UMARNIN ZUCIYA.

Sample · 1.

*JANJANI!**HADIZA D. AUTA**FARKO.* Zaune nake a cikin katafaren falona, wanda ya sha kayan alatu kuma ya ƙawatu da ado irin na zamani. Babu motsin komai a cikin falon sai na agogon da ke bugawa, tare da ƙarar Ac. Zuzzurfan tunanin da na afka ya hana ni jiyo ƙarar wayata da ke gefena tana neman agaji. Sai da na kai kallona a kanta sannan na cire tagumin da na yi, ina sauke nannauyar ajiyar zuciya na ɗauki wayar. Ganin sunan mai gadinmu ya fito ɓaroro a cikin fuskar wayar; na ɗauka cikin rashin kuzari ba tare da na ce komai ba ina jiran cewarsa. "Hajiya kin yi baƙuwa, ta ce sunanta Zee Musa, a bar ta ta shigo ko a ce da ita ba kya ƙasar?" Ƙirjina ne ya hau bugawa kafin na ba shi amsa da cewa, "Bar ta kawai ta shigo." Ina gama faɗar hakan na ja guntun tsaki babu shiri, saboda sunan Zee da na ji a kunnena, ya saka ni jin wani kalar ɓacin rai ya ziyarci zuciyata. Duk da ina son ganin ta a raina, amma ko kaɗan ba na buƙatar duk wata kalma da za ta fito daga bakinta. Don ina da cikakken sanin ba za mu rabu ba sai mun yi faɗa, saboda ta kasa fahimtar halin da nake ciki, kuma ta kasa yi mini uzuri a kan ƙaddarar da ta ratso wa rayuwata. 'Da me zan ji?' Abin da na faɗa kenan daga zuciyata zuwa fitar numfashina. Wanda ban yi aune ba na ji wata siririyar ƙwallar da ta cika idanuwana nan take tana saukowa a saman kumatuna. "Ki yi haƙuri Zee, ni kaina na san ban yi wa kaina adalci ba. Amma kuma ba zan iya hana kaina abin da zuciyata take muradi ba." Maganganun da na furta kenan, kafin na yi wani kalar nishi ina miƙewa cikin sassarfa na haye sama. Kiran 'yar aikina na yi a waya, sai da na saita muryata gudun ta ji alamun kukan da nake yi, sannan na sanar da ita ta ji da lamarin baƙuwata idan ta ƙaraso kafin na fito. Kai-tsaye na shige ɓangarena, ban zame ko'ina ba sai a katafaren toilet ɗi na mai kama da ɗakin barcin wata mace. Duba da yadda aka ƙawata shi da abubuwan zamani, kuma tsaf-tsaf kamar a kwanta ƙasa a yi barci. Ban da ƙamshin sabulai da turarukan wanka da na banɗaki babu abin da yake yi. Gaban dogon mirror da ke jikin bangon toilet ɗin na tsaya ina kallon kaina, nan take na ji wani kalar kuka ya sake kufce mini mai ƙarfi. Na ɗauki lokaci ina rera sautin kukana kafin kiran wayata ya katse ni. Barin gaban madubin na yi na isa inda na ajiye wayata ina duba mai kiran. 'Zee!'Na faɗa a zuciyata cikin wani kalar rauni da nauyin da nake ji a tsakiyar ƙirjina. Wanke fuskata na yi cikin sauri sannan na shiga goge ta da towel ina sauke ajiyar zuciya wata bayan wata. Tsawon minti biyar na yi ina saƙawa da kwancewa, kafin na samu kuzarin goga wa fuskar tawa mai na shafa hoda, don ƙarfin hali irin nawa har da zizara kwalli, saboda kawai na ɓoye abin da ke cin raina ga kowa. Turare na ƙara shafawa kala-kala. Sannan na gayyato nats...

Continue reading free chapter