne! Ban taɓa ganin kuɗi irin wannan ba a rayuwata! Ni ma'aikaci ne kawai a karkashin Sanata Buba Gwamna. Shi ne ya sa ni in rika sa hannu a kan takardun kuɗaɗen kamfaninsa. Ban san cewa kuɗaɗen gwamnati ba ne, kuma ban san inda suke zuwa ba!"

Kabir ya saki wata 'yar dariya ta isganci, ya buɗe fayil ɗin da ke gabansa. Ya zaro wasu takardu ya jera su a gaban Kamal.

"Ka kalli waɗannan takardun da kyau," Kabir ya nuna su da ɗan yatsansa. "Waɗannan takardun banki ne na wasu asusu guda uku da ke kasashen waje. Dukkanin asusun nan guda uku, an buɗe su ne da sunanka, da hotonka, da kuma sa hannunka. Kuma kuɗaɗen da aka fitar daga asusun kamfanin Sanata, kai tsaye suka shiga waɗannan asusun naka. Kana so ka ce min wani ne ya yi amfani da hannunka ya rubuta ba tare da ka sani ba?"

Kamal ya kalli takardun. Tabbas, sa hannunsa ne a kai! Ya tuna lokacin da Sanata Buba ya ba shi wasu takardu masu yawa a ranar da ya fara aiki, ya ce masa takardun buɗe asusun kamfani ne. Saboda tsananin murna da kuma amincewa da Nafisa, ya sa hannu ba tare da ya karanta dukkanin shafukan ba. Ashe takardun bule asusun karkatar da kudi ne da sunansa!

"Wannan tarko ne!" Kamal ya kwalla ihu, yana kokarin ɗaga hannayensa da ke ɗaure da ankwa. "Sanata Buba ne ya kulla min wannan makircin! Ya yi amfani da ni a matsayin garkuwa don ya sace kuɗaɗen! Ku binciki Sanata, shi ne asalin barawon!"

Jami'i Kabir ya daki teburin da karfi. "Ka yi wa mutane shiru! Sanata Buba Gwamna mutum ne mai mutunci a kasar nan. Shi ne da kansa ya gano cewa kuɗaɗen kamfaninsa suna bacewa, kuma shi ne ya kawo mana rahoton cewa yana zarginka. Kuma a yau, mun kama ka dumu-dumu a ofishinsa kana kokarin sace sauran takardun shaidar da suka rage a cikin wancan jan fayil ɗin!"

"Ban sace fayil ɗin ba! Ya kira ni a waya ya ce in ɗauko masa!" Kamal ya faɗa yana kuka. "Ku tambayi Nafisa! Nafisa ita ce sakatariyar ofishin, ita ce ta ba ni makullin ofishin Sanata da hannunta! Ta san komai!"

Kabir ya jingina bayansa da kujera, ya kalli Kamal da wani irin kallo na tausayin wawa. Ya zaro wata takarda guda daya daga cikin fayil din, ya turo ta gaban Kamal.

"Kana maganar Nafisa?" Kabir ya faɗa a sanyaye. "Wannan ita ce takardar bayanin da Nafisa ta rubuta da hannunta a ofishin 'yan sanda sa'o'i biyu da suka wuce."

Kamal ya kalli takardar, idanuwansa suna lumshewa saboda hawaye, amma ya iya karanta abin da ke ciki.

A cikin takardar, Nafisa ta rubuta cewa: "Ni Nafisa, ina tabbatar da cewa Kamaluddeen ya zo ofishina da yamma, ya zaro wuka ya yi min barazana da rayuwata idan ban ba shi makullin ofishin Sanata Buba ba. Na ba shi makullin saboda tsoron kar ya kashe ni, sannan na gudu na kira jami'an tsaro."

Dum!

Wani irin mugun duhu ne ya lullube kwakwalwar Kamal. Ya ji kamar an caka masa mashi a tsakiyar zuciyarsa, an murza shi, sannan an fizge shi da karfin tsiya. Nafisa? Macen da yake so fiye da kansa? Macen da ya ɗauki dukkanin albashinsa yana kashe mata don ya faranta mata rai? Ita ce ta rubuta cewa ya yi mata barazana da wuka?!

Wannan ba cin amana ba ne kawai; wannan kisan gilla ne na zuciya da rayuwa gaba daya!

"Nafisa..." Kamal ya furta sunanta a hankali, muryarsa ta mutu gaba daya. "Ta... ta ci amanata. Ta sayar da rayuwata."

Ya gane komai yanzu. Soyayyar da ta nuna masa tun a wajen taron matasa, kulawar da ta ba shi, aikin da ta samo masa... dukkaninsu shiri ne da aka dade ana kullawa. Sanata Buba yana neman wani wawa, talaka, wanda ba shi da kowa da zai tsaya masa, wanda za a dora wa alhakin satar kuɗaɗen gwamnati idan bincike ya taso. Kuma Nafisa ita ce ta zaɓo shi, ta jawo shi cikin tarkon da murmushinta na karya.

"Ka gani ko?" Kabir ya faɗa yana tattara takardunsa. "Babu wanda zai yarda da tatsuniyarka ta cewa Sanata ne ya sa ka. Dukkanin shaidu suna kanka. Kuɗaɗen suna asusunka, an kama ka a ofishin da ba naka ba, sannan budurwarka ta ba da shaidar cewa ka yi mata barazana. Kamal, rayuwarka ta kare. Za a gurfanar da kai a gaban kotu ranar Litinin, kuma hukuncin wannan laifin ba zai gaza daurin shekaru ashirin a gidan yari ba."

Kabir ya tashi ya fice daga ɗakin, ya bar Kamal a zaune yana kallon kofar da ta rufe.

Kamal bai sake yin ihu ba. Bai sake cewa karya ne ba. Wani irin matsanancin kuka ne ya kufce masa wanda ya fito daga kasan ransa. Kukan nadama. Kukan makancewa a soyayya. Kukan talaucin da ya sa ya amince da aikin da bai san asalin sa ba. Ya shiga ofishin Sanata, amma bai ɗauki ko kwaɓo ba, sai dai shi ne zai biya kudin abin da bai ci ba.

A Gidan Su Kamal 

A daidai wannan daren da Kamal yake fuskantar wannan wulakancin, a can gidansu kuwa, Inna tana zaune a kan abin sallah. Ta idar da sallar isha'i, amma ta ki tashi. Zuciyarta tana ta wani irin bugawa da sauri-sauri. Kamal bai taba kaiwa irin wannan lokacin bai dawo gida ba, sannan wayarsa a kashe take idan ta kira.

Tana tsaka da jan carbi, sai ta ji an buga kofar gidansu da karfi. Kwankwas! Kwankwas!

"Inna! Inna kina ciki kuwa?!" Muryar Malam Lawal ce, makwabcinsu wanda yake da karamin shagon sayar da shayi a kofar gida. Muryarsa tana nuna tsananin tashin hankali.

Inna ta mike da kyar, ta dauki fitilar kalanzir ɗinta ta nufi kofar gida. Ta buɗe kofar, ta ga Malam Lawal a tsaye yana haki, fuskarsa cike da fargaba.

"Lafiya Malam Lawal? Me ya faru a daren nan?" Inna ta tambaya, gabanta yana faduwa.

"Inna... Kamal ne!" Malam Lawal ya faɗa yana karkarwa. "Yanzun nan muke kallon labarai a gidan talabijin na kasa. An nuna hoton Kamal! Jami'an EFCC sun kama shi! Suna cewa ya sace kuɗaɗen gwamnati har Naira Biliyan Biyu a kamfanin Sanata Buba Gwamna!"

Fitilar kalanzir din da ke hannun Inna ta subuce ta faɗi a kasa Fas! Gilashin ya fashe, wutar ta mutu.

"Kamal? Sata? Biliyan biyu?" Inna ta furta waɗannan kalmomin a hankali, kamar wacce kwakwalwarta ta kasa ɗaukar nauyin maganar. Ta san ɗanta. Ta san Kamal ba zai taɓa ɗaukar allurar wani ba ba tare da izini ba, ballantana kuɗin da bai taɓa ganin irinsu ba.

Wani irin jiri ne ya kwashe ta. Kafafunta suka kasa ɗaukarta. Ta saki wani irin nishi mai nauyi, sannan ta zube a kasa sumammiya a kofar gidanta!

"Innalillahi wa inna ilaihi raji'un! Ku kawo dauki! Inna ta fadi!" Malam Lawal ya kwalla ihu yana neman taimakon sauran makwabta.

Wannan daren ya zama daren bakin ciki da rushewar dukkanin mafarkan gidan su Kamal. Makircin masu kuɗi ya kakkabe rayuwar talaka a cikin kankanin lokaci.

Alkalamin Hamma Abdul (Dan Salma)................🖊️