Seven cities one secret

Daren Istanbul ya kasance cikin duhu da sanyi, ruwan sama yana saukowa a hankali yayin da wani mutum yake gudu a cikin tsohuwar unguwar da babu mutane sosai. A hannunsa akwai ƙaramin akwatin ƙarfe wanda yake riƙe da shi kamar abin da rayuwarsa ta dogara da shi.

Ya dinga waiwayawa yana kallon bayansa. Mutanen da suke binsa suna ƙara matsowa kusa, amma bai tsaya ba. Ya shiga wani tsohon gida wanda ya yi kama da wanda aka daɗe ba a zauna a ciki ba. Da zarar ya shiga sai ya rufe ƙofar ya jingina da ita yana sauke numfashi.

Ya san ba zai iya ɓoye akwatin na dogon lokaci ba. Ya ɗaga wani tsohon carpet da ke tsakiyar ɗakin sannan ya buɗe wani ɓangare na ƙasan ɗakin ya saka akwatin a ciki. Kafin ya rufe wurin sai ya buɗe akwatin na ɗan lokaci.

A ciki akwai wata tsohuwar takarda da aka nade da baƙin zare da kuma ƙaramin ƙarfe mai siffar lamba 7.

Ya kalli lambar na wasu seconds sannan ya rufe akwatin.

Wata murya ta fito daga wajen ƙofar.

“Ka san ba za ka iya ɓoye shi har abada ba.”

Mutumin ya lumshe idanunsa. Tsoro ya bayyana a fuskarsa amma bai amsa ba sai ya ce a hankali

“Ku same ta kafin su same ta.”

A wannan lokacin ƙofar ta fara girgiza da ƙarfi. Ya koma baya yana kallon ta yayin da aka sake buga ƙofar har ta karye.

Duhu ya mamaye gidan.

Shekaru goma sha biyu bayan haka.

Amara Noor ta tsaya a gaban wani tsohon gini a Istanbul tana riƙe da wata tsohuwar hoto a hannunta. Ginin ya kasance mai nisa da wuraren da masu yawon buɗe ido suke zuwa kuma ko da yake ba shi da wani abu mai ban mamaki a kallon farko Amara ta ji wani irin yanayi da ba ta iya bayyanawa.

Ta zo Istanbul ne saboda aikinta. Aikinta ya shafi tsofaffin hotuna da bayanan tarihi kuma hoton da ke hannunta shi ne dalilin da ya kawo ta wannan wuri.

Ta kalli hoton sannan ta kalli ginin.

Wani abu a zuciyarta ya gaya mata cewa wannan ba bincike ne na yau da kullum ba.

Tun tana ƙarama tana yawan yin mafarki iri ɗaya. Wani mutum yana tsaye a cikin duhu yana riƙe da akwatin ƙarfe sannan yana kallonta yana cewa mata kalmomi guda biyu

“Ki nemo bakwai.”

Amara ba ta taɓa fahimtar ma'anar hakan ba.

Amma a wuyanta akwai wata ƙaramar alamar 7 wadda ta kasance tun tana ƙarama.

Ta ɗaga kai tana kallon tsohon ginin sannan ta shiga.

Ba ta san cewa amsar da ta dade tana nema tana nan a cikin wannan ginin ba.

Kuma ba ta san cewa wani mutum mai suna Kael Rahman ya riga ya fara neman ta ba.

CHAPTER TWO

Cikin ginin akwai wani irin shiru da ya sa Amara ta ji kamar lokaci ya tsaya. Ta riƙe jakar da ke kafadarta ta fara tafiya a hankali tana kallon tsoffin bango da hotunan da suka rage a ciki.

Kafin ta zo wurin wani tsoho ne ya aika mata da hoton da ke hannunta. Ya gaya mata kada ta je wurin ita kaɗai amma Amara ba ta saurare shi ba. Ta yi imanin cewa abin da take nema yana da alaƙa da tarihin danginta kuma ba za ta bari tsoro ya hana ta gano gaskiya ba.

Ta tsaya a gaban wani tsohon zanen da ke rataye a bango. Wani abu ya ja hankalinta. Ta matsa kusa da shi sannan ta cire zanen a hankali.

A bayan zanen akwai wata alamar 7.

Zuciyarta ta buga da sauri.

Ta taɓa alamar da yatsanta kuma ta lura cewa akwai wani ƙaramin wuri a bangon da yake kama da maɓalli. Ta danna shi sai wani ɓangare na bangon ya motsa.

Amara ta tsaya cak.

Bayan bangon akwai wani ƙaramin ɓoye.

Ta shiga hannu ta fitar da ƙaramin akwatin ƙarfe.

A lokacin da ta gan shi wani abu ya dawo mata cikin tunani. Mafarkin da ta dade tana gani. Mutumin da ke riƙe da akwatin irin wannan ne.

Hannunta ya fara rawa yayin da ta buɗe akwatin.

A ciki akwai wata tsohuwar alama mai ban mamaki. Da'ira ce wadda ke kewaye da siffofi bakwai masu kama da maɓallan, a tsakiyarta kuma akwai wata ƙaramar alamar ido.

Amara ta kalle ta na ɗan lokaci.

“Menene wannan?”

A ƙarƙashin alamar akwai wata tsohuwar hoto.

Ta ɗauke hoton.

Hoton ya nuna wata mace tana riƙe da jariri a hannunta.

Amara ta tsaya cak.

Ta san matar.

Mahaifiyarta ce.

Ta kalli jaririn da ke hannunta sannan ta juya hoton.

A bayan hoton an rubuta kalmomi guda huɗu

SEVEN CITIES. ONE SECRET.

Numfashinta ya tsaya.

Kafin ta samu damar tunanin komai sai wayarta ta fara ringing.

Lambar ba ta cikin wayarta.

Ta ɗaga wayar.

“Hello?”

Shiru.

Sai wata murya ta ce

“Idan kina son sanin dalilin da ya sa aka ɓoye gaskiyar haihuwarki daga gare ki ki bar Istanbul kafin ƙarfe goma sha biyu.”

Kiran ya yanke.

Amara ta kalli agogon da ke bangon ɗakin.

11:17.

Ta sake kallon hoton.

Sai ta lura da wani abu da ba ta taɓa gani ba. A wuyan mahaifiyarta akwai ƙaramar alamar 7.

A hankali ta juya hoton.

A ƙasan rubutun da ke baya akwai wasu kalmomi da aka rubuta da ƙaramar hannu

KAEL YA SAN GASKIYAR.

A wani wuri daban na Istanbul wani mutum yana zaune a cikin ɗaki mai duhu yana kallon hoton Amara.

Kael Rahman ya ɗaga kansa ya kalli mutumin da ke tsaye a gabansa.

“Kada ku taɓa ta.”

Mutumin ya yi shiru.

Kael ya sake kallon hoton Amara.

“Ku tabbatar ba ta bar Istanbul ba.”

Ya ajiye hoton a gabansa sannan ya koma cikin kujerarsa.

Ya san Amara ba ta san abin da take nema ba.

Amma abin da ya fi damunsa shi ne cewa ta riga ta fara samun amsoshin da aka yi shekaru goma sha biyu ana ɓoye su.

Kuma idan ta gano komai kafin shi lokaci zai yi wahala a gyara abin da zai biyo baya.

Amara ta fita daga tsohon ɗakin tana riƙe da akwatin a hannunta.

Ba ta san cewa matakin da ta ɗauka yanzu shi ne farkon shiga cikin wani sirri da ya haɗa Istanbul da Paris da Dubai da Marrakech da Geneva da Lagos da Cape Town ba.

Sirrin da mutane da yawa suka kashe domin ya kasance a ɓoye.

Kuma a tsakiyar wannan sirrin akwai Kael Rahman.