DADDY'S SPOILED SON

By Maryam sulaiman 

Miss Nasir ✍️

Complete book 📚 

Page 9-10

Da misalin ƙarfe goma na safiya, gari ya waye a wani katafaren gida da ke ɗaya daga cikin manyan unguwannin Abuja, gidan Alhaji Abubakar Matawalle—wani attajiri da sunansa ya shahara a duniya sakamakon manyan kamfanoni da harkokin kasuwancinsa a ƙasashe daban-daban.

Rameez ne ya gama shiryawa tsaf cikin farar designer shirt da baƙin wando, idanunsa sanye da tabarau. Ya fito daga ɗakinsa ya nufi babban falon gidan. A can ya samu Daddy da kuma mom ɗinsa, Hajiya Safiya, zaune tare da wasu manyan baƙi suna tattauna harkokin kasuwanci.

Amma duk da kasancewar iyayensa da baƙi a wajen, ko gaishesu bai yi ba; ya wuce abinsa kamar bai ga kowa ba, lamarin da ya nuna tsantsar takamarsa da miskilancinsa.

Da zarar Alhaji Abubakar ya ga ɗansa, sai fuskarsa ta washe da murmushi duk da rashin gaisuwar da Rameez ɗin bai yi masa ba.

"My boy! Come here," Daddy ya faɗa da kulawa.

Rameez ya ɗan tsaya ba tare da ya sake fuska ba. Daga ɗaya gefen falon kuwa, Hajiya Safiya ce zaune tana kallonsu da idanu cike da halin ko-in-kula da rashin amincewa. Ta taɓe baki, domin ita kaɗai ce a gidan da ba ta goyon bayan halayyar Rameez ko kaɗan; ta tsani yadda mahaifinsa ke ƙara ba shi gindin zama a duk abin da yake aikatawa.

"Abubakar, yaushe za ka daina ƙarfafa masa wannan halin ne?" Hajiya Safiya ta faɗa da muryar da ke nuna tsananin ɓacin ranta.

Alhaji Abubakar ya ɗago kansa, yana kallonta da murmushi. "Wane hali kuma, Safiya?"

"Ka ga yadda yake shigowa babu girmamawa, kuma ka san irin abubuwan da ake ta yaɗawa a kansa a gari, amma kai sai ka riƙa binsa da hakan," ta faɗa tana hararar Rameez.

Rameez ya ɗan ja tsaki a hankali, ya ciro wayarsa yana latsawa ko a jikinsa.

"Daddy, tell her to relax. It's too early for drama," Rameez ya faɗa a taƙaice, ba tare da ya nuna wani daraja ga mahaifiyar tasa ba.

"Rameez!" Hajiya Safiya ta kira sunansa a tsawace. "Ba ka da kunya ko kaɗan ko? Kana ganin saboda mahaifinka yana da kuɗi ne za ka ci gaba da wulakanta kowa a gidan nan?"

Alhaji Abubakar ya ɗaga hannu yana katse ta, kasancewar ya fi kowa son Rameez a duniyar nan. "Safiya, enough! Yaron nan ba ƙaramin mutum ba ne. Ya san abin da yake yi, kuma ya isa ya sarrafa kansa."

"To idan ya san abin da yake yi, me ya sa kullum sai an kira ka an sanar da kai wata sabuwar matsalar da ya jawo a gari?"

Rameez ya juya da niyyar barin wajen. "I'm heading out. You guys enjoy your morning."

Alhaji Abubakar ya bi shi da kallo cike da ƙauna. "Go, son. I'll see you later."

Hajiya Safiya ta bi shi da wani kallo mai cike da baƙin ciki har ya fice daga falon. Ta juya ga mijinta tana girgiza kai. "Abubakar, wata rana za ka yi nadamar wannan goyon bayan da kake ba shi har ya lalace gaba ɗaya."

Alhaji Abubakar ya ɗauki takardun da ke gabansa yana murmushi. "Safiya, ina da manyan matsalolin kasuwanci da zan warware. Kada ki ƙara mini da maganar Rameez, domin shi ɗin na musamman ne a wurina."

Bayan fitar Rameez daga babban falon gidan, ya isa inda aka parke sabuwar motarsa ta alfarma kirar Rolls-Royce Ghost. Ya buɗe murfin motar ya shiga, sannan ya kunna kade-kade masu sanyaya zuciya a cikin sautin da ya wadatar da kansa kawai. Tare da hura turakin sigararsa ta Dunhill, ya fizgi motar a guje, ya fice daga harabar gidan Alhaji Abubakar Matawalle kamar wanda ke gudun hijira.

A titi, gudu yake ba ji ba gani, yana mai nuna cewa shi ɗin wani ne da babu wanda ya isa ya isa da shi a birnin Abuja. Duk inda ya wuce, mutane na biye masa da ido saboda tsananin tsada da kasaitar motarsa, amma a wurin Rameez, hakan abu ne da ya saba da shi tun fil-al'azal.

Bai zarce ko ina ba sai wani shahararren lounge da ke tsakiyar birnin, inda abokinsa Zayyad da sauran takwarorinsa na daren shagala suka riga suka yi masa reserving na musamman. Yana isa, maigadi da ma'aikatan wurin suka gaggauta buɗe masa kofa cikin girmamawa, domin sun san wanene Rameez Matawalle—babban abokin hulɗarsu da ke watsa kuɗi ba tare da ya kalli lissafi ba.

Yana shiga cikin lounge ɗin, hayaki da sautin waka suka bugi fuskarshi. Zayyad ya daga masa hannu daga nesa, nan take ya karasa ya zauna a babban kujerar da aka kebe masa.

"Bro, ka makara yau fa," Zayyad ya fada yana dariya tare da tura masa wata kwalbar wine mai gwanin tsada.

Rameez ya lumshe idanunsa, ya ajiye sigararsa a gefe, sannan ya ce da wata muryar takama: "Akwai dan wani tarnaƙi ne da safe a gida, amma komai ya wuce. Ina sauran mutanen?"

"Suna nan zuwa. Amma ka ji labarin sabuwar yarinyar da ta shigo gari kwanan nan kuwa? Wanda ake cewa ita din ba mai sauki ba ce?" Zayyad ya tambaye shi yana mai kallonsa da wani irin kallo na zolaya.

Rameez ya saki wani ɗan guntun murmushin rainin hankali, fuskarsa cike da miskilanci da zafin zuciya. A wurinsa, babu wata mace a duniya da ta isa ta gaba da shi ko ta fito ta nuna masa tana da taurin kai.

"Wace ce ita da har zata gagara a wurina?" Rameez ya fada, yana mai jin cewa daren yau zai zama daren da zai sake nuna wa duniya cewa shi ne sarkin da babu mai bugar da shi a fagen takama da iskanci.

Miss Nasir ✍️