KOWA DA ƘADDARARSA

Sample · 01

Bismillahir Rahmanir Rahim Dukkan yabo da ɗaukaka sun tabbata ga Allah maɗaukakin sarki, wanda ya halicci duniya da abinda ke cikinta. Tsira da abincinsa ya ƙara tabbata ga annabin Muhammad (SAW) da alayensa da sahabbansa.GARGADI Wannan labarin ƙagagge ne, an yi shine domin faɗakarwa, wa'azantarwa da kuma nishaɗantarwa. Sannan kuma dukkanin haƙƙin mallakar sa abin kiyaye wa ne, don haka a kula kuma a kiyaye.KYAUTARWAGare ku iyayena, Alhaji Umar Aliyu da kuma Haj. A'ishatu Ɗahiru. Allah ya ba ku tsawon kwanaki masu albarka, sannan ya cika rayuwaku da albarkarsa. Ameen.Kowa ka kalla cike yake da fara'a, a yayinda mutane ke tururuwar shiga cikin makarantar, ɗalibai kuma na tarbo jama'a zuwa cikin ɗakin taron sannan a hannu ɗaya kuma malaman makarantar na taya su da nunawa baƙi wajen zaman su.Farin ciki biyu nake yi a wannan ranar, murnar kasancewar na kammala makarantar gaba da firamare sannan farin cikin kasancewar ilahirin 'yan gidanmu a wajen taro, in ban da ƙanwata Sauda, da ita ma take makaranta a lokacin.Fara taron babu daɗewa ne, Allah yayi wa tawagar gwamna na wannan lokacin, Alhaji Salihu Kabir, isowa, tare da Kwamishinan Ilimi da mukarrabansa. Manyan baƙi sun yi jawabai a kan abinda taron ya ƙunsa, kafin daga bisani mai girma Gwamna ya yi na shi jawabin. Jawabinsa ya ƙunshi nuna jin daɗin sa akan yanda ɗalibai mata, kuma 'yan jihar Kano su takwas suka lashe jarabawar kammala makarantar sakandare da sakamakon da ba'a taɓa samun shi ba. Dukkannin mu daga makarantu mabanbanta muka fito (ana taron ne a makarantar mu, kasancewar ta mafi girma).A ka fara kiran mu kuma don sauran jama'a su ga waɗanda aka yi taron domin su. Ta cikin amsa kuwwa sunayen Sadiya Umar, Sadiya Aliyu, Sadiya Abubakar, Sadiya Zannuraini, Sadiya Kabir, Sadiya Abdul Manaf, Sadiya Mansur da Ummu Kulsum Aminu (Ni kenan, kuma Ni kadai ce daban a cikinsu) ke tashi.Kowa mamaki ya cika shi ganin sunayen duka iri ɗaya, har mai gabatarwa yana cewa ko nasarar na da nasaba da sunayen ne, kowa ya dara. Gwamna yayi mana kyautar dubu ɗari biyu da hamsin kowanne mu. Cike da murmushi na juya na kalli sashen da Mama, Baba, Yaya Muntari, Yaya Mahmoud, Yaya Zainabu, Yaya Naziru sai ƙannena 'yan biyu Hassana da Hussaini, suke zaune fuskokinsu cike da annuri. Kafin daga bisani manyan baƙi su ma suka yi mana ta su bajintar kafin a rufe taron.A gajiye na koma gida. Su Mama sun riga mu dawowa. Yaya Muntari ne ya jira Ni na gama sallama da ƙawayena, bayan ɗaukar hotuna sannan muka taho. Wanka na fara yi kafin nayi sallah, na bi lafiyar gado don rage baccin da yake kaina.Wurin magriba na farka, raina ya fara ɓaci, ga jikina kaman an yi mun duka. Illar baccin la'asar kenan. Wanka na sake yi don na samun ƙwarin jikina sannan nayi sallah na fito.Falo na dosa in da kusan kowa yake zaune idan ka ɗ...

Continue reading free chapter