Free chapter · Read without an account

7

by Khadeeja Candy · HAFSATU MANGA (Yarinyar Kauye)


Anyi tiyata lafiya kuma cikin nasara kamar kullum, a Masallacin asibitin ya tsaya yai sallah la'asar sannan ya dauki hanyar gidan Anty Ummi.

 A harabar gidan yai parking sannan ya fito ya nufi cikin gidan cikin rashin dadin rai, be samu kowa a falon ba, kasancewar yaran sun tafi islamiya, Anty Ummi kuma tana kitchen tana girki guri ya samu ya zauna ya maida hankalinsa kan wani film da ake a African magic channel.

Yafi karfin minti talatin zaune a gurin sannan Anty Ummi ta fito daga kitchen sanye da abaya hannunta dauke da karamin roba, a hannun cushion ta zauna tana kallon dan'uwanta.

“Kaga yarinya ne?”

“Ban je namanta ba balle ma na ganta, nasan ba kusa zata tsaya ba”

Ya fada ba tare daya dago ya kalli inda take ba.

“Farhat din ma bata dawo ba har yanxu, na aika gidansu ance bata nan, na kuma kira wayarta a kashe Wallahi duk na damu”

Tabe baki yai. Sai ya dauko wata magana.

“Dada tasa an cire hotunan Haleema”

Ko a yanzu ma be kalleta ba, sai dai sautin yadda muryarsa ya karantar da ita bacin ran dake zuciyarsa. Ajiyar zuciya ta sauke ya zauna daidai saman cushion din tana kallonsa.

“Dada Yalwa tayi daidai kuma tayi abunda ya dace...”

Sai a lokaci ya dago kansa ya sakar mata mayan idanuwansa yana kallonta, be yi mamakin furucinta ba, daman ya tsammaci hakan ita ce mace ta biyu bayan Dada da take kokarin saka shi ya manta da Haleema.

“Lokaci yai daya kamata ace ka canja rayuwa Zain, a izuwa yanzu ya kamata ace ka yarda da kaddara kuma ka dauketa a yadda ta zo maka, shekara uku kenan da rasuwar Haleema a halin yanzu addu'a take nema ba tunani ba, mahaifinka ma baya jindadin rayuwar da kake kaine babba, amman kana maida kanka wani kalar mutum saboda mutuwa? Wacce tana kan kowa? Kai ma baka wuce ka mutum ba, balle kuma matarka da Allah be yi ta danka ba”

Dauke kansa yai yana sauke numfashi a hankali.

“Na kasa mantawa da ita ne Anty, tana yawan fada min tana tsoron kishiya, ina ganin kamar idan na auri wata ban kyautawa Haleema ba, musamman wacce suke son na aura din, uba daya suke da Hameeda amman kamar makiya suke saboda Hameeda bata son ta ko kadan, tana yawan min complain akan Hameeda, Hameeda ce kadai mace data hana Haleema zama lafiya da kwanciyar hankali a gidan nan, amman su kasa gane haka Mai Martaba da Dada suna son tsayawa akan sai na aureta, a ganinsu ita ta dace da ni saboda Haleema, a ranar da zata rasu ta rike hannuna, tana kuka tana cewa Zain karka barni ina jin tsoro, na tambayeta na ce tsoron me? Sai tace bata sani ba amman dai tana jin tsoro kuma bata son na tafi ashe tsoron mutuwa take, tsoron rabuwa da ni take, ina fita dakin da minti uku Allah ya karbi abarsa, i can't forget this”

Ya cikama bakinsa iska tare da yin shiru na wasu yan mintuna sannan ya cigaba.

“Anty bana jin akwai wata mace da zan iya zaunawa da ita naji dadin rayuwa da ita, itama kuma ta jidadin rayuwa da ni, Musamman wacce suke son hadani da ita, bana son Hameeda Anty kuma ni bana son bazawara, hankalina baya kwanciya da macen da bani na fara kusantarta ba, a kullum ina kallon Hameeda kamar ita ta kashe min Haleema saboda ita ta sakata a cikin halin da ta shiga wanda yai sanadiyar mutuwarta, taya za'ayi na zauna da ita? Taya zan ga farinta?”

Anty Ummi ta sauke ajiyar zuciya mai nauyi, tasan yadda Zain yake son matarsa, tasan irin gwargwamaryar da matarsa tasha a gidan da irin kiyayyar da Hameeda ta nuna mata.

“Wannan be isa ya zama dalilin da zaisa kayi ta zama ba aure ba, irin Haleema suna nan da yawa a duniyar nan, kuma nasan mai martaba yana kaunarka sosai xai so abunda kake so, dan haka duk yarinyar daka kawo xai sota matukar kana sonta, kayi kokarin neman kalar matar da kake so ka gabatar masu da ita tun gabanin su gabatar maka da Hameeda a matsayin matar aurenka, nasan ko Mai Martaba be yi haka ba, Dada Yalwa na daf da yin hakan”

“Kin sani Anty, a dokar da kuma al'adar masarautar Rishim, yayan masarautar basa auren wacce ba jininsu ba, ko kuma ba jinin fulani ba, taya zan karya dokar da zata sa Mai Martaba ya cigaba da yi min kallon marar tarbiya, Dada kuma ta tsani matar da za a kawo a gidan?”

“Ka bincika duk matar da kake so ni kuma zan tsaya maka kai da fata wajen ganin ka aureta, lokaci yayi da ya kamata ka rushe wannan dokar da al'ada ta gidanku, kana da hakki Zain kamar ko wane da, be kamata ka bar sarautar gidanku tana tauye maka hakki ba, kai ne Baban dan Mar Martaba idan ka lalace magauta dariya zasu masa kuma su maka, idan kuma ka gyaru shi kansa zai ji dadin hakan”

Da sauri Zain ya mike tsaye fuskarta dauke da mamaki, maganar Sadiq ta dazun xe ta fado masa a rai na yarinyar da tai hadari kuma ba a san kowa nata ba, what if Hafsat ce.

“Anty ina zuwa”

Ya nufi kofar fita daga falon da sauri har yana kokarin tuntube. Anty Ummi kam da kallon mamaki ta bishi da shi har ya fice. Cikin a hanzarce ya shiga motarsa yai mata key, horn biyu mai gadi ya bude masa gate ya hau titi da gudu. Cikin yan mintuna ya isa ZAINUDDEN SPECIAL HOSPITAL, yana aje motarsa ya nufi Emergency da sauri, Nurses dake Emergency din sai gaisheshi suke amman be amsa ba, dakunan ya soma bi daya bayan daya yana dubawa har ya kai karshe be ganta ba, layin yan hadari ya nufi ya soma duba gadajen dama dana hagu, sai daf da zai kai karshen dakin ya hangota kwance saman gadon an daura mata drip fuskarta da bandeji da kuma kafafunta.

 Tsaye yai yana kallonta ya kasa karasawa inda take, tsigar jikinsa sai tashi take. Sai da ya hade yawun bakinsa sannan ya iya daga kafasar kamar marar lacca ya karasa kusa da gadonta, kallo daya yai ma fuskarta tausayinta ya kamashi yanayin yadda take numfashi kawai ya isa ya fahimtar da shi mawuyacin halin da take ciki.

 Yasha ganin hadari kala kala ya sha yin tiyata ko ya duba marasa lafiyar da ido baya iya daukar ganin ciwon, amman be taba cin karo da wacce ta bashi tausayi sosai kamar Hafsat ba, duk wani shiga da fitar numfashinta aunashi yake da nasa, yana jina jin zafin ciwon dake jikinsa kamar a jikinsa yake. Hannu ya kai ya taba jikinta, sai yaji temperature dinta very high. File din dake saman drawer ya dauka yana dubawa, sai ga wasu nurses uku mata sun iso gurin gabansu sai faduwa yake, a zatonsu wani abun ne akai a kuskure ko kuma ba daidai ba, domin sun san halin Zain matukar suka saba wata doka ko suka yi wani abu ba daidai ba, zai iya korarsu.

“Waya dubata?”

Daya daga cikinsu mai sanye da karamin hijab half sunna ta amsa masa.

“Doctor Shukura, tace za a kara mata jini...”

“Ban tambayi ki”

“Sorry Sir”

Ta fada da sauri.

“Ina wadanda suka kawo ta?”

“Ba musan inda suke ba Sir, amman na fada musu a kawo jinin sai suka ce wai wanda ya kawota yaje gurin meeting ya dawo, su kuma ba yan'uwanta ba ne”

“A canja mata gado a kaita Mr Zain rooms”

“Yes Sir”

Yana fadar hakan ya juyo ya dawo gurin da nurses masu kula da gurin suke ya shiga can ciki ya dauko syringe tare da safar hannu da wata karamar robar dake daura drip, yana fitowa dakin nurses din na kawo gurin sun turota a gado. Tsayar da su hai ya saka safar ya daure dantsenta ya saka saka mata allura ya zuki jininta, Sannan ya cire sirinjin, Nurse din dake bayansa ta mika masa kada ta danne gurin sannan ya kwance robar da tsinin allurar ya jefar a kwandon shara.

Da sauri suka wuce da ita, shi kuma ya nufi gurin gwajin jinin, in few minute aka gwada jinin aka bashi result kasancewar shi ya zo da kansa, yayi mamakin ganin jinin ya zo daya da nasa, be wani bata lokaci ba. Gaje gurin dibar jini aka dibi nasa leda biyu. Sannan ya dawo office dinsa ya bude freezer ya dauki madara da maltina ya shanye, sannan ya sake fitowa ya kama Ward din dakin Mr Zain, dakunan da aka tana da saboda masu hannu da shuni, tun daga yanayin gurin ma ya isa ya fahimtar da mutum haka, dakuna ne masu yawa aka jera kowanne da numbersa.

  Wayarsa ya fiddo daga aljihu ya nemo number Shukura, bugu biyu ta dauka.

“Tambaya min Farida wane daki ta kai yarinyar”

“Okay”

Bayan an seconds ta amsa masa da

“Mr Zain Room 37”

Kashe wayar yai ya kara gaban dakunan dake kusa dasu yana duba numbers din dakunan har ya isa 37, hannu ya kai ya murda kofar ta bude, daya daga cikin Nurses din da suka kawota tana tsaye a kanta tana duba file dinta. Tana ganin Zain tasha jinin jikinta.

“Zaki iya tafiya”

Cikin sauri ta fice daga dakin, sai ya karasa inda Hafsat mutsu mutsu amman idonta a rufe tana son yin kuka. Zaunawa yai gefen gadon yana kallon fuskarta, har a yanzu tausayinta yake ji duk kuwa da kasancewar yasan ba a hayyacinta take ba. Yanayinta sai ya masa kamar na Haleema lokacin da bata da lafiya, hannu ya kai zai shafa fegen fuskarta sai kuma ya gimke hannun ya sosa lips dinsa. Wayarsa ce tai ringing kamar daman jiran kiran yake sai yai saurin daga tare da karawa a kunne ba tare da ua duba mai kiran ba.

“Assalamu alaikum”

Jin muryar Hajiya Hadiza uwargidan Mai Martaba kuma uwa a garesu yasa shi natsuwa sosai, tare da amsa sallamar.

“Wa'alaikissalam Hajiya”

“Zain Mai Martaba yana son magana da kai, magana ce mai muhimmanci, sai dai ina son duk abunda zai fada maka ka kasance mai biyayya agareshi”

“Magana tana da nauyi ne sosai?”

“Idan ka zo zaka ji”

Daga haka ta kashe wayar, yasan idan har magana bata da muhimmanci ba zata kira tace yai ma Mai Martaba biyayyah ba, daman ta kanyi kokarin dorashi a hanya a duk lokacin da ta fahimci ana son hadashi da Mai Martaba ko Dada, domin ita kadaice take masa son gaskiya a cikin matan sarki.

_Ibrahim ka zo anjima kadan ka sakawa patient din dake Mr Zain ward room 37 ka saka mata jini, Mai Martaba yana nema yanzu_

Sakon daya aikawa abokinsa kenan na karta kwana, sannan ya mike tsaye ya fice daga dakin, zuciyarsa cike da sake sake.

FARHAT POV.

 Rayuwa tana zuwa ma ko wane bawa da abunda aka rubuta zai same shi ne, alkalamin kaddara baya barin kowa kuma baya manta kowa balle kuma har ya tsallake ka ya fada kan wani, iyakar abunda aka rubuta zai samu bawa a dole zai sameshi, ba mahana balle kuma matari.

 Ranar yau ta zame ma Farhat bakar rana, domin ta zo mata da abubuwan daban daban wadanda suke dara a rayuwar ko wane bawa. A yau bakin labari ya sameta na yaudarar da Auwal yai mata mutumen data shirya bada ranta a gareshi, wanda ta sadaukar masa da soyayyarta ta mallaka masa komai nata, a yau ya rumtse ido ya zabi kasancewa da wata wace ba ita ba, ya zabi wata a matsayin abokiyar rayuwarsa ta har abada.

 A yau Anty Rukaiya ta koreta mace data rike tamkar mahaifiyarta, macen da mijinta tsaya kai da fata wajen inganta rayuwarta, ya mayarda ita mutum ya bata ilmi ya wayar da ita, mace da take yi ma kallon uwa kuma uba a gurinta,

 A yau tai tafiyar da take hangen kanta kamar a mafarki, taya zata yarda ita dai din ce ta hadu da masu satar mutane domin biyan kudin fansa? A yau ita ce a zaune cikin kasurgun daji da babu kowa a gaban da yamma sai itace da ciyayi, a yau taji abunda mutane da aka dauke aka rabasu da danginsu suke ji, a yau ta fuskancin wulakancin da ake yi ma mutanen da aka yi garkuwa da su, idan zasu je fitsar namiji ake sakawa ya rakasu da bindigarsa, a gabansa suke komai, a yau ta ga matan da barayi suke takawa su keta musu haddi, a inda suke zaune babu fitila kuma babu abun rufa balle matashin kai, a zaune wasu suke kwana wasu kuma su kwanta hannayensu da kafafunsu a daure kamar dabbobi, idan suka yi kuskure kadan sai su zanesu da bulala, a yau din dai da aka kawota an kashe mutane uku a gabanta mutane da ba a biya kudin karbarsu ba.

Da babura suka hauro da su cikin dajin bayan sun karbe komai masu, sai suka zabi wadanda suke ganin zasu iya samun wani dukiya a gurin iyayensu suka tafi dasu ciki har da Farhat, ranar yau ta zame ma Farhat bakar rana, daren kuma ya zame mata bakin dare.

“Keee... ”

Daya daga cikinsu ya tsaka mata tsawa, a firgice ta kalleshi, zuciyarta na mugun bugawa kamar zata fito fili.

Want the next chapter?

ui.create_a_free_arewapen_account_to_save_progress_unlock_paid_chapters_fol