Chapter 45-46

_WRITING BY AMANAR COOL_✍️

*YOUNG TALENTED WRITER'S ASSOCIATION (YOTA/021)*

Page 45&46

__________Ƴan kai amarya ma sun samu tarba ta mutunci da karramawa a wajen Atika da maƙota da ta gayyato, nasiha aka ƙara yi mata sosai kafin suka bar gidan, ba yadda Afnan ba ta yi ba akan Maryam ta zauna, amma ƙememe Asabe ta ƙi barin ta, ta tasa ƙeyarta gaba, ta ce "Yo hauka muke yi da za a bar miki ita, shi angon na ki ki kai shi ina?".

Afnan na ji na gani aka watse gaba ɗaya, aka barta ita kaɗai, tsoro ta rinƙa ji, ga damuwa tayi mata yawa, hakan ya sa ta fashe da kuka. Tunanin Mamanta da ya addabi zuciyarta, ya ƙara bijiro mata, tasan Mama na cikin damuwa ita ma.

Sarkin fada ne riƙe da waya a hannunsa, wata lamba ya kira ana ɗauka.

Ya ce "Wai ya aka yi haka ta faru ne? Tunɗazu nake saka ran ganin yaron nan ya zo amma shiru bai zo ba, ya ku ke so na yi da ƴar mutane ne? Ko so ku ke ku nuna mini ban isa ba ne? Yanzu gashi an kawo ɗiyar mutane babu shi ba alamar shi, shin hakan dai-dai ne? A kawo ɗiyar mutane a ɗaki a ajiyeta ita kaɗai kamar mayya? Gaskiya ban ji daɗin wannan abin ba, yanzu da bai zo ba ya kuke so na cewa iyayen yarinyar nan? ko ɗazu sai da mai gari ya tambaye ni, na ce masa ai yana hanya yau zai ƙara so. Shin ko so ku ke dangi suyi mini dariya? dama suna jin haushin shiga lamarin ku da na ke yi".

Shiru ya yi ya na sauraran abin da ake gaya masa a cikin wayar

Daga baya ya ce "To shikenan, amma ya tabbatar da gobe ya zo garin nan, in ma zaman ne ba zai iyaye a nan ba, sai ya ɗauki matar tasa". Da ga haka ya kashe wayar ya na cigaba da masifa. Dan ba ƙaramin ɓata masa rai suka yi ba.

Atika ta dube shi ta ce "Ka yi haƙuri mai gida, gaskiya bai kyauta ba, ni kaina banji daɗin wannan abin ba, wallahi da na kalli yarinyar sai da ta ba ni tausayi, yarinya kyakkyawa da ita, kuma da alamu akwai nutsuwa a tattare da ita".

Sarkin fada ya ce "Ni ma ina jin tausayin yarinyar, musamman yanzu sai Allah yaron nan in ba kunyata ni zai yi ba".

"Ka yi haƙuri in sha Allah hakan ba za ta faru ba, ni yanzu damuwata yadda za ta kwana ita kaɗai a ɗakin nan, gashi yanzu mu ba yara ne damu ba, balle ace su taya ta kwana, ɗazun ba yadda ba ta so a bar mata ƴar uwarta ba, aka ƙi, na so na saka bakina akan a barta ɗin. To ina gudun su gane mijin baya nan".

Tsaki ya yi, ya na faɗin "Yara basu a je komai sai shirme da shiririta, ana yi musu gata ba sa gani". 

Haƙuri Atika ta shiga bashi, da ƙyar ya yi shiru ya daina mitar da yake.

Allah sarki Mama tun jiya cikin damuwa take, tunanin yaranta ya saka ta a gaba, ga Baba ya yi halin ko in kula da ita, ta na son ko da muryarsu ne ta ji, tana son sanin halin da suke ciki. Duk da tasan inda suke ba za a cutar da su ba.

Sai dai idan ta tuna da rashin sanin wane irin miji Afnan ta aura abin na ɗaga mata hankali, da ƙara saka ta a damuwa. Duk da ta na yi mata addu'a da fatan Ubangiji ya haɗa ta da miji na gari mai tsoron Allah, haka dai ta kasance cikin damuwa, komai cikin sanyi jiki take yinsa.

Afnan ta daɗe ta na kuka sai da ta ji kanta ya yi ciwo kamar zai rabe mata gida biyu, sannan tayi shiru ta daina kuka. Tun ta na baza ido, da jiran tsammanin ganin wanene mijin da Allah ya haɗa ta zama da shi a matsayin abokin rayuwa, amma shiru babu shi babu alamar shi, tsoro ne ya ƙara kamata, ta duƙunƙune guri ɗaya, ta fara tunanin to kodai mijin baya sonta ne? Shi ma auren dole ne aka yi masa.

Ta na nan zaune tayi jugum idan ta gama wannan tunanin sai wannan a haka har bacci ya ɗauke ta.

Kiran sallar farko a kan kunneta a ka yi shi, a hankali ta miƙe zaune, ta kunna filitar hannun da ta gani a ɗakin, can gefe ta hango buta, miƙewa tayi ta ɗauki butar tayi waje, dudubawa tayi har ta ga inda banɗakin yake, bayan ta fito alwala tayi ta koma ɗaki, ɗankwalinta ta shimfiɗa tayi nafila sannan ta zauna ta na lazimi, sai da aka yi assalatu ta miƙe tayi raka'atanin fijir, sannan ta gabatar da sallan asuba.

Zama tayi ta na addu'a tare da yi wa Allah ki rari, ta na kai masa kukanta, ta na nan zaune ta ji ana sallama.

Amsawa tayi, ta tashi tsaye fitowa tayi, haske har ya fara bayyana.

Atika ce ta shigo domin ta duba ya ta tashi

Afnan a murya ta gane ta, saboda jiya da aka je da ita wurinta fuskarta a rufe take.

Duƙawa tayi har ƙasa ta ce "Ina kwana Inna"

"Lafiya ƙalau Alhamdulillah, fatan kin tashi lafiya? Ya baƙunta da kuma kaɗai ce?"

"Alhamdulillah"

"Ki yi haƙuri na rashin ganin mijin na ki, jiya abin hawa ne, ya lalace musu a hanya, da yake baya gari, kin san ƙarfen nasara bashi da tabbas".

Sunkuyar da kai tayi ta ce "Babu komai".

Atika ta ce "To ma sha Allah, dama zuwa ne nayi na duba ki, bari na je a haɗa abin kari sai aka kawo miki".

"To" ta amsa

Atika ta juya ta bar gurin, Afnan bin gidan da kallo tayi, a fili ta ce "Alhamdulillah Allah na gode ma da wannan ni'imar da ka yi mini".

Ɗaki ta koma tayi zaune, tare da yin tagumi

Kamar kullum yau ma Haidar bayan ya dawo daga masallaci, ya shiga ɗakin Umma domin ya gaisheta, zama ya yi ya ce "Umma barka da safiya, fatan kin tashi lafiya?"

Shiru tayi ba ta ce masa ƙala ba, ta ci gaba da jan carbi

Gyaran murya ya kuma yi, ya ce "Umma barka da safiya...." "Dakata riƙi gaisuwarka ba na buƙata, kuma ka tashi ka fitar mini a ɗaki".

"Subhanallah! Umma fushi ki ke da ni har haka? Please Umma dan Allah kiyi haƙuri, ki fahimce ni, Umma ba zan iya jure ganin fushinki a gareni ba, da wanne zanji?".

"Haidar tunda nake da kai ban taɓa baka umarni ka bijire mini ba sai jiya, ka ba ni mamaki Haidar, a tunanina duk hukuncin da zan yanke a kanka batare da sanin ka ba, kuma ka karɓa ka yi mini biyayya a kai. To ɗan uwana ma ya isa ya yanke shi akan ka, amma sai kanuna mini bai isa ba, ni ma ɗin da na ke ganin na isa na tursasaka ka nuna mini a wannan karon ban isa da kai ba. Tunda nake da ɗan uwana ban taɓa jin shi kin tsananin fushi irin na jiya ba. Kuma duk a dalilin abin da kayi, ai ko ya ya ne ya kamata tunda na ce ka je, ka je ɗin. Haidar ina ilimin ka yake? Ina tunanin ka? Da har zaka kasa karɓar ƙaddararka da hannun biyu, ka yi tunanin hakan baya cikin tsarina a yanzu, amma da Allah ya ƙaddari lokacin yinsa ya yi ai na haƙura na karɓa. Idan baka sani ba, wannan abin ta wani fannin gata a kayi maka, amma tunda ka nuna ba ka so, zaka iya yanke duk hukuncin da ka ke ganin ya dace, wuƙa da nama a hannunka suke".

Shiru Haidar ya yi, tabbas maganganu Umman shi sun ratsa shi, sai dai ba ya jin zai iya zuwa wannan garin ya yi zama ko da na kwana biyu ne, sannan Umma da take maganar gata aka yi masa, shi babu wani gata da aka yi masa, a auren dolen da aka ƙaƙaba masa, kuma auren ma wai a ƙauye, shi bayan takurawa da ƙara jefa shi cikin damuwa da aka yi, a halin yanzu yadda yake ji, tunda ya rasa Afnan, babu wata macen da zata ƙara burge shi. Gyara zama ya yi, ya ce

"Umma dan Allah ki yi haƙuri na ɓata miki ran da na yi. Duk abin da ki ka gani ban yi dan na ɓata miki rai ba, Umma ni ba ƙin karɓa nayi ba, zuwa canne ba zan iya ba, me yasa ba a zo nan ɗin ba?".

"A taƙaice dai ko yau ɗin ba zuwa zaka yi ba Haidar? Wato kunyata ni ka ke son yi ko? Haidar kasan illar abin da ka ke shirin aikatawa kuwa? Abin da nake ganin yafi ƙarfin yinka a yanzu, amma cikin hukuncin Ubangiji ka same shi a ɓagas shi ka ke wulaƙantawa? Haidar ina nusar da kai amma ka ƙi ka fahimta, yanzu mahaifar tawa ce ba za ka iya zuwa ba? To shikenan tunda baka so zan yi magana da shi, na bashi haƙuri, sai ka sauwwaƙewa ɗiyar mutane, ta kama gabanta, kai kuma ka tsaya jiran wadda ka ke son ɗin, tashi ka ba ni guri tun raina bai ƙara ɓaci ba".

Haidar zai kuma yin magana, Umma ta hana shi, tare da umartar ya bar mata ɗakin ta.

Tashi ya yi ya fita jiki ba ƙwari, ya na jin sai dai Umma tayi haƙuri ba zai taɓa zuwa gurin wata kucakar mace ba a ƙauye, to ya je me zai yi mata? Idan suka gaji da jiransa dole su nemi mafita.

Da kallo Umma ta bishi, ta na mamakin ƙarfi hali irin na Haidar, tunda take bai taɓa nuna mata kafiya ba, sai wannan karon. A fili ta ce "Lallai barewa ba ta yi gudu ɗanta ya yi rarrafe ba, ba za ta manta kafiya irin ta mahaifinshi ba, Allah Sarki rayuwa kenan".

Umma ba tayi aune ba sai jin zubar hawaye tayi a kan fuskarta, a duk lokacin da zata tuna Baban Haidar takan shiga damuwa marar misaltuwa. Goge hayen tayi, ta na tunanin irin hukuncin da zata ɗauka akan Haidar, dan ta san ba ƙaramin yaƙi za ta yi dashi ba, a yadda ta ga ya dage ɗin nan, yanzu ya za ta yi da Yaya? Me zata ce masa? Haka dai ta shiga zancen zuci daga ƙarshe ta yanke shawarar abin da zata yi.

Da sanyi safiyar nan, wasu hadda abin kari basu ɗora ba, Gwaggo ta saka Sanusi ya kira mata Yaya Bala, Baba na zaune shi dai bai ce ƙala ba. 

Mai gari na zaune Maryam na kusa da shi, ta ba shan koko da ƙosai, ya ji ana kiran wayarsa, dubawa ya yi ya ga Sanusi ne, ɗaga wayar ya yi tare da yin sallama.

Amsawa Gwaggo tayi tare da faɗin "Antashi lafiya Yaya ya mutan gidan?"

"Alhamdulillah Halima fatan kuna lafiya kuma?" .

Ta ce "Lafiya lau Alhamdulillah Yaya".

"To ma sha Allah, jiya dai A'isha a ɗakinta ta kwana".

Gwaggo ta ce "Ma sha Allah, ashe ma abin bai daɗe ba, sannu da ƙoƙari Yaya Allah ya bar zumunci, ya ƙara girma" . Ya amsa da Amin 

Sannan ta ce "To ita wannan mara kunyar me take nufi? Ko ba za ta dawo ba ne? Can zata zauna a gidan mutane ta riƙa yi musu rashin kunyar da ta saba yi, ko kuma ta kashe mata auren ma gaba ɗaya, idan kuma can ɗin take muradin zama ita ma sai a nemamata mijin a can".

Mai gari ya ce "Halima wai yaushe zaki daina wannan masifar ne? Shin babu inda zata zauna ne sai gidan A'isha? Da ki ke ta haƙilon zata kashe mata aure, ba na son irin wannan halin naki, ki rabu da ita duk lokacin da tayi ra'ayin komawa gida, sai ta tafi, yarinya mai hankali ki na kiranta da mara kunya".

"Allah ya baka haƙuri Yaya, ina godiya sosai a gaishe mini da mutan gidan".

Ya ce "To zasu ji" daga haka Gwaggo ta kashe kiran, ta ci gaba da masifa, ba gaira babu dalili. 

Mai gari ko dariya ya yi ya ce "Halima Allah ya kyauta". Maryam dai bata ce komai ba 

Bayan hantsi ya fara fitowa Maryam ta ce gidan Afnan zata je, aka saka yaro ya rakata.

Afnan na zaune bayan ta gama karyawa, ta nemi guri ɗaya ta zauna, ta zuba uban tagumi, sallamar Maryam ta ji. Cikin farin ciki ta nufi Maryam ta rungumeta.

Amanar cool ce ✍️ 

***