Kowa Ya Daka Ta Bado

Sample · Babi na ɗaya

Sanye yake da wata shuɗiyar shadda mai duhu lokacin da ya fito daga ɗaki zuwa falo. Ɗinkin jikin shaddar ya ɗan kama shi a wajen damtsen hannunsa da kuma ta ƙirjinsa alamun yana zuwa gym yana gina jikinsa. Matashi ne mai tsayi da ɗan hasken fata, ba zai wuce shekaru talatin da biyar ba. Kana ganin yanayin fatarsa ka san yana cikin hutu. Remote ya ɗauka a gefen TV ya ɗan rage ƙarar sautin sannan ya nufi inda matarsa ke zaune kan three seater da yarinya saɓe a kafaɗarta. Kyakkyawar mace ce mai baƙar fata wanda ke yalƙi. Ya miƙa mata hannunsa na dama, ta karɓa tana gyara masa cuff links ɗin hannun rigarsa"Ka canza kaya""Eh kar su raina ni"Ta yi ƴar dariya tana girgiza kai. Ta saka masa na ɗayan hannun. Ya saka babban yatsansa ya ya shafi kumatun ƴar shi da ke bacci ya ce "Sai na dawo""Kar ka manta fa, immediately after Ishaa" ya ɗaga mata kai alamun ya ji, ya yi ficewarsa. Motarsa ya shiga ƙirar Honda Accord silver color. Ya ware mata AC ya yi horn mai gadi ya buɗe masa ya fice. Bai tsaya a ko'ina ba sai banki, ya samu waje ya faka motar ya fito. Ya ɗan samu layi a wajen customer service ɗin dan haka ya zauna ya jira kafin layi ya zo kan shi. Ya samu kamar mintuna goma sha biyar yana dannan wayar kafin layin ya zo kan shi. Ya cike form ya saka bayanan da ake buƙata, kuɗi aka cire masa sau biyu garin yin transfer kuma ko ɗaya bai je ba. Ya miƙa takardar yana jiran a bashi ya yi thumbprint, ta shigo.Gaban shi ya faɗi! Ko shekara dubu zai yi bai ganta ba, zai gane ta. Ita ce. Shekaru sun canza ta. Kalar fatarta ta canza daga baƙin da ya sani ta koma mai haske sosai. Laɓɓanta sun ƙara duhu. Gabanshi ya ƙara faɗuwa! Zuciyarsa ta ƙara saurin bugun da taake. Wata doguwar riga ce a jikinta baƙa mai jar furrani sun kamata sosai, bai ɓoye komai na surar jikinta da ya yi ma mugun sani ba. Sanin da idan ya rufe idanunsa zai iya zana ta ba tare da ya yi kuskuren ko wani tudu, gangare da saƙo ba. Idanunsa na kanta ta cire baƙin gilashin da ta kafa a idanunta. Fuskarnan babu annuri, goshinta ya tattare alamun ranta a ɓace yake. Ta yi ma wata magana ta samu waje ta jingina da bango tana danna wayar hannunta. Yana so ya je ya sameta amma mai zai ce mata? Hi? Ya kike? I missed you? Me ake ce ma mutum bayan tsawon shekarun nan? Bayan tsawon shekaru takwas. Ba shekarun ba, irin rabuwar da suka yi. Me zai ce mata? I'm sorry? Ya yi saurin girgiza kansa kamar hakan shi zai cire hoton da ya haska a ƙwaƙwalwarsa. Wani ma'aikacin bankin ne ya zo ya tsaya a kusa da ita. Bakinta ya motsa amma bai ji mai tace ba. Ya ga sun nufi waje dan haka shi ma ya miƙe da sauri ya bi su. Yana fitowa ya ga sun sha kwanar ginin bankin dan haka ya yi wajen shi ma. Muryarta ce ta tsaida shi "Ka ɗauka ka ci bulus?" Muryarta ce. Amma kamar ba tata ba....

Continue reading free chapter