Free chapter · Read without an account

6

by Saliha Ahmad Na'ibi · REINA

06.... Durƙushe Saudat take a kan guiwowin ta cikin azabar ciwo, tana faman juya kai da ciza laɓɓen bakinta, har Yaseer ya shigo ya same ta a cikin wannan hali.
Da gudu yayi kanta ya riƙe ta cikin kaɗuwa yana tambayar abinda yake damunta.

Riƙo hannun shi tayi cikin dagewa tace "Yi gudu ka kira min danejo Yaseer" sannan ta hankaɗa shi kaman hakan zai ƙara masa sauri ne. Ya kusa faɗi ƙasa yaci da baki amma ya ƙoƙarta ya ruga a guje ya bar gidan cikin Sa'a Suhail har barci ya ɗauke shi dan ko shima yaji gajiyar a jikin shi.

Buga ƙofar falangen yake da iya ƙarfin shi wanda har sanda sauran maƙwafta suka leƙo shi ta katanga don ganin ko wani abun ne yake faruwa kafin jikar danejo ta buɗe ƙofar da magagin bacci a idanun ta.

Bai tsaya sauraron tambayoyin ta ba ya faɗa cikin gidan zuwa ɗakin da ya kasance na ƴar tsohuwa mai shekaru 61 a cikin gidan, da aci balbal ɗinta a bakin ƙofa yana haska mata duk mai shiga da wucewa don yin aikin gadin ta na sa kai.
"Danejo muje, Ummana dan Allah" yace yana mata rawar banjo kamar mai jin fitsari saboda matsuwa.

"Haihuwar ce tazo?" Ta miƙe da ƴar saurin ta sannan ta janyo zanin ta daga kan ƙofa ta ɗaura a kan underwear dake jikinta ta nemi riga da hijabi ta saka sannan suka fice a gidan.

A yanayin da ya tafi ya barta suka dawo suka same ta ga baki ɗaya ta jiƙe sharƙaf da zufa amma ruwan naƙuda bai fashe mata ba tukunna sai nuƙurƙusuwa take dai tukun.

"Jeka ka kira min mahaifin ka" tace da Yaseer. Sai ya tsaya turus, gidan Alhaji Tahir kenan zai koma? Idan yaje zai same shi a can ɗinma a irin wannan lokaci ?.

"Bayi kusa Danejo gani nan ko menene ake buƙata zanyi mata" ya gyara tsayuwar shi yana saka fuskar jarumta dukda kuwa gabaki ɗaya jikin shi kyarma yake yi. 
Tsakanin shi da Suhail shekaru 6 ne harda rabi an haife shi lokacin bayi da wayo don haka yaune rana ta farko da yaga mahaifiyar shi na naƙuda da idanun shi.

Ta ɗan gutsiri goron ta kafin tace "to jeka gidan malam iro ka kira min Huwaila, kace tazo Saudatu na kan guiwa."
Toh yace, ta Juya ta koma ɗakin shi kuwa ya ɗiba a guje ya fice zuwa gidan da aka aike shi.

Tun da ya hango Yaseer a guje zuciyar shi ya tsinke, Kamal yayi saurin tsare shi don Yaseer baima lura dashi ba. "Ina zaka je? Me ya samu Saudatun?" 

"Danejo ne ta aike ni gidan malam iro" 

Sai kawai Kamal ya fashe da kuka, shikkenan tashi ta ƙare mishi, Saudat ta mutu a haihuwa ta barshi, sanin cewa Malam iro shine limamin masallacin da ake bada hayan makara da motar ɗaukar gawa. Kyarmar da jikin Yaseer yake yi ya tabbatar mishi da tunanin shi, wataƙil an ɓoye mishi ne shi yasa shima bai fara kukan ba, amma har ya fara jiye musu rashin uwa.

"Saudatu na yafe miki, Allah ya yafe miki, Allah yasa kin huta matar aljannah" yace yana riƙe da hannun yaseer ɗin gamm hawaye nabin idanun shi. 

"Abbah babyn bata zo ba fah, ance inyi sauri ne in kira Umma Huwaila"

Kamal ya ɗago kai yana hanzarin share hawaye, "yanzu Saudatun suna tare da danejo?"

Gyaɗa kai Yaseer yayi, kamal yayi saurin angiza ƙeyar shi, "yi sauri kaje ka kira ta, ka tabbatar kun taho tare" da toh Yaseer ya ci gaba da calla gudu a cikin lunguna.

.....

Yana jin ihun ta, yana jin nishin ta, yana jin kukan ta, ba kuma za'a barshi ya shiga ya ganta ba, sannan ya rasa abu ɗaya da zaiyi takammamme ya samu nutsuwa a ranshi, yayi ƙoƙarin shigar da hadda amma kaman yana zuba ruwa a kwando, har zuwa yanzu da yake da tabbacin dare ya raba a cikin hali ɗaya ake, har kukan wahalar da Saudat take yi galabaita yasa ya disashe sai gunji kawai ake ji.

Fita yayi kawai yin alwala ya hango mahaifin shi kwance a ƙofar ɗaki saman tabarma yana shaƙar bacci se faman kai duka yake wa sauro, ai ko halin da Saudat take ciki bai dame shi ba sautin kukan ta ya isa ya hana shi rintsawa. Yaseer ya girgiza kai ya ƙarasa ya ɗauro alwala ya koma ɗaki yaci gaba da nafilolin shi yana yiwa umman shi addu'ar sauƙa lafiya.

Wuraren assalatu Danejo ta fito daga ɗakin itama tayi sharƙaf da zufa don da gaske haihuwar tazo da gardama. Da kamal wanda yayi pillow da dantsen hannun shi taci karo bakin shi a buɗe yawun barci na dalala.

Ƙafa tasa ta shure shi ya tashi a firgice ya zauna. "Ta sauƙa ne?" Shine abinda ya fara tambaya.

"Ban sanin ba soko kawai! Kaje ka taso mana malam Iro yazo da motar gawa kuma" 

Tazo zata koma ciki yayi saurin riƙo ta. "Motar gawa dai kika ce Danejo?" Sai ya sake fashewa da kuka "Innalillahi wa inna ilaihirrajiun, Shikkenan na shiga uku na a duniyar nan! Yaya zanyi rayuwa babu Saudatu? Me yasa zaki tafi ki barni a irin wannan lokacin Saudatu?"

"Bata tafi ba tukun amma ta kusan tafiyar tunda sokon miji gareta. Dalla yi saure kuzo da mota mu kaita asibiti, ko akwai inda zaka samu abin hawa da wannan lokacin?" 

Yayi saurin share hawayen "me yasa zamu je asibiti danejo? Naga duka haihuwanta a gida take yinsu asiri a rufe"

"Toh wannan da gardamar shi yazo ko ni kake so in shiga in jawo shi?" Girgiza kai yayi sannan ya saka takalmi ya fice da hanzari har yana tuntuɓe da ƙofa. 

Haka aka zo da motar bakin lungun su, Yaseer ya ɗauki Suhail ya kai shi maƙwafta da aka ce suje can su zauna har su dawo daga asibitin idan ta sauƙa amma yana ajiye Suhail yayi saurin dawowa domin bama zai fara iya zaman har sai sun dawo yasan halin da mahaifiyar shi take ciki ba.

Ya ɗauka musu ƴar jakan kayan haihuwar Saudat da yanzu Huwaila ta haɗa mata ɗan abinda ta samu a ɗakin sannan huwailan da Kamal suka taimaka mata har zuwa jikin motar, jikin ta duk ya gama laushi, a bayan motar duk suka jibgu kaman ragunan layya Yaseer yana faman mata sannu, kamal da malam iro suna gaba har asibiti.

Da ƙyar da suɗin goshi suka yarda suka karɓe ta ganin saida suka bari ta zama sauran gawa kafin suka kawo ta, sai a Sannan ne Yaseer ya zubar da hawaye domin abin ya fara wuce ɗan ƙaramin tunanin shi, Kamal kuwa tunin cewa kuɗin da ya samu ya amso daga wurin Alhaji Tahir yanzu duk karɓewa zasu yi yake yi. Shiyasa bayi son zuwa asibiti, abu kaɗan zasu yi maka amma sai sun ƙwaƙwule maka aljihu.

Ai kuwa ana shiga sallan asuba basu fito ba Saudat ta santalo ɗanta namiji. Aka kintsa su kafin aka bawa su kamal daman shiga su gansu bayan an gyara su an maida su ɗakin hutu sannan kuma Akwai kuɗin kayan amfani da suka ara masa aka yi musu amfani, kuɗin buɗe file, kuɗin gado da kuma kuɗin magani, wai a hakan ma karɓan haihuwa kyauta ne tunda babban Asibitin gwamnati ne.

Saida suka tabbatar ya lale musu dubu sha ɗaya da ɗari shida kafin suka barshi ya shiga ganin jariri, gashi dai yana murna Amma duk sun gama kwashe mishi tattalin arziƙi daman Dubu ashirin ya samu ya karɓo daga wurin Alhaji Tahir yanzu sauran dubu takwas da ɗari huɗu.


"Kai Saudatu ma akwai raki, abun nan da an saba yanzu yabi jiki, aida saidai kawai kiyi abin ki ke kaɗai in yaso da anzo yanke cibi sai ki kira ni in ya gagare ki" abin da kamal ya fara jiyowa kenan yayin da yake wuce gadajen mata masu sabbin jarirai don zuwa wurin tashi matar da abinda ta haifa.

Saudat kuwa murmushi kawai take don ita tasan azabar da ta sha, tunda dai an sauƙa lafiya falillahil hamdu, ita karan kanta Danejon saida ta yabi ƙoƙarin ta a daren jiya amma gashi ba'a je ko ina ba ta sauya magana.

Sallama yayi musu ya ɗaura da "Sannu Saudatu, yaya daɗin jikin?" Da alhamdulillah ta amsa. Yace "Allah ya ƙara lafiya, sannu da ƙoƙari" kafin ya amshi babyn da Yaseer ya rungume tsaff a ƙirjin shi.

Yana da haske irin na jariran nan amma fatar kunnen shi nada ɗan duhu, ya murmusa tunawa da yanda mahaifiyar shi ke ƙulafucin ƴa mace gashi haihuwa uku har yanzu Allah bai ga daman bata ba.

Dabinon da ya siya yanzu a bakin asibiti ya ciro daga aljihu ya gutsura ya tauna sannan ya tura shi a bakin babyn dake barcin shi hankali a kwance. Ya ɗau lokaci yana mishi addu'a kafin ya ɗago kai yace, "nayi magana dasu goggo sunce suna hanya zuwa azahar in sha Allah sun sauƙa, sai mu hanzarta mu koma don tarbar su."

Basu ƙara ɓata lokaci ba suka tattara komatsan su kasancewar an tabbatar da cewa daga uwar har abinda ta haifa suna cikin ƙoshin lafiya don haka basu jira hutun awa shidan bayan haihuwa ba ya saka matan a keke napep sannan mazan kuma suka shiga motar gawan su suka koma gida.

.....

Idan ka shigo hall ɗin kafin idanun ka yakai kan allon sunar dake kan stage zaka ɗauka wani gagarumin event ɗin biki ake a cikin ta. 

Babu kowa a wurin bayan event planners wanda ke sanye da uniform ɗinsu na aiki, amma an gama shirya wurin an tsara shi tun daga kan decorations, DJ, abinci da abin sha, dessert station, sannan ko wani table akwai numbobi a saman shi haɗe da jakar suna mai hoton baby don ba za'a kira shi da laidan suna ba, bayan snacks da drinks da aka saka a ciki suna ɗauke da jotter hard cover, biro da kuma turmin zani ko sallaya irin masu kauri da laushin nan, Wanda ke ɗauke da laidoji sune tables ɗin baya-baya amma shima sallaya ko turmin zani ya bambanta su sai kuma nasu laida ne ba jaka ba amma kuma komai yaji. 

Numbobin dake kan table ɗin shi zai taimakawa kowa gane inda aka amince masa ya zauna wanda yake matsayi by matsayi, don haka duk wacce aka bata Katin gayyata zata shigo dashi sai ta nunawa masu aikin wurin su kuma zasu taimaka mata wurin samun mazaunin ta cikin tsari.

Zuwa ƙarfe huɗu da rabi na yamma hall ya kusa cika Dj da abin motsa baki suna taya baƙi hira, uwar gayya kawai ake jiran isowarta.

Saida aka saka musu kiɗan da ya dace dasu sannan aka buɗe musu ƙofar suka fara takowa cikin hall ɗin sanye da ashoben su lace mai tsadar gaske na iyayen jaririya, sun sha kyau harda makeup kowa ta zuba gold a wuya, hannu da kunne iya yanda nauyin ta zai iya ɗauka sai faman hura hanci suke, amma Duk wankan su basu Isa su dishashe Hajiya Fauziyya ba wannan alƙawari ne alhaji Tahir yayi musu, kayan da yake jikin ta kawai yayi kuɗin nasu na mutum uku gashi tasha makeup da ya karɓi fuskar ta haɗe da fara'ar da ya ƙara mata kyau da kwarjini, Baby Hafsatu kuwa na cikin wani hand basket da Hajiya lubabatu ke riƙe dashi ba zasu ma iya riƙeta a hannu ba saboda abu irin na bidi'a.

Har kan stage suka yi musu rakiya aka cire Reina daga ƙaramin hand basket ɗin aka saka ta a babba da aka kafa shi a wurin yasha ado da su flowers ya ƙawatu sosai ga wasu manyan teddys da idan ɗaya ya faɗi a kanta bisa kuskure hala sai dai a ɗauki gawar ta.

Aka gyara mata kwanciya kowa sai ƙoƙarin cusa kai yake a cikin su kafin aka zaunar da Hajiya Fauziyya a haɗaɗɗen kujeran dake gefen basket ɗin bayan su kuma ƙaton allo ne da aka rubuta 'Welcome to the world Hafsatu Tahir Kamal (REINA)' shima allon ya ƙawatu abin sai wanda ya gani.

Basu ɓata lokaci ba Mc ya gaida baƙi ya bawa Hajiya Fauziyya mic tayi musu godiya da halarta kafin aka fara gabatar da agenda na gaba wanda shine gabatar da kayan sunan da aka kawo wa sarauniya Reina da mahaifiyar ta. 

Na mahaifinta aka fara shigowa dasu a jere masu kawo akwatin ma t-shirt ɗin jikin su da hoton Reina mai nanannen hanci a jiki. 
Kowa ya zuba idanu don ganin yawan su, amma abin yaso basu tsoro ganin sai shigo da akwatuna kawai ake sunƙi ƙarewa. Duk wanda yake na Reina ne a gaban gadon ta suke jerawa na hajiya Fauziyya ma a nata gaban ake jere mata mutane tuni an fara shooting da wayoyi bayan wanda photographer yake yi domin a samu na yaɗawa a yanar Gizo.

Saida aka jere akwatuna set uku-uku guda sha biyar kenan ma kowa a cikin su kafin aka ƙara ma Reina da baskets na baby care, bargon yara, da sauran abinda ba zasu shiga cikin akwati ba.

Baki ɗaya sai jikin su Hajiya hauwa yayi sanyi dukda dai sunyi tsammanin hakan ga Mc kuwa sai washi yake ma uwa da uban Reina dama ita jaririyar dake cikin tsumma, nan aka mishi albishir uban yarinya yayi mishi kyautar Naira miliyan biyu, saida ya taka rawar murna.

Ba'a buƙatar ɓata lokaci wurin bubbuɗe wannan kayayyaki don haka aka kira wanda suka shigo dashi don su fita dashi a saka a mota a maida shi zuwa gidan mai jego ba yare da ɓata lokaci ba gudun kada a samu matsala, Su Inna larai suna can suna gadin gidan.

Nanfa aka fara gabatar da gudumawar ƴan uwa, da manyan baƙin da aka gayyata. Ƴan uwan Alhaji Tahir mata kowa tayi nata kayan sai da ta saka mijin ta yayi nashi shima don haka akwati set bibbiyu suka dinga jerewa a wurin, huɗu na hajiya Fauziyya huɗu na Reina. Baƙi ma sun gwada tasu bajintar matuƙa don babbar baƙuwar mu matar gwamna sabuwar dalleliyar mota ta bawa baby.


......

*Toh Reina da an tashi daga suna sai ki tuƙa mu a motar ki zuwa gida😹💔*

*Lallai sunan wannan littafi na shan pronunciation 😂😂😂 daga masu Reena, Raina har su Rayina😂 Ina godiya da ƙoƙarin bin labarin dai🥰*

*Ku cire 'I' ɗin idan kuka zo furtawa saboda silent ne, sai ku karanta shi a matsayin RENA. ma'anar REINA kuma a yaren Spanish shine Sarauniya. Ana yawan amfani dashi a matsayin nickname ko endearment haka tsakanin mata da miji ko saurayi da budurwa*

Want the next chapter?

ui.create_a_free_arewapen_account_to_save_progress_unlock_paid_chapters_fol