Free chapter · Read without an account

Epi-two

by 🌹𝑍𝑎ℎ𝑟𝑎-𝑡𝑢𝑙-𝑄𝑎𝑙𝑎𝑚 🖋️ · TATSUNIYOYI

*TATSUNIYA*




By: _*🌹𝑍𝑎ℎ𝑟𝑎-𝑡𝑢𝑙-𝑄𝑎𝑙𝑎𝑚🖋️*_




* 🌑🔥 KOGIN ASIRI*
Episode 2: Idan Kogi Ya Buɗe Baki.


Duhun da ya rufe bakin kogin bai kasance duhun dare kawai ba. Duhu ne mai nauyi, kamar ana shanye haske daga duniya.

Mustapha ya tsaya cak. Fitilar da ke hannunsa ta mutu, amma idonsa bai rufe ba, tsoro ne ya buɗe su. Sai ya sake jin murya…

Ba daga nesa ba.
Ba daga kusa ba.
Daga cikin ransa.

“Ka tsaya, Mustapha….

Jikinsa ya yi sanyi kamar ƙanƙara. Ya ɗaga kai a hankali sai ya hango tsohuwa tsaye a gefen kogi.

Doguwar riga ce a jikinta, launin toka. Gashinta fari, idonta kuwa baƙi ƙwarai… kamar ba idon mutum ba.

“Ke wace ce?” 

Mustapha ya tambaya da murya mai rawa. Tsohuwar ta ja numfashi mai nauyi.

“Sunana Hajiya Zarawu. Sannan ni ce mai tsaron abin da kuka manta.”

Mustapha ya yi ƙoƙarin matsawa baya, amma ƙafafunsa sun kasa motsi.

“’Yar’uwata fa? Ina Sumayyah?!”.

Zarawu ta nuna kogin da sandarta. Ruwan ya yi motsi… Sai fuska ta bayyana a cikin ruwa fuskar Sumayyah.

Amma idonta… Ba idon da Mustapha ya sani ba ne.

“Yaya… ina jin sanyi.”

Mustapha da tashin hankali ya kalleta.

“Ki fito! Zan kai ki gida!”.

Sai kogin ya yi dariya. Ba dariyar mutum ba.
Dariyar da ta haɗu da murya dubu. 

“Sumayyah? Ta riga ta zama mallakina....!”

Iska ta taso da ƙarfi.
Ruwan ya fara tashi sama kamar bango.

Zarawu ta ɗaga sandarta da ƙarfi ta ce.

“Ka yi shiru, KOGIN ASIRI! Ba lokacin ɗaukar wani ba ne yanzu!”

Kogin ya yi harbawa kamar yana fushi ya ce.

“Kin sani, Zarawu… Jinin da ke cikin yaran nan… ba na mutane kaɗai ba ne.”.

Mustapha ya kalli Zarawu cikin tsoro ya ce.

“Me ya ke nufi? Me ya sa kogin ya ɗauki ’yar’uwata?”.

Zarawu ta runtse ido, hawaye suka tarun mata ta ce.

“Saboda laifin da aka aikata shekaru aru-aru da suka wuce. Kogin nan an taɓa rufe shi da rantsuwar jini. Amma rantsuwar ta karye.”.

Sai ta kalli Mustapha kai tsaye: 

“Yaron da kogin ya ɗauka… Ba ya dawowa sai an biya farashi.”

Mustapha ya girgiza kai da ƙarfi.

“Ni zan biya komai! Ku ɗauke ni, ku bar Sumayyah! Ina son ƙanwata ta tsira".

Sai kogin ya yi shiru na ɗan lokaci. Daga nan ya ce, da murya mai sanyi.

“Ba kowa nake so ba. Kai ne...”.

Ruwan ya fara matsowa ga Mustapha a hankali.
Zarawu ta yi ihu:

“KA GUDU, MUSTAPHA! Idan ka taka ruwan nan, ba za ka sake zama ɗan duniya ɗaya ba!”.

Amma Mustapha bai motsa ba. Idonsa na kan Sumayyah, har yanzu tana tsaye a cikin ruwa, tana kallonsa...

“Yaya…” Ta sake cewa “Kar ka bar ni.”.

Kawai sai komai ya yi tsit.

Sai Mustapha ya ɗaga ƙafa ɗaya…
ya kusan taka ruwan kogin. Sai wani abu ya ja shi baya da ƙarfi. Ƙasa ta buɗe.



_Menene laifin da aka aikata shekaru aru-aru da suka wuce?_
_Me ya sa kogin ke son Mustapha?_
_Shin Sumayyah har yanzu ’yar’uwarsa ce… ko wani abu dabam?_



Like comment and share fisabilillah 🙏🏻 🙏🏻 

Want the next chapter?

ui.create_a_free_arewapen_account_to_save_progress_unlock_paid_chapters_fol